AKP ភ្នំពេញ ថ្ងៃទី៧ ខែកញ្ញា ឆ្នាំ២០២៦-- សាលាអនុគណខណ្ឌឫស្សីកែវ រសៀលថ្ងៃទី៧ ខែកញ្ញា ឆ្នាំ២០២៦ បានផ្តល់អំណោយជាគ្រឿងឧបភោគបរិភោគសរុបជាទឹកប្រាក់ជិត ៨លានរៀលដល់អនុសាខាកាកបាទក្រហមកម្ពុជាខណ្ឌឫស្សីកែវ ដើម្បីយកទៅចែកជូនដល់ពលរដ្ឋក្រីក្រខ្វះខាត និងជនរងគ្រោះនានានៅក្នុងខណ្ឌ ដោយក្នុងឱកាសនេះ ព្រះគ្រូរតនប្បជ្ជោតិ ខឹម សម្បត្តិ ព្រះអនុគណខណ្ឌឫស្សីកែវ និងជាព្រះចៅអធិការវត្តញាណរង្សីបានគូសបញ្ជាក់ថា នេះគឺជាការចែករំលែករវាងព្រះសង្ឃព្រះពុទ្ធសាសនាទៅកាន់ពលរដ្ឋដែលត្រូវការជំនួយដោយមិនរើសអើងជាតិសាសន៍ ឬសាសនាអ្វីឡើយ។

បើតាមព្រះអនុគណខណ្ឌឫស្សីកែវ អំណោយដែលបានផ្តល់ជូនអនុសាខាកាកបាទក្រហមកម្ពុជាខណ្ឌឫស្សីកែវនាពេលនេះ គឺបានមកពីការសន្សំទុករបស់ព្រះសង្ឃនៅតាមវត្តនានាក្នុងខណ្ឌឫស្សីកែវទាំង មូលបន្ទាប់ពីទទួលបានការឧបត្ថម្ភពីប្រជាពុទ្ធបរិស័ទ ដោយសាលាអនុគណខណ្ឌបានដាក់គោលដៅថា ត្រូវប្រគល់ជូនអនុសាខាកាកបាទក្រហមកម្ពុជាខណ្ឌឫស្សីកែវនៅរៀងរាល់៣ខែម្តង។

ក្នុងឱកាសនេះ លោក ជិន ប៊ុនធឿន អភិបាលខណ្ឌ និងជាប្រធានអនុសាខាកាកបាទក្រហមកម្ពុជាខណ្ឌឫស្សីកែវបានថ្លែងអំណរគុណយ៉ាងជ្រាលជ្រៅចំពោះបណ្តាវត្តទាំងឡាយក្នុងខណ្ឌឫស្សីកែវ ដែលតែងបានរួមគ្នាក្នុងការផ្តល់អំណោយទានដល់អនុសាខាកាកបាទក្រហមកម្ពុជាខណ្ឌ ដើម្បីបានយកទៅចែកបន្តដល់ពលរដ្ឋក្រីក្រខ្វះខាត ពលរដ្ឋរងគ្រោះដោយគ្រោះមហន្តរាយនានា ជាពិសេសពលរដ្ឋដែលបាន ភៀសសឹកមកពីព្រំដែនដោយសារតែការឈ្លានពានរបស់កងទ័ពថៃ ហើយកំពុងស្នាក់នៅជាបណ្តោះអាសន្ននៅក្នុងមូលដ្ឋានខណ្ឌរបស់លោក ដោយមកដល់ពេលបច្ចុប្បន្ននេះមានអ្នកខ្លះក៏បានវិលត្រឡប់ ទៅវិញទាំងគ្រួសារ អ្នកខ្លះវិលត្រឡប់ទៅវិញដែរតែទុកកូនចៅឱ្យស្នាក់នៅជាមួយបងប្អូន ដើម្បីសិក្សារៀនសូត្រ ដែលករណីនេះអាជ្ញាធរមូលដ្ឋានត្រូវយកចិត្តទុកដាក់ក្នុងការឧបត្ថម្ភដល់ពួកគេ ដើម្បីរួមចំណែកដល់ការកាត់បន្ថយនូវការខ្វះខាតសម្រាប់ជីវភាពរស់នៅប្រចាំថ្ងៃ។

លោកអភិបាលខណ្ឌបានបន្ថែមថា រាល់អំណោយដែលទទួលបានពីសប្បុរសជន សាលាខណ្ឌតែងតែធ្វើការលៃលក និងបែងចែកទៅកាន់យុទ្ធជននៅសមរភូមិមុខមួយចំណែក បើទោះបីជាបានដឹងថា យុទ្ធជននៅជួរមុខទទួលបាននូវការទំនុកបម្រុងគ្រប់គ្រាន់ពីរាជរដ្ឋាភិបាលយ៉ាងណាក៏ដោយចុះ ក៏យើងជាអ្នកនៅសមរភូមិក្រោយត្រូវតែផ្សាភ្ជាប់ជាមួយអ្នកនៅសមរភូមិមុខ ដើម្បីជាការផ្តល់កម្លាំងចិត្តដល់វីរកង ទ័ពរបស់យើងក្នុងការការពារបូរណភាពទឹកដីដោយស្មារតីអង់អាចក្លាហាន និងដោយភាពកក់ក្តៅដែលផ្តល់ជូនពីអ្នកនៅសមរភូមិក្រោយ។

សូមជម្រាបជូនថា អំណោយសាលាអនុគណខណ្ឌឫស្សីកែវដែលបានផ្តល់ជូនអនុសាខាកាកបាទក្រហមកម្ពុជាខណ្ឌឫស្សីកែវនាពេលនេះ រួមមាន អង្ករ មី ទឹកក្រូច ទឹកស៊ីអ៊ីវ ទឹកត្រី ត្រីខ ទឹកដោះគោ តែ ស្ករស ទឹកសុទ្ធ សម្ភារផ្ទះបាយ និងថវិកាប្រមាណ ៤លានរៀល ហើយបើសរុបទាំងគ្រឿងឧបភោគបរិភោគ និងថវិកាបញ្ចូលគ្នា គឺមានតម្លៃជិត៨លានរៀល៕

ដោយ៖ ចាន់ សុភឿន