AKP ភ្នំពេញ ថ្ងៃទី២៣ ខែសីហា ឆ្នាំ២០២៦-- មន្ដ្រីជំនាញសុខាភិបាលបានធ្វើការអំពាវនាវដល់គ្រប់ស្ថាប័ន វិស័យឯកជន និងគ្រប់ពហុវិស័យ ក្នុងការបង្ការឆ្លងមេរោគអេដស៍ជំងឺអេដស៍ដល់យុវជនសារធារណជនទូទៅ។
លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានធ្វើការអំពាវនាវបែបនេះនៅក្នុងពិធីបើកយុទ្ធនាការផ្សព្វផ្សាយ ជំរុញការប្រើប្រាស់ស្រោមអនាម័យ ឱ្យបាន១០០ភាគរយ និងបង្ក្រាបការយល់ដឹងពីវិធានការបង្ការ ការឆ្លងមេរោគអេដស៍ ជំងឺអេដស៍ និងជំងឺកាមរោគ នៅលើផ្លូវថ្មើរជើងចតុមុខ កាលពីរសៀលថ្ងៃទី២២ ខែសីហា ឆ្នាំ២០២៦។

លោក ងី មានហេង បានបញ្ជាក់ថា កម្ពុជាត្រូវបានអង្គការសហប្រជាជាតិ ប្រកាសទទួលស្គាល់ជាប្រទេស ក្នុងតំបន់អាស៊ី ប៉ាស៊ីហ្វិក ទទួលបានជោគជ័យ ក្នុងការ សម្រេចបានគោលដៅ ៩៥-៩៥-៩៥ មុនកាលកំណត់ជាជោគជ័យ នៃការឆ្លើយតបមេរោគអេដស៍នៅកម្ពុជាទោះជា យ៉ាងណា យើងទាំងអស់គ្នានៅតែបន្តបេសកកម្ម និងរក្សាសមិទ្ធផល ដែលទទួលបានជារៀងរហូត។ លទ្ធផលនេះជាភស្តុតាងស្តែងចេញពីប្រសិទ្ធភាពនៃការដឹកនាំ និងការអនុវត្តគោលនយោបាយរបស់កម្ពុជា។ យុទ្ធនាការនេះធ្វើឡើងដើម្បីជំរុញឱ្យប្រើប្រាស់ស្រោមអនាម័យ១០០ភាគរយ និងបញ្ជ្រាបការយល់ដឹង ពីវិធានការបង្ការការឆ្លងមេរោគអេដស៍ ជំងឺអេដស៍ ទៅដល់បងប្អូន យុវជន សារធារណជនទូទៅ ឱ្យយយល់ច្បាស់ ពីហានិភ័យនៃមេរោគអេដស៍ ចូលរួមក្នុងការបង្ការទប់ស្កាត់ ការចម្លងមេរោគអេដស៍ ពីដៃគូរួមភេទ ដោយជម្រុញអោយប្រើប្រាស់ ស្រោមអនាម័យឱ្យបាន១០០ភាគរយ រួមនិងវិធីសាស្ត្របង្ការផ្សេងៗទៀត មានឱសថ PrEP PEP។ ប្រសិនបើសង្ស័យផ្ទុកមេរោគអេដស៍ សូមទៅធ្វើតេស្តរកមេរោគអេដស៍ នៅមន្ទីរពេទ្យ មណ្ឌលសុខភាព អង្គការជាដៃគូតាមសហគមន៍ និងអាចកក់យកកញ្ចប់ ធ្វើតេស្តដោយខ្លួនឯង តាមFood Panda ដែលដឹកជូនដល់ទីតាំងបាន។ ស្រោមអនាម័យ អាចបង្ការការឆ្លងមេរោគអេដស៍ កាមរោគ និងការមានផ្ទៃពោះដោយចៃដន្យ។

លោក ពេញ ធារម្យ អភិបាលរងរាជធានីភ្នំពេញ តំណាងឯកឧត្តម ឃួង ស្រេង អភិបាលរាជធានីភ្នំពេញ និងជាប្រធានគណៈកម្មាធិការប្រយុទ្ធនឹងជំងឺអេដស៍រាជធានីភ្នំពេញ បាន បញ្ជាក់ថា កត្តាជោគជ័យសម្រេចគោលដៅ ៩៥-៩៥-៩៥ មុនកាលកំណត់ បានមកពីការឆ្លើយតបរួមគ្នា ជាពហុវិស័យព្រមៗគ្នាជាធ្លុងមួយ រួមកម្លាំងគ្នា បង្កើតជាចរន្តជាតិតែមួយ ទប់ស្កាត់ការរីករាលដាលមេរោគអេដស៍ និងឈានទៅបញ្ចប់អេដស៍ ស្របតាមគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣- ២០២៨។ ជាមួយគ្នានេះ ត្រូវរួមគ្នាលប់បំបាត់ការមាក់ងាយរើសអើង ដល់អ្នកផ្ទុកមេរោគអេដស៍ ដែលជាសារមួយមានឥទ្ធិពលបំផុត ក្នុងការបង្ការទប់ស្កាត់ការរីករាលដាលមេរោគអេដស៍។

លោកបានបញ្ជាក់ថា “រាជរដ្ឋាភិបាលក្នុងអាណត្តិទី៧នៃរដ្ឋសភា នៅតែបន្តចាត់ទុកការឆ្លើយតបមេរោគអេដស៍ និងជំងឺអេដស៍ ជាការងារអាទិភាព ខ្ញុំសូមអំពាវនាវឱ្យចូលរួមជាធ្លុងមួយ បង្ការទប់ស្កាត់ការរីករាលដាល មេរោគអេដស៍ជំងឺអេដស៍ តាមរយៈពង្រឹង និងពង្រីកការអប់រំផ្សព្វផ្សាយ អំពីមេរោគអេដស៍ ជំងឺអេដស៍ឱ្យបានទូលំទូលាយ ដល់ប្រជាជនទូទៅស្ត្រីមានផ្ទៃពោះក្រុមប្រឈមជាពិសេស ក្រុមយុវវ័យ ឱ្យយល់ដឹងពីហានិភ័យ នៃការចម្លងមេរោគអេដស៍ និងប្រញាប់ធ្វើតេស្តរកមេរោគអេដស៍ ឱ្យទាន់ពេលវេលា ក្នុងករណីមានការសង្ស័យ នៅតាមមូលដ្ឋានសុខាភិបាល និងនៅសហគមន៍ ចូលរួមលុបបំបាត់ការមាក់ងាយរើសអើង បញ្ជ្រាបការយល់ដឹងមេរោគអេដស៍ ជំងឺអេដស៍”។

លោក ទា ផល្លា អនុប្រធានអាជ្ញាធរជាតិ ប្រយុទ្ធប្រឆាំងជំងឺអេដស៍ បានបញ្ជាក់ថា រដ្ឋបាលរាជធានីភ្នំពេញ បានអនុញ្ញាតឱ្យធ្វើយុទ្ធនាការខាងលើនេះ គឺជាការរំលឹកឡើងវិញ ដើម្បីឆ្លើយតបនូវបំណងប្រាថ្នារបស់សម្តេចមហាបវរធិបតី ហ៊ុន ម៉ាណែតថា ត្រូវបញ្ចប់អេដស៍ ក្នុងឆ្នាំ២០៣០ មានន័យថា បន្ថយពី៣នាក់ មកត្រឹមម្នាក់ ដោយប្រើប្រាស់ស្រោមអនាម័យ ឱ្យបានទៀងទាត់ ខណៈកន្លងមកនេះ ដោយសារតែការប្រើស្រោមអនាម័យ អាចបញ្ជៀសការចម្លងមេរោគអេដស៍ បានច្រើនណាស់ រហូតទៅដល់កន្លះលាននាក់ គឺមិនឆ្លងអេដស៍ទេ ដែលជាពិតជាជោគជ័យខ្លាំងមែនទែន ។ បន្ទាប់ពីកម្ពុជា ទទួលបានចំណាត់ថ្នាក់លេខ៩ នៅទូទាំងពិភពលោក ក្នុងការប្រយុទ្ធប្រឆាំងនឹងជំងឺអេដស៍។ ព្រះរាជាណាចក្រកម្ពុជា បានដាក់ ចេញគោលដៅ ៩៥.៩៥.៩៥ នៅឆ្នាំ២០៣០ មានន័យថា៩៥%ទី១ នៃអ្នកផ្ទុកមេរោគអេដស៍ ត្រូវបានធ្វើរោគវិនិច្ឆ័យ ។ ៩៥%ទី២ នៃអ្នកដែលបានធ្វើរោគវិនិច្ឆ័យ បានទទួលសេវាព្យាបាល ដោយឱសថប្រឆាំងមេរោគអេដស៍ ៩៥%ទី៣ នៃអ្នកបានទទួលសេវាព្យាបាល ដោយឱសថប្រឆាំងមេរោគអេដស៍ មានបន្ទុកមេរោគអេដស៍ត្រូវបានបង្ក្រាប។

សូមបញ្ជាក់ថា ប្រទេសកម្ពុជារកឃើញមេរោគអេដស៍ ជាលើកដំបូងនៅឆ្នាំ១៩៩១។ នៅសម័យនោះប្រជា ជន មិន ទាន់មានការយល់ដឹង ពីមេរោគអេដស៍នៅឡើយ។ ក្រោម ម្លប់សន្តិភាព និងប្រកបដោយការអភិវឌ្ឍជាប់ជាប្រចាំ ក្នុង រយៈពេលជាង៣០ឆ្នាំនេះកម្ពុជា បានឆ្លើយតបការរីករាលនៃមេរោគអេដស៍ប្រកបដោយជោគជ័យ៕

ដោយ សួស សំរិត