AKP កំពង់ធំ ថ្ងៃទី១០ ខែតុលា ឆ្នាំ២០២៦ -- លោកជំទាវ ឃួន ឃុនឌី សមាជិកព្រឹទ្ធសភា និងជាប្រធានក្រុមការងារចុះមូលដ្ឋានស្រុកកំពង់ស្វាយ ខេត្តកំពង់ធំ និងមិត្តរួមការងារ កាលពីថ្ងៃទី៩ ខែតុលា ឆ្នាំ២០២៦ បានអញ្ជើញចូលរួមកាន់បិណ្ឌទី១៣ នៅវត្តមុន្នីរង្សី និងវត្តពាមមេត្រីស្ថិតនៅក្នុងស្រុកកំពង់ស្វាយ ខេត្តកំពង់ធំ។

លោកជំទាវលើកឡើងថា នេះជាការរួមចំណែកមួយរវាងពុទ្ធបរិស័ទក៍ដូចជាក្រុមការងារទាំងអស់ក្នុងការចូលរួមគាំទ្រវិស័យព្រះពុទ្ធសាសនា ដែលជាសាសនារបស់រដ្ឋ ព្រមទាំងប្រកាន់ខ្ជាប់នូវទំនៀមទម្លាប់ប្រពៃណីដ៏ល្អផូរផង់របស់យើង និងបានឆ្លុះបញ្ចាំងពីការរួបរួមសាមគ្គីគ្នាយ៉ាងរឹងមាំក្នុងការបន្តការគាំទ្រវិស័យព្រះពុទ្ធសាសនាឱ្យបានឋិតថេរគង់វង្សយូរអង្វែង។

លោកជំទាវបានឧទ្ទិសកុសលជូនដល់បុព្វការីជន មាតាបិតា ជីដូនជីតា ញាតិកាទាំងប្រាំពីរសណ្ដាន ពិសេស សូមឧទ្ទិសមហាកុសលដល់វីរកងទ័ពដែលបានពលីជីវិតក្នុងសមរភូមិដើម្បីការពារបូរណភាពទឹកដី សូមឱ្យបានសោយសុខក្នុងសុគតិភពកុំបីឃ្លៀងឃ្លាតឡើយ និងសូមបួងសួងដល់វត្ថុសក្តិសិទ្ធិក្នុងលោកតាមថែរក្សាក្រុមការងារ និងបងប្អូនទាំងអស់បានសេចក្តីសុខសេចក្តីចំរើននិងប្រាថ្នាអ្វីបានដូចបំណង។

សូមបញ្ជាក់ថា ក្នុងពិធីកាន់បិណ្ឌទី១៣ លោកជំទាវបានចែកជូននូវបច្ច័យ និងសារុងជូនដល់លោកតាលោកយាយដែលបានចូលរួមផងដែរ៕

ដោយ៖ ស៊ុម វណ្ណា