AKP បន្ទាយមានជ័យ ថ្ងៃទី១២ ខែតុលា ឆ្នាំ២០២៦--ពិធីប្រណាំងទូកងខ្នាតអន្តរជាតិមិត្តភាព នៅវត្តពោធ្យារាមអង្គាបុស្ប ស្ថិតក្នុងសង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ បានប្រព្រឹត្តទៅយ៉ាងអធិកអធម និងពោរពេញដោយបរិយាកាសសប្បាយរីករាយ កាលពីរសៀលថ្ងៃទី១១ ខែតុលា ឆ្នាំ២០២៦ ដោយមានការចូលរួមពីលោក ស្រេង សុផល អភិបាលនៃគណៈអភិបាលក្រុងសិរីសោភ័ណ ព្រះសង្ឃ គណៈកម្មការរៀបចំពិធី កីឡាករចំណុះទូក និងប្រជាពលរដ្ឋយ៉ាងច្រើនកុះករ ដើម្បីអបអរសាទរពិធីបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ ព្រមទាំងរួមគ្នាថែរក្សាមរតកវប្បធម៌ដ៏មានតម្លៃរបស់ដូនតា។

ព្រឹត្តិការណ៍នេះមិនត្រឹមតែជាការប្រកួតកីឡាប្រណាំងទូក ដើម្បីបង្កភាពសប្បាយរីករាយដល់ប្រជាពលរដ្ឋក្នុងឱកាសបុណ្យប្រពៃណីជាតិប៉ុណ្ណោះទេ ប៉ុន្តែថែមទាំងជាឱកាសសម្រាប់បង្កើនចំណងសាមគ្គីភាពក្នុងសហគមន៍ លើកកម្ពស់ស្មារតីស្រឡាញ់វប្បធម៌ជាតិ និងបន្តបណ្តុះស្មារតីចូលរួមរបស់ប្រជាពលរដ្ឋក្នុងការថែរក្សាប្រពៃណីខ្មែរឱ្យបានគង់វង្សពីមួយជំនាន់ទៅមួយជំនាន់។

ក្នុងពិធីបិទការប្រណាំងទូក លោក ស្រេង សុផល អភិបាលនៃគណៈអភិបាលក្រុងសិរីសោភ័ណ បានមានប្រសាសន៍ថា ព្រឹត្តិការណ៍ប្រណាំងទូកនេះមានអត្ថន័យសំខាន់ ព្រោះមិនត្រឹមតែបង្ហាញពីបរិយាកាសសប្បាយរីករាយ និងស្នាមញញឹមរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីការរួមចំណែកថែរក្សាអត្តសញ្ញាណជាតិ និងលើកស្ទួយកីឡាប្រណាំងទូក ដែលជាមរតកវប្បធម៌ដ៏ផូរផង់របស់ខ្មែរតាំងពីបុរាណកាលមក។

លោកបានបញ្ជាក់ថា ការប្រណាំងទូកតម្រូវឱ្យកីឡាករចំណុះទូកមានការសហការគ្នាយ៉ាងស្អិតរមួត មានវិន័យ ការអត់ធ្មត់ និងការប្រើប្រាស់កម្លាំងកាយចិត្តរួមគ្នា ដើម្បីសម្រេចគោលដៅ។ ស្មារតីទាំងនេះក៏ជាគុណតម្លៃសំខាន់សម្រាប់ការរស់នៅក្នុងសង្គម ដែលត្រូវការការយោគយល់ ការសហការ និងការជួយគ្នាទៅវិញទៅមក ដើម្បីអភិវឌ្ឍសហគមន៍ឱ្យកាន់តែរឹងមាំ។

លោកអភិបាលក្រុងក៏បានលើកឡើងពីសារៈសំខាន់នៃការចូលរួមគាំទ្រពីអាជ្ញាធរមូលដ្ឋាន គណៈកម្មការវត្ត ព្រះសង្ឃ និងប្រជាពលរដ្ឋ ក្នុងការរៀបចំសកម្មភាពវប្បធម៌ សាសនា និងកីឡា ដែលជាផ្នែកមួយនៃការរក្សាអត្តសញ្ញាណសហគមន៍ និងផ្តល់ឱកាសឱ្យប្រជាពលរដ្ឋបានជួបជុំគ្នាក្នុងបរិយាកាសសប្បាយរីករាយ ប្រកបដោយភាពស្និទ្ធស្នាល។ ជាមួយគ្នានេះ លោកបានថ្លែងអំណរគុណយ៉ាងជ្រាលជ្រៅចំពោះគណៈកម្មការរៀបចំកម្មវិធី អាជ្ញាធរពាក់ព័ន្ធ កីឡាករចំណុះទូក ព្រះសង្ឃ និងប្រជាពលរដ្ឋទាំងអស់ ដែលបានចូលរួមចំណែកធ្វើឱ្យព្រឹត្តិការណ៍នេះប្រព្រឹត្តទៅដោយរលូន និងទទួលបានជោគជ័យ។ លោកក៏បានលើកទឹកចិត្តឱ្យមានការបន្តរៀបចំសកម្មភាពបែបនេះ ដើម្បីថែរក្សាប្រពៃណីទំនៀមទម្លាប់ល្អរបស់ជាតិ និងបង្កើនភាពសប្បាយរីករាយជូនប្រជាពលរដ្ឋក្នុងឱកាសបុណ្យប្រពៃណីនានា។

ចំណែកព្រះសង្ឃដែលបានចូលរួមក្នុងពិធីនេះមានសង្ឃដីកាថា ការរៀបចំពិធីប្រណាំងទូកក្នុងបរិវេណវត្ត គឺជាសកម្មភាពមួយដែលភ្ជាប់ទំនាក់ទំនងរវាងព្រះពុទ្ធសាសនា ប្រពៃណីវប្បធម៌ និងការរស់នៅរបស់ប្រជាពលរដ្ឋក្នុងសហគមន៍។ ការជួបជុំគ្នាក្នុងឱកាសបុណ្យកាន់បិណ្ឌ និងភ្ជុំបិណ្ឌ មិនត្រឹមតែជាការបំពេញកុសលតាមគន្លងព្រះពុទ្ធសាសនាប៉ុណ្ណោះទេ ប៉ុន្តែថែមទាំងជាឱកាសបង្កើនសាមគ្គីភាព ការចែករំលែកក្តីស្រឡាញ់ និងការរក្សាទំនៀមទម្លាប់ដ៏ល្អរបស់ខ្មែរឱ្យបន្តស្ថិតស្ថេរ។

ព្រះសង្ឃបានបង្ហាញក្តីសង្ឃឹមថា យុវជន និងកូនចៅជំនាន់ក្រោយ នឹងបន្តចូលរួមថែរក្សាកីឡាប្រណាំងទូក និងសកម្មភាពវប្បធម៌ប្រពៃណីផ្សេងៗទៀត ដោយចាត់ទុកថា ទាំងនេះជាមរតកដ៏មានតម្លៃ ដែលត្រូវការការចូលរួមពីគ្រប់មជ្ឈដ្ឋាន ដើម្បីកុំឱ្យបាត់បង់តាមពេលវេលា។

ក្នុងបរិយាកាសដ៏សប្បាយរីករាយនេះ ប្រជាពលរដ្ឋដែលបានមកទស្សនាការប្រណាំងទូក បានបង្ហាញចំណាប់អារម្មណ៍ថា កម្មវិធីនេះបានបង្កើតឱកាសឱ្យក្រុមគ្រួសារ និងមិត្តភក្តិបានជួបជុំគ្នា កម្សាន្តអារម្មណ៍ និងទស្សនាការប្រកួតប្រជែងរបស់កីឡាករចំណុះទូក ដែលត្រូវការកម្លាំង សមត្ថភាព និងការសហការគ្នាយ៉ាងល្អ។ ពួកគាត់ក៏បានបង្ហាញការគាំទ្រចំពោះការរៀបចំព្រឹត្តិការណ៍បែបនេះ ព្រោះអាចជួយឱ្យកូនចៅជំនាន់ក្រោយបានស្គាល់ និងស្រឡាញ់កីឡាប្រពៃណីរបស់ខ្លួនកាន់តែច្បាស់។

ប្រជាពលរដ្ឋបានបន្តថា ការប្រណាំងទូកនៅក្នុងឱកាសបុណ្យប្រពៃណីជាតិ បានបន្ថែមភាពរស់រវើកដល់សហគមន៍ និងបង្កើតអនុស្សាវរីយ៍ល្អៗសម្រាប់អ្នកចូលរួម។ ពួកគាត់ចង់ឃើញការរៀបចំកម្មវិធីបែបនេះបន្តទៅមុខទៀត ដើម្បីឱ្យប្រជាពលរដ្ឋមានឱកាសចូលរួមកម្សាន្តដោយសន្តិភាព និងរួមគ្នាលើកស្ទួយវប្បធម៌ជាតិ។

សូមបញ្ជាក់ថា ពិធីប្រណាំងទូកងខ្នាតអន្តរជាតិមិត្តភាពនេះ ត្រូវបានរៀបចំឡើងនៅលើកំណាត់ប្រឡាយសិប្បនិម្មិតលេខ១៤៦ ក្នុងតំបន់វត្តពោធ្យារាមអង្គាបុស្ប ដោយមានគោលបំណងអបអរសាទរពិធីបុណ្យកាន់បិណ្ឌ និងភ្ជុំបិណ្ឌ ព្រមទាំងលើកកម្ពស់កីឡាប្រណាំងទូកង ដែលជាប្រពៃណីដ៏មានតម្លៃរបស់ប្រជាជនកម្ពុជា។ ព្រឹត្តិការណ៍នេះបានបង្ហាញថា ការរួមបញ្ចូលគ្នារវាងសកម្មភាពសាសនា វប្បធម៌ និងកីឡា អាចជួយពង្រឹងចំណងមិត្តភាព សាមគ្គីភាព និងការចូលរួមរបស់ប្រជាពលរដ្ឋក្នុងការថែរក្សាមរតកជាតិ។ ការបន្តគាំទ្រសកម្មភាពទាំងនេះ គឺជាការរួមចំណែកដ៏សំខាន់ក្នុងការបញ្ជូនប្រពៃណីល្អៗរបស់ខ្មែរទៅកាន់កូនចៅជំនាន់ក្រោយឱ្យបានគង់វង្ស៕

ដោយ ឈុន សារ៉ាត