AKP កំពង់ធំ ថ្ងៃទី២៦ ខែសីហា ឆ្នាំ២០២៦--នៅវិទ្យាស្ថានបច្ចេកវិទ្យាកំពង់ឈើទាល ស្រុកប្រាសាទសំបូរខេត្តកំពង់ធំកាលពីថ្ងៃទី២៥ ខែសីហាឆ្នាំ២០២៦ ក្រសួងទេសចរណ៍បានរៀបចំបើកសិក្ខាសិលាផ្សព្វផ្សាយអំពីវិថីអភិវឌ្ឍន៍ជំនាញ និងតម្រង់ទិសការសិក្សាជំនាញ វិជ្ជាជីវៈទេសចរណ៍ក្រោមប្រធានបទ "ជំនាញវិជ្ជាជីវៈទេសចរណ៍ជាអាយុជីវិតរបស់អ្នក" ក្រោមអធិបតីភាពរបស់ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងលោក ហាន កុសល្យ អភិបាលរងខេត្តកំពង់ធំ។

‎ឯកឧត្តម ប៉ិច សៀង នាយកវិទ្យាស្ថានបច្ចេកវិទ្យាកំពង់ឈើទាល បានលើកឡើងថា វិទ្យាស្ថាន មានសិស្សផ្នែកអប់រំបច្ចេកទេស កម្រិត១ - កម្រិត៣ សរុបចំនួន ៦៩០នាក់ (ស្រី ៣៣៥នាក់)ដែលកំពុងសិក្សាលើ៧ជំនាញ គឺជំនាញអគ្គិសនី អេឡិចត្រូនិក វិទ្យាសាស្ត្រកុំព្យូទ័រ គ្រប់គ្រងសណ្ឋាគារនិងទេសចរណ៍ ក្សេតសាស្ត្រ បសុវប្បកម្ម និងកែច្នៃអាហារ។ វិទ្យាស្ថានគឺជាគ្រឹះឧត្ដមសិក្សាសាធារណៈ ដែលផ្ដោតសំខាន់លើការបណ្ដុះបណ្ដាលបែបប្រតិបត្តិ ជាក់ស្ដែងលើ គ្រប់មុខជំនាញ ហើយទទួលបានអាហារូបករណ៍រដ្ឋ ១០០% មិនមានការបង់ថ្លៃសិក្សានោះទេ ដោយការចំណាយផ្សេងៗ នៃការប្រព្រឹត្តទៅរបស់វិទ្យាស្ថានគឺជាបន្ទុករបស់រាជរដ្ឋាភិបាលកម្ពុជា។

‎ជាមួយគ្នានេះដែរ លោក ហាន កុសល្យ បានលើកឡើងថា ការចាប់យកនូវជំនាញមួយពិតប្រាកដ គឺទាមទារឱ្យមានការស្វែងយល់អំពីសមត្ថភាពរបស់ខ្លួន ថាតើសំស្របជាមួយនឹងជំនាញដែលខ្លួនកំពុងតែចង់សិក្សានោះដែរឬទេ? ព្រោះបើគ្មានចំណេះដឹងនិងជំនាញ គឺយើងពិបាកក្នុងការរស់នៅជាមួយនឹងសង្គមបច្ចុប្បន្ន។ ហើយក្នុងនាមជាអាណាព្យាបាលត្រូវតែជំរុញកូនរៀនឱ្យបានចប់ចុងចប់ដើម កុំព្យាយាមយកលេសថាព្រោះតែកត្តាជីវភាពខ្វះខាត ទើបឱ្យកូនឈប់រៀន។ ការសិក្សាអប់រំរៀនសូត្រគឺមាននៅគ្រប់ទីកន្លែង ក៏ប៉ុន្តែសមត្ថភាពហើយ និងលទ្ធភាព គឺអាស្រ័យទៅលើបុគ្គលម្នាក់ៗ។ លោកអភិបាលរងខេត្តបានបន្ថែមទៀតថា បញ្ហាសុខភាពក៏ជាគ្រឹះដ៏សំខាន់មួយផងដែរ ប្រសិនបើយើងមានតែចំណេះ ហើយបញ្ហាសុខភាពរបស់យើងមិនល្អក៏មិនអាចចូលរួមចំណុចក្នុងការអភិវឌ្ឍន៍ប្រទេសជាតិបានដែរ។

‎ឯកឧត្តម ប៉ាក់ សុខុម បានគូសបញ្ជាក់ថា វិស័យទេសចរណ៍ ត្រូវបានចាត់ទុកជា វិស័យអាទិភាពដើរតួនាទីជា "មាសបៃតង" រួមចំណែកដល់ការអភិវឌ្ឍន៍សេដ្ឋកិច្ចនិងសង្គម។ ដូច្នេះ ក្រសួងទេសចរណ៍ បាននឹងកំពុងយកចិត្តទុកដាក់ខ្ពស់ ដល់ការអភិវឌ្ឍមូលធនមនុស្សក្នុងវិស័យទេសចរណ៍ និងបានដាក់ចេញនូវយុទ្ធនាការ" បុគ្គលិកម្នាក់ ជំនាញមួយនិងជំនាញឌីជីថលបន្ថែម"។ ចក្ខុវិស័យនេះគឺរំពឹងថានឹងលើកកម្ពស់ការអភិវឌ្ឍមូលធនមនុស្ស ក្នុងវិស័យទេសចរណ៍ប្រកបដោយ សមត្ថភាព  គុណភាព គុណធម៌ បរិមាណ និងសុខុមាលភាព ឆ្លើយតបទៅនឹងតម្រូវការឧស្សាហកម្មទេសចរណ៍ សម្រាប់ឆ្នាំ២០២៦-២០៣៥។

ឯកឧត្តម ប៉ាក់ សុខុម បានបញ្ជាក់បន្ថែមថា ដើម្បីទាក់ទាញភ្ញៀវទេសចរឱ្យមកទស្សនានៅតំបន់យើងបាន លុះត្រាតែយើងដែលជាអ្នកបន្តវេន ត្រូវតែមានជំនាញ ទេសចរណ៍ឱ្យបានច្បាស់លាស់ ជ្រើសរើសជំនាញសិក្សាប្រកបដោយ ឧបនិស្ស័យនិងសមត្ថភាព។ សូមជ្រើសរើសវិថីដែលយើងត្រូវដើរដោយខ្លួនឯង ហើយខិតខំព្យាយាមសិក្សាដើម្បីសម្រេចគោលដៅ៕

ដោយ ស៊ុម វណ្ណា