AKP ភ្នំពេញ ថ្ងៃទី១១ ខែកញ្ញា ឆ្នាំ២០២៦-- ឯកឧត្តម ម៉េង ប៉ូគន្ធ អគ្គនាយកនៃអគ្គនាយកដ្ឋានកិច្ចការរដ្ឋបាល និងឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសនៃ ក្រសួងធនធានទឹក និងឧតុនិយម នាថ្ងៃសុក្រទី១១ ខែកញ្ញា ឆ្នាំ២០២៦ នៅសាលប្រជុំទីស្ដីការក្រសួង បានអញ្ជើញជាសហប្រធានដឹកនាំកិច្ចប្រជុំស្តីពី «ការពង្រឹងប្រសិទ្ធភាពការគ្រប់គ្រងឆ្មាំទំនប់ និងការថែទាំប្រព័ន្ធធារាសាស្ត្រ»។

កិច្ចប្រជុំនេះ មានការអញ្ជើញចូលរួមពីសំណាក់ អគ្គនាយករង, តំណាងអង្គភាពត្រួតពិនិត្យគម្រោង, អង្គភាពលទ្ធកម្ម, នាយកដ្ឋានធារាសាស្ត្រកសិកម្ម និងថ្នាក់ដឹកនាំមន្ទីរធនធានទឹក និងឧតុនិយម រាជធានី-ខេត្ត ទាំង២៥។
គោលបំណងនៃកិច្ចប្រជុំនេះរៀបចំឡើងកឺដើម្បី ពង្រឹងប្រសិទ្ធភាព និងគុណភាពនៃការគ្រប់គ្រង ការថែទាំប្រព័ន្ធធារាសាស្ត្រ ព្រមទាំងបង្កើនស្មារតីទទួលខុសត្រូវរបស់អ្នកទទួលការ ក្នុងការថែទាំប្រព័ន្ធធារាសាស្ត្រឱ្យកាន់តែមានគុណភាព និងប្រសិទ្ធភាពខ្ពស់នៅទូទាំងប្រទេស។ ការងារនេះស្ដែងចេញតាមរយៈការរៀបចំផែនការថែទាំ និងជួសជុលជាប្រចាំ ដើម្បីធានានិរន្តរភាពនៃការផ្គត់ផ្គង់ទឹកលើគ្រប់វិស័យ ជាពិសេសការប្រើប្រាស់ថវិការដ្ឋឱ្យចំគោលដៅ និងមានប្រសិទ្ធភាពខ្ពស់បំផុត។

អង្គប្រជុំបានដាក់ចេញនូវទិសដៅការងារសំខាន់ៗចំនួន ៦ ចំណុច ជូនដល់មន្ទីរជំនាញរាជធានី-ខេត្ត រួមមាន៖
ទី១- ជ្រើសរើសទីតាំងគម្រោងមានអាទិភាពខ្ពស់ និងហានិភ័យសមស្រប ដាក់ចូលក្នុងផែនការថែទាំ ផ្ញើមកនាយកដ្ឋានជំនាញឱ្យទាន់ពេល ដើម្បីរៀបចំផែនការ៣ឆ្នាំរំកិល។

ទី២- នាយកដ្ឋានធារាសាស្ត្រកសិកម្ម ត្រូវវាយតម្លៃលើលទ្ធផលអនុវត្តការងារជាក់ស្តែងរបស់មន្ទីរ រាជធានី-ខេត្ត។
ទី៣- ជូនដំណឹងព័ត៌មានធាតុអាកាសដល់អាជ្ញាធរ និងប្រជាពលរដ្ឋឱ្យប្រុងប្រយ័ត្ន ព្រមទាំងណែនាំឱ្យសន្សំសំចៃ និងរក្សាទឹកទុកសម្រាប់រដូវប្រាំង។

ទី៤- បន្តចុះអន្តរាគមន៍សង្គ្រោះស្រូវវស្សានៅតំបន់ប្រឈមការខ្វះទឹកឱ្យទាន់ពេលវេលា។

ទី៥- ជំរុញសហគមន៍កសិករប្រើប្រាស់ទឹក ឱ្យចូលរួមថែទាំប្រព័ន្ធធារាសាស្ត្រក្នុងមូលដ្ឋាន។

ទី៦- បណ្តុះបណ្តាលបច្ចេកទេសដល់ឆ្មាំទំនប់ លើការងារថែទាំប្រព័ន្ធធារាសាស្ត្រ ដើម្បីធានាប្រសិទ្ធភាព និងភាពធន់នៃហេដ្ឋារចនាសម្ព័ន្ធទឹក៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)