AKP ភ្នំពេញ ថ្ងៃទី២៥ ខែកញ្ញា ឆ្នាំ២០២៦-- ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការ និងជាប្រធានលេខាធិការដ្ឋានគណៈកម្មាធិការគ្រប់គ្រងធនធានខ្សាច់ តំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការគ្រប់គ្រងធនធានខ្សាច់ នាព្រឹកថ្ងៃសុក្រ ទី២៥ ខែកញ្ញា ឆ្នាំ២០២៦ នៅទីស្តីការក្រសួង បានអញ្ជើញជាអធិបតីដឹកនាំកិច្ចប្រជុំលើកទី៧ របស់លេខាធិការដ្ឋានគណៈកម្មាធិការគ្រប់គ្រងធនធានខ្សាច់ (គ.ធ.ខ.) ដើម្បីពិនិត្យលើវឌ្ឍនភាពការងារប្រចាំត្រីមាសទី៣ និងកំណត់ផែនការសកម្មភាពការងារបន្តប្រចាំត្រីមាសទី៤ ឆ្នាំ២០២៦។

កិច្ចប្រជុំនេះមានការចូលរួមពីតំណាងក្រសួង-ស្ថាប័នពាក់ព័ន្ធ ដែលជាសមាជិកលេខាធិការដ្ឋានគ្រប់គ្រងធនធានខ្សាច់ សរុបចំនួន២៥រូប ក្នុងគោលបំណងពិនិត្យវឌ្ឍនភាពការងារត្រីមាសទី៣ កំណត់ផែនការសកម្មភាពអាទិភាពត្រីមាសទី៤ និងត្រៀមរៀបចំកិច្ចប្រជុំប្រចាំឆ្នាំ២០២៦ របស់គណៈកម្មាធិការគ្រប់គ្រងធនធានខ្សាច់ ដើម្បីធានាបាននូវបេសកកម្មការងារប្រកបដោយចីរភាព ប្រសិទ្ធភាព និងប្រសិទ្ធផល។

ឯកឧត្តមរដ្ឋលេខាធិការបានបញ្ជាក់ថា អង្គប្រជុំបានធ្វើការពិភាក្សាយ៉ាងផុសផុលលើបទពិសោធន៍ និងមេរៀនដែលទទួលបានពីសកម្មភាពចុះត្រួតពិនិត្យ ការផ្សព្វផ្សាយ និងការតាមដានការធ្វើអាជីវកម្មបូមខ្សាច់នាពេលកន្លងមក ក្នុងគោលដៅពង្រឹង និងកែលម្អដំណើរការអនុវត្តការងារនាពេលខាងមុខឱ្យកាន់តែមានភាពច្បាស់លាស់ និងសាមគ្គីភាព។ ទន្ទឹមនឹងនេះ អង្គប្រជុំក៏បានពិនិត្យយ៉ាងយកចិត្តទុកដាក់លើសេចក្តីព្រាងផែនការសកម្មភាពបន្តសម្រាប់ត្រីមាសទី៤ ឆ្នាំ២០២៦ របស់លេខាធិការដ្ឋានផងដែរ។

កិច្ចប្រជុំបានប្រព្រឹត្តទៅដោយរលូន និងទទួលបានធាតុចូលសំខាន់ៗជាច្រើនពីគ្រប់ភាគីពាក់ព័ន្ធ។ អង្គប្រជុំបានឯកភាពកំណត់នូវផែនការសកម្មភាពអាទិភាពមួយចំនួន ដែលលេខាធិការដ្ឋានត្រូវយកចិត្តទុកដាក់បន្តអនុវត្តឱ្យបានទាន់ពេលវេលា ប្រកបដោយស្មារតីទទួលខុសត្រូវខ្ពស់ គណនេយ្យភាព និងមានប្រសិទ្ធភាពខ្ពស់បំផុត៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)