AKP តាកែវ ថ្ងៃទី២០ ខែសីហា ឆ្នាំ២០២៦--លោក សាយ វណ្ណៈ អភិបាលនៃគណៈអភិបាលស្រុកបាទី បានជួបសំណេះសំណេះសំណាលជាមួយថ្នាក់ដឹកនាំ មន្ត្រីរាជការ ប៉ុស្ដិ៍នគរបាលរដ្ឋបាលនៃរដ្ឋបាលឃុំត្នោត ដោយមានការអញ្ជើញចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ រដ្ឋបាលស្រុកបាទី មេឃុំ ជំទប់ ក្រុមប្រឹក្សាឃុំត្នោត មន្ត្រីប៉ុស្ដិ៍នគរបាលរដ្ឋបាលឃុំត្នោត ស្រីនាយកសាលាក្នុងឃុំត្នោត មន្ត្រីសុខាភិបាលមណ្ឌលសុខភាពត្នោត មន្ត្រីរាជការរដ្ឋបាលឃុំត្នោត មេភូមិ អនុភូមិ និងសមាជិកភូមិ ចូលរួមជាច្រើនរូបផងដែរ។ពិធីនេះរៀបចំឡើងនៅសាលាឃុំត្នោតស្រុកបាទីខេត្តតាកែវ កាលពីថ្ងៃទី១៩ ខែសីហា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ លោក សាយ វណ្ណៈ បានធ្វើការណែនាំដល់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធនៃ រដ្ឋបាលឃុំត្នោតទាំងអស់ ត្រូវចូលរួមសហការពង្រឹងសាមគ្គីភាពឯកភាពផ្ទៃក្នុង និងពង្រឹងរបៀបរបបធ្វើការងារ។ ត្រូវទំនាក់ទំនងការងារឱ្យបានល្អ នៅក្នុងមូលដ្ឋានឃុំ-ភូមិ ក្នុងដែនសមត្ថកិច្ចរបស់ខ្លួន។ដោយឈរលើមូលដ្ឋាននៃការលើកកម្ពស់ប្រសិទ្ធភាព និងធានានិរន្តរភាពការងាររបស់ខ្លួន ឱ្យកាន់តែមានភាពល្អប្រសើរ។

លោក សាយ វណ្ណៈ បានមានប្រសាសន៍បន្តថា ត្រូវខិតខំបំពេញការងារនិងបម្រើសេវាសាធារណៈ ជូនបងប្អូនប្រជាពលរដ្ឋនៅក្នុងមូលដ្ឋាន ឱ្យបានលឿន រហ័ស ទាន់ពេលវេលា និងនៅគ្រប់ទីកន្លែង។ដើម្បីឆ្លើយតបទៅនឹងតម្រូវការចាំបាច់ របស់បងប្អូនប្រជាពលរដ្ឋ។ត្រូវខិតខំបំពេញការងារ បម្រើប្រជាពលរដ្ឋក្នុងមូលដ្ឋាន ដែលខ្លួនគ្រប់គ្រងឱ្យបានល្អប្រសើរ ប្រកបដោយប្រសិទ្ធភាព និងទំនួលខុសត្រូវខ្ពស់។

លោកបានបន្ថែមថា ត្រូវខិតខំបំពេញការងារបម្រើប្រជាពលរដ្ឋឱ្យអស់ពីសមត្ថភាព ជាពិសេសរាល់សំណើឬតម្រូវការរបស់ប្រជាពលរដ្ឋ ត្រូវតែចុះដោះស្រាយឱ្យបានឆាប់រហ័ស តាម ដែលអាចធ្វើទៅបាន។ហើយរាល់ការផ្តល់សេវាទាំងអស់ ត្រូវតែត្រឹមត្រូវតាមនីតិវិធីច្បាប់ និងលក្ខខណ្ឌតម្រូវ។ដើម្បីជៀសវាងកំហុសឆ្គង ដែលអាចនាំឱ្យប៉ះពាល់ដល់ប្រជាពលរដ្ឋ។

លោកអភិបាលស្រុកបាទីក៏បានធ្វើការក្រើនរំលឹកដល់អាជ្ញាធរឃុំ-ភូមិ និងកងកម្លាំងសមត្ថកិច្ចទាំងអស់ត្រូវរួមសហការគ្នា លុបបំបាត់នូវអំពើអសកម្មនានា និងធ្វើការទប់ស្កាត់ការប្រើប្រាស់ ការចែកចាយ និងការជួញដូរគ្រឿងញៀន ល្បែងស៊ីសង ក្មេងទំនើង និងបទល្មើសផ្សេងៗ នៅក្នុងមូលដ្ឋានរបស់ខ្លួន។ត្រូវបន្តអនុវត្តគោនយោបាយ "ភូមិ ឃុំ សង្កាត់ មានសុវត្ថិភាព" ប្រកបដោយស្មារតីទទួលខុសត្រូវខ្ពស់។ដើម្បីធ្វើយ៉ាងណាឱ្យមូលដ្ឋានរបស់យើង មានសុខសុវត្ថិភាព និងនាំឱ្យបងប្អូនប្រជាពលរដ្ឋមានជំនឿជឿជាក់ លើការដឹកនាំរបស់អាជ្ញាធរ និងរាជរដ្ឋាភិបាល៕

ដោយ អ៊ុច សៀង