AKP ភ្នំពេញ ថ្ងៃទី២០ ខែសីហា ឆ្នាំ២០២៦--ដោយទទួលតាមការចង្អុលបង្ហាញដ៏ខ្ពង់ខ្ពស់ពីឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធាន លោក យ៉ាន់ សំរិទ្ធ ប្រធាននាយកដ្ឋាន រួមជាមួយមន្ត្រីនាយកដ្ឋាននីតិកម្ម និងផ្សព្វផ្សាយនៃអាជ្ញាធរទន្លេសាប នៅថ្ងៃទី១៩ ខែសីហា ឆ្នាំ២០២៦ បានបន្តចុះប្រជុំផ្សព្វផ្សាយបញ្ជ្រាបការយល់ដឹងពីបទដ្ឋានគតិយុត្តពាក់ព័ន្ធការការពារ ថែរក្សា គ្រប់គ្រង និងអភិរក្សដែនព្រៃលិចទឹក និងព្រៃលិចទឹកតំបន់៣ បឹងទន្លេសាប ក្នុងភូមិសាស្រ្តឃុំព្រែកលួង ស្រុកឯកភ្នំ និងបានបន្តជួបពិភាក្សាស្វែងយល់ពីវិវាទទំនាស់អត្ថប្រយោជន៍ពីការប្រើប្រាស់ដីធ្លី និងធនធានធម្មជាតិ ស្រុកសង្កែ ខេត្តបាត់ដំបង។

កិច្ចប្រជុំផ្សព្វផ្សាយនេះមានគោលបំណងផ្ដោតសំខាន់ចំនួនពីរគឺ៖ ទី១. បង្កើនការយល់ដឹងទៅកាន់ប្រជាពលរដ្ឋឱ្យមានការចូលរួមការពារ ថែរក្សា និងគ្រប់គ្រងធនធានធម្មជាតិ ជីវចម្រុះ និងព្រៃលិចនិងទី២. សំដៅធានាឱ្យបាននូវការគ្រប់គ្រងធនធានធម្មជាតិ ជីវចម្រុះ ដែនព្រៃលិចទឹក និងព្រៃលិចទឹក នៅក្នុងតំបន់ជុំវិញ បឹងទន្លេសាបប្រកបដោយនិរន្តរភាព។

កិច្ចប្រជុំផ្សព្វផ្សាយនេះដោយមានការអញ្ជើញចូលរួមពីអភិបាលរងស្រុកឯកភ្នំ ព្រមទាំងមេឃុំ ជំទប់ឃុំ ក្រុមប្រឹក្សាឃុំ មេភូមិ អនុភូមិ មន្ត្រីនគរបាលប៉ុស្តិ៍ តំណាងសហគមន៍នេសាទ រំាងពេន ៣ត និងប្រជាពលរដ្ឋរស់នៅក្នុងឃុំព្រែកហ្លួង ស្រុកឯកភ្នំ ខេត្តបាត់ដំបង៕

ដោយ ណយ នឿន (ប្រភព៖ អាជ្ញាធរទន្លេសាប)