AKP ប៉េកាំង, ប្រទេសចិន ថ្ងៃទី២៥ ខែកញ្ញា ឆ្នាំ២០២៦ -- នៅក្នុងវគ្គបណ្តុះបណ្តាលអន្តរជាតិស្តីពីការលើកកម្ពស់សមត្ថភាពប្រព័ន្ធផ្សព្វផ្សាយថ្មី នាថ្ងៃទី២៥ ខែកញ្ញា ឆ្នាំ២០២៦ នេះ លោកសាស្ត្រាចារ្យ CHEN Qiang មកពីសាកលវិទ្យាល័យទំនាក់ទំនងចិន បានធ្វើបទបង្ហាញយ៉ាងស៊ីជម្រៅស្តីពីការអនុវត្តបច្ចេកវិទ្យាការពិតនិម្មិត (Virtual Reality - VR) និងការពិតបន្ថែម (Augmented Reality - AR) ក្នុងការទំនាក់ទំនងប្រព័ន្ធផ្សព្វផ្សាយសម័យទំនើបដល់សិក្ខាកាមមកពីបណ្តាប្រទេសអាស៊ាន នៃវគ្គបណ្តុះបណ្តាល «ប្រព័ន្ធផ្សព្វផ្សាយថ្មី ដើម្បីជំរុញការអភិវឌ្ឍឧស្សាហកម្មប្រកបដោយគុណភាពខ្ពស់ សម្រាប់បណ្តាប្រទេសអាស៊ាន»។

នៅក្នុងបទបង្ហាញរបស់លោក សាស្ត្រាចារ្យបានគូសបញ្ជាក់ថា វិស័យប្រព័ន្ធផ្សព្វផ្សាយបច្ចុប្បន្នមិនមែនជាការបញ្ជូនព័ត៌មានបែបបុរាណទៀតឡើយ ពោលគឺត្រូវតែទាញយកផលប្រយោជន៍ពីការរីកចម្រើននៃបច្ចេកវិទ្យាទំនើប ដើម្បីទាក់ទាញចំណាប់អារម្មណ៍ និងការចូលរួមពីទស្សនិកជន។ ការដាក់បញ្ចូលបច្ចេកវិទ្យា VR និង AR ជួយឱ្យស្ថាប័នសារព័ត៌មានអាចបត់បែនទាន់ទៅនឹងយុគសម័យឌីជីថល និងឆ្លើយតបទៅនឹងតម្រូវការដ៏មានសក្តានុពលរបស់អ្នកទស្សនាជំនាន់ថ្មី។

តាមរយៈបទបង្ហាញពីសាស្ត្រាចារ្យរូបនេះបានពន្យល់ថា៖ VR (Virtual Reality): គឺជាបច្ចេកវិទ្យាបំប្លែងបរិយាកាស ដោយនាំអ្នកប្រើប្រាស់ចូលទៅក្នុងពិភពឌីជីថលទាំងស្រុង និងផ្តាច់ចេញពីពិភពពិតជុំវិញខ្លួន។ បច្ចេកវិទ្យានេះនាំទស្សនិកជន «ឈានជើងចូលទៅក្នុង» ទីកន្លែង ឬព្រឹត្តិការណ៍ជាក់ស្តែងណាមួយទាំងស្រុង (ឧទាហរណ៍៖ ការប្រើវែនតា VR ដើម្បីមើលតំបន់ណាមួយក្នុងទម្រង់ ៣៦០ ដឺក្រេ) ដែលជួយឱ្យពួកគេទទួលបានអារម្មណ៍ដូចស្ថិតក្នុងពិភពពិតផ្ទាល់។

AR (Augmented Reality): គឺជាបច្ចេកវិទ្យាដែលយកវត្ថុ ឬក្រាហ្វិកឌីជីថលមកបញ្ចាំងបញ្ចូលគ្នាជាមួយពិភពពិតដែលយើងកំពុងរស់នៅ ដោយអ្នកប្រើប្រាស់នៅតែមើលឃើញបរិយាកាសជុំវិញខ្លួនធម្មតា ប៉ុន្តែមានធាតុផ្សំដូចជារូបថត វត្ថុ 3D ឬទិន្នន័យអណ្តែតបង្ហាញឡើង។ វារួមចំណែកជួយឱ្យការបង្ហាញព័ត៌មាន ឬការធ្វើបទបង្ហាញក្នុងស្ទូឌីយោកាន់តែមានជីវិតរស់រវើក និងងាយយល់ (ឧទាហរណ៍៖ ការដាក់បង្ហាញក្រាហ្វិកស្ថិតិអណ្តែតលើស្ទូឌីយោពេលកំពុងអានព័ត៌មានឬការប្រើប្រាស់នៅលើបណ្តាញសង្គម)។

លោកសាស្ត្រាចារ្យបានសង្កត់ធ្ងន់ថា៖ «បរិវត្តកម្មការផ្សាយព័ត៌មានឌីជីថលតាមរយៈការបត់បែនទាន់ពេលវេលា និងការប្រើប្រាស់បច្ចេកវិទ្យាទំនើបៗដូចជា VR និង AR ព្រមទាំងការប្រកាន់ខ្ជាប់នូវ ក្រមសីលធម៌វិជ្ជាជីវៈ ទំនុកចិត្ត និងការជឿជាក់ពីប្រជាពលរដ្ឋ គឺជាគន្លឹះគ្រឹះដ៏សំខាន់បំផុត ដើម្បីធានាឱ្យស្ថាប័នសារព័ត៌មានអាចបន្តឈរជើង និងរក្សាបាននូវតម្លៃស្នូលរបស់ខ្លួនប្រកបដោយចីរភាពក្នុងពិភពសម័យទំនើប»៕

ដោយ៖ ទូច វលក្ខ័ណ