AKP បន្ទាយមានជ័យ ថ្ងៃទី២៣ ខែសីហា ឆ្នាំ២០២៦-- រាជរដ្ឋាភិបាលកម្ពុជាតាមរយៈក្រសួងកសិកម្ម រុក្ខាប្រមាញ់ និងនេសាទ កំពុងបង្កើនល្បឿនយ៉ាងសកម្មក្នុងការអនុវត្តវិធានការអន្តរាគមន៍ផ្ទាល់ ដើម្បីលើកកម្ពស់កម្រិតជីវភាពប្រជាពលរដ្ឋនៅតាមមូលដ្ឋាន ឆ្លើយតបទៅនឹងបញ្ហាចំពោះមុខ និងកាត់បន្ថយភាពងាយរងគ្រោះសេដ្ឋកិច្ច។

នៅក្នុងជំនួបពិភាក្សាការងារជាមួយមន្ត្រីជំនាញ និងអាជ្ញាធរមូលដ្ឋានស្រុកអូរជ្រៅ ខេត្តបន្ទាយមានជ័យ កាលពីថ្ងៃទី២២ ខែសីហា ឆ្នាំ២០២៦ ឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការស្វែងរកដំណោះស្រាយជាក់ស្តែង និងមានប្រសិទ្ធភាពខ្ពស់ជូនប្រជាពលរដ្ឋ។ ឯកឧត្តមបានដឹកនាំការប្រជុំដោយផ្ទាល់ ដើម្បីពន្លឿនការរៀបចំគម្រោង «លើកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER)» ឱ្យចេញជាលទ្ធផលឆាប់រហ័ស។

ខ្លឹមសារសំខាន់ៗនៃគម្រោង EMPOWER គោលដៅចម្បង ផ្តោតលើការជួយជ្រោមជ្រែងគ្រួសារក្រីក្រ និងងាយរងគ្រោះ ឱ្យមានលទ្ធភាពបង្កើតមុខរបរកសិកម្មដែលអាចប្រមូលផលក្នុងរយៈពេលខ្លី។ ផលប្រយោជន៍ចំពោះមុខ ធានាឱ្យបាននូវការបង្កើតប្រាក់ចំណូលជាប្រចាំថ្ងៃ ឬប្រចាំខែ ដើម្បីទ្រទ្រង់សេដ្ឋកិច្ចគ្រួសារ និងពង្រឹងសន្តិសុខស្បៀងនៅតាមសហគមន៍។ ការបង្កើតភាពធន់ បង្កើនសមត្ថភាពពលរដ្ឋឱ្យចេះបត់បែន និងមានភាពធន់មាំទល់នឹងវិបត្តិសេដ្ឋកិច្ច ឬការប្រែប្រួលអាកាសធាតុ។

បច្ចុប្បន្ន គម្រោង EMPOWER កំពុងត្រូវបានពង្រីក និងគ្របដណ្តប់លើក្រុង-ស្រុកគោលដៅចំនួន ៣១ នៅក្នុងខេត្តចំនួន ១៦ នៅទូទាំងប្រទេស ដែលជាសក្ខីភាពបង្ហាញយ៉ាងច្បាស់ពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាល ក្នុងការមិនបោះបង់ចោលប្រជាពលរដ្ឋណាម្នាក់ និងការប្រែក្លាយវិស័យកសិកម្មឱ្យទៅជាសសរទ្រូងដ៏រឹងមាំសម្រាប់ទ្រទ្រង់ជីវភាពប្រជាជននៅកម្ពុជា៕

ដោយ ឈុន សារ៉ាត