AKP កំពង់ធំ ថ្ងៃទី២ ខែតុលា ឆ្នាំ២០២៦--លោក ឧត្តមសេនីយ៍ត្រី មាស យ៉ត​ មេបញ្ជាការ កងរាជអាវុធហត្ថខេត្តកំពង់ធំនាព្រឹកថ្ងៃទី២ ខែតុលា ឆ្នាំ២០២៦ បានដឹកនាំមន្ត្រីក្រោមឱវាទ អញ្ជើញចុះសួរសុខទុក្ខនិងនាំយកអំណោយស្បៀងអាហារគ្រឿងឧបភោគបរិភោគនិងថវិកាឧបត្ថម្ភជូនអតីតៈយុទ្ធជនចំនួន៧គ្រួសារកំពុងរស់នៅលើដីសម្បទានសង្គមកិច្ច ជាអំណោយរបស់រាជរដ្ឋាភិបាល តាមរយៈសមាគមន៍អតីតយុទ្ធជននៅភូមិដងក្តា ឃុំក្រយា ស្រុកសន្ទុកខេត្តកំពង់ធំក្នុងឱកាសបុណ្យភ្ជុំបិណ្ឌ។

លោកឧត្តមសេនីយ៍ត្រីមេបញ្ជាការបានបញ្ជាក់ថា ការចុះសួរសុខទុក្ខនេះ ក្នុងគោលបំណងបង្ហាញពីការយកចិត្តទុកដាក់ និងការគោរពចំពោះគុណបំណាច់របស់អតីតយុទ្ធជន ព្រមទាំងបានសំណេះសំណាល សួរសុខទុក្ខ និងជីវភាពរស់នៅប្រចាំថ្ងៃរបស់គ្រួសារអតីតយុទ្ធជន។

ក្នុងឱកាសនោះ បញ្ជាការដ្ឋានកងរាជអាវុធហត្ថខេត្តកំពង់ធំ ក៏បាននាំយកនូវអំណោយ និងសម្ភារៈមួយចំនួន ដើម្បីចែកជូនដល់គ្រួសារអតីតយុទ្ធជនទាំង ៧គ្រួសារ ក្នុងស្មារតីចែករំលែកក្តីស្រឡាញ់ ការយកចិត្តទុកដាក់ និងការរួមចំណែកលើកកម្ពស់សុខុមាលភាពរបស់អតីតយុទ្ធជន ក្នុងឱកាសបុណ្យភ្ជុំបិណ្ឌ។សកម្មភាពនេះបានបង្ហាញពីស្មារតីគោរពដឹងគុណ និងការយកចិត្តទុកដាក់ចំពោះអតីតយុទ្ធជន ដែលបានលះបង់កម្លាំងកាយចិត្តក្នុងបុព្វហេតុការពារជាតិនិងប្រជាជន។

លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ បានជូនពរដល់គ្រួសារអតីតយុទ្ធជន បងៗ និវត្តន៍ជន លោកមេភូមិ ព្រមទាំងកម្លាំងប្រតិបត្តិការសឹករងកំពង់ធំ និងកម្លាំងប្រជាការពារ សូមមានសុខភាពល្អអាយុយឺនយូរររកទទួលទានមានបានគ្រប់ៗគ្នា។

សូមបញ្ជាក់រថា ក្រុមគ្រួសារអតីតយុទ្ធជនចំនួន៧គ្រួសារ កក្នុង១គ្រួសារទទួលបាននូវអង្ករចំនួន៥០គីឡូក្រាម មី១កេស ទឹកត្រី ១យួរ ទឹកស៊ីអ៊ីវ១យួរ ស្ករស១គីឡូក្រាម, ប៊ីចេង១គីឡូក្រាម ខ្ទឹមស១គីឡូក្រាម, ម៉ាសពីរប្រអប់ ថ្នាំពេទ្យមួយកញ្ចប់ និងថវិកា១០ម៉ឺនរៀល។ហើយបានឧបត្ថម្ភថវិកាដល់លោកមេភូមិចំនួន១០ម៉ឺនរៀល កងកម្លាំងប្រតិបត្តិការសឹករងកំពង់ធំដែលប្រចាំការនៅទីនោះចំនួន២នាក់នូវថវិកាចំនួន ១០ម៉ឺនរៀលព្រមទាំងបានឧបត្ថម្ភដល់កម្លាំងប្រជាការពារភូមិចំនួន១២នាក់នូវថវិកាចំនួន៣០ម៉ឺនរៀលផងដែរ៕

ដោយ ស៊ុម វណ្ណា