AKP ភ្នំពេញ ថ្ងៃទី២១ ខែសីហា ឆ្នាំ២០២៦--វិមានសាមគ្គីភាពនៃព្រឹទ្ធសភា ដែលទើបបញ្ចប់ការសាងសង់ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមព្រះរាជាធិបតីដ៏ខ្ពង់ខ្ពស់បំផុត ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាព្រឹកថ្ងៃទី២១ ខែសីហា ឆ្នាំ២០២៦ ដោយក្នុងឱកាសនេះ ឯកឧត្តម ប្រាក់ សុខុន ឧបនាយករដ្ឋមន្ត្រី ប្រធានគណៈកម្មការទទួលបន្ទុកដឹកនាំសាងសង់វិមានសាមគ្គីភាពនៃព្រឹទ្ធសភាបានកលើកឡើងថា សំណង់អគារថ្មីនៃព្រឹទ្ធសភានេះត្រូវបានស្ថាបនាឡើងក្រោមគំនិតផ្ដួចផ្ដើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដើម្បីឆ្លើយតបទៅនឹងការពង្រឹងតួនាទី និងកំណើនការងារ ការលើកកម្ពស់ប្រសិទ្ធភាព គុណភាព និងចីរភាពនៃស្ថាប័នព្រឹទ្ធសភា ព្រមទាំងឆ្លើយតបទៅនឹងការអនុវត្តអាទិភាពចម្បងទាំងពីររបស់ព្រឹទ្ធសភានីតិកាលទី៥ ដែលបានដាក់ចេញដោយសម្តេចតេជោប្រធានព្រឹទ្ធសភាគឺ៖ ការលើកកម្ពស់ការទូតសភា និងការរួមប្រាស័យឱ្យកាន់តែជិតស្និទ្ធបន្ថែមទៀតជាមួយអង្គបោះឆ្នោតដែលតំណាងឱ្យប្រជាពលរដ្ឋនៅមូលដ្ឋាន។

ថ្លែងក្នុងព្រះរាជពិធីសម្ពោធដាក់ឱ្យប្រើប្រាស់វិមានសាមគ្គីភាព (អគារថ្មីនៃព្រឹទ្ធសភា) នាថ្ងៃទី២១ ខែសីហា ឆ្នាំ២០២៦ ឯកឧត្តម ឧបនាយករដ្ឋមន្ត្រី ប្រាក់ សុខុន បានគូសបញ្ជាក់ថា ក្នុងពេលដែលវិមានសាមគ្គីភាពនៅបំពេញតួនាទីជាការិយាល័យធ្វើការរបស់ថ្នាក់ដឹកនាំព្រឹទ្ធសភា និងជាទីកន្លែងទទួលភ្ញៀវឥស្សរជនជាន់ខ្ពស់ជាតិ និងបរទេសនានានោះ អគារកេរដំណែលវិមានរដ្ឋចំការមន ឬហៅថា «អគារក្រហម» ដែលជាកេរមរតក និងស្នាព្រហស្តដ៏ថ្លៃថ្លាបំផុតរបស់ព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុតនោះ នឹងបន្តរក្សាតួនាទីដ៏សំខាន់ខ្ពង់ខ្ពស់ជាមជ្ឈមណ្ឌលសម្រាប់សម័យប្រជុំពេញអង្គព្រឹទ្ធសភា ដើម្បីពិនិត្យ និងឱ្យយោបល់លើសេចក្តីព្រាងច្បាប់ ឬសេចក្តីស្នើច្បាប់ ឬបញ្ហាទាំងពួងឈរលើមូលដ្ឋានគ្រឹះដ៏រឹងមាំនៃការបង្រួបបង្រួមជាតិ ឯកភាពជាតិ និងសាមគ្គីភាពជាតិ។ ឯកឧត្ដមឧបនាយករដ្ឋមន្រ្ដីបានលើកឡើងថា ការប្រសិទ្ធនាមអគារថ្មីនេះដោយសម្តេចតេជោប្រធានព្រឹទ្ធសភាជា «វិមានសាមគ្គីភាព» ពិតជាមានអត្ថន័យប្រវត្តិសាស្ត្រ និងនយោបាយដ៏ជ្រាលជ្រៅ។ 

ជាមួយគ្នានេះ ឯកឧត្តមឧបនាយករដ្ឋមន្រ្ដីបានបន្ថែមថា ជាមួយនឹងវិមានសន្តិភាព និងវិមានមិត្តភាព វិមានថ្មីនេះនឹងរួមផ្សំជានិមិត្តរូបនៃមុំសន្តិភាព មិត្តភាព និងសាមគ្គីភាព ដែលជាមូលដ្ឋានគ្រឹះចាំបាច់សម្រាប់ស្ថិរភាព វិបុលភាព និងការអភិវឌ្ឍប្រកបដោយចីរភាព។ ទន្ទឹមនេះ វិមានសាមគ្គីភាពក៏ជាសក្ខីភាពនៃកម្លាំងមហាសាមគ្គីក្នុងស្មារតីជាតិខ្មែរតែមួយ សាមគ្គីភាពរវាងរដ្ឋ និងវិស័យឯកជន និងជាសមិទ្ធផលរបស់កូនខ្មែរសុទ្ធសាធ ដែលទាំងអ្នកគូរប្លង់ អ្នកសាងសង់ និងអ្នកជួយឧបត្ថម្ភថវិកា គឺជាខ្មែរទាំង

អស់។

ក្នុងនាមសម្តេចតេជោប្រធានព្រឹទ្ធសភា ឯកឧត្តម ឧបនាយករដ្ឋមន្ត្រី ប្រាក់ សុខុន បានថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ដែលបានចូលរួមវិភាគទាននៅក្នុងការស្ថាបនាវិមានសាមគ្គីភាពនេះសម្រាប់ប្រើប្រាស់ជាឧត្តមប្រយោជន៍ជាតិនាពេលបច្ចុប្បន្ន ក៏ដូចជាសម្រាប់អ្នកជំនាន់ក្រោយៗទៀត។

ឯកឧត្តមឧបនាយករដ្ឋមន្រ្ដីក៏បានឱ្យដឹងទៀតថា វិមានសាមគ្គីភាពនេះ ត្រូវបានសាងសង់ឡើងក្នុងរយៈពេល ១៨ខែ មានផ្ទៃក្រឡាសរុប ២២,០០០ ម៉ែត្រការ៉េ ដោយមិនរាប់ផ្ទៃក្រឡាសួន និងក្រាលក្រានីត ៥,០០០ ម៉ែត្រការ៉េទៀតផង។ អគារនេះមានបណ្ដោយ ៧៩ម៉ែត្រ ទទឹង ៤៧ម៉ែត្រ កម្ពស់ ៣៥ម៉ែត្រ និងមាន ៤ជាន់កន្លះ ដែលដំបូលរៀបស្មើរបស់អគារប្រើប្រាស់ជាព្រលានឧទ្ធម្ភាគចក្រ។ ក្រៅពីនេះ រចនាបថខាងក្រៅនៃវិមានសាមគ្គីភាពជាប្រភេទស្ថាបត្យកម្មសហសម័យលាយបញ្ចូលគ្នារវាងស្ថាបត្យកម្មនៃរចនាបថខ្មែរ និងកូឡូនីយ៉ាល់ (Colonial) ជាមួយនឹងការគិតគូររចនាយ៉ាងហ្មត់ចត់ទៅលើគ្រឿងលម្អ តួយ៉ាង បាំងខ្លែងលើដំបូល ធារ៉ាស់ (Terrasse) ផ្នែកខាងមុខ ដែលត្រូវបានស្រង់គំនិតចេញពីប្រាសាទបុរាណខ្មែរជាដើម៕

ដោយ៖ ចាន់ សុភឿន