AKP ភ្នំពេញ ថ្ងៃទី១៩ ខែសីហា ឆ្នាំ២០២៦

ឯកឧត្តម នេត្រ ភក្រ្ដា រដ្ឋមន្ត្រីក្រសួងព័ត៌មានបានណែនាំដល់អ្នកសារព័ត៌មាន គួរចៀសវាងការផ្សព្វផ្សាយខ្លឹមសារ រូបភាព ឬព័ត៌មានដែលបន្ទាបបន្ថោកស្ត្រី ធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ និងតម្លៃរបស់ស្ត្រី ហើយគួររួមគ្នាផ្សព្វផ្សាយខ្លឹមសារដែលលើកតម្កើងស្ត្រីខ្មែរ សីលធម៌ល្អ និងវប្បធម៌ដ៏ផូរផង់របស់ជាតិ។

ការណែនាំរបស់ឯកឧត្ដមរដ្ឋមន្រ្ដីបែបនេះ ក្នុងពិធីជួបសំណេះសំណាល និងតម្រង់ទិសការងារផ្សព្វផ្សាយជាមួយអង្គភាពសារព័ត៌មាន និងអ្នកអនុវត្តសកម្មភាពការងារក្នុងវិស័យព័ត៌មាន និងសោតទស្សន៍ ដើម្បីពង្រឹងការអនុវត្តក្រមសីលធម៌វិជ្ជាជីវៈ និងលើកកម្ពស់ការផ្សព្វផ្សាយព័ត៌មានប្រកបដោយការទទួលខុសត្រូវ នាព្រឹកថ្ងៃទី១៩ ខែសីហា ឆ្នាំ២០២៦ នៅសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន នៃទីស្តីការក្រសួងព័ត៌មាន។

ឯកឧត្តម នេត្រ ភក្រ្ដា បានថ្លែងបញ្ជាក់ថា ការផ្សព្វផ្សាយព័ត៌មានមិនត្រឹមតែមានគោលដៅទាក់ទាញការចាប់អារម្មណ៍របស់អ្នកទស្សនា ឬអ្នកអានប៉ុណ្ណោះទេ ប៉ុន្តែត្រូវគិតគូរពីផលប៉ះពាល់ នៃខ្លឹមសារទាំងនោះចំពោះបុគ្គល គ្រួសារ និងសង្គមទាំងមូល។ ឯកឧត្តមរដ្ឋមន្រ្ដីបានជំរុញឱ្យអង្គភាពសារព័ត៌មាន និងអ្នកសារព័ត៌មានចូលរួមផ្សព្វផ្សាយខ្លឹមសារដែលមានប្រយោជន៍ដល់សង្គម លើកស្ទួយវប្បធម៌ ប្រពៃណី និងអត្តសញ្ញាណជាតិ ព្រមទាំងលើកកម្ពស់តម្លៃ និងសេចក្តីថ្លៃថ្នូររបស់ស្ត្រីខ្មែរ។

ជាមួយគ្នានេះ ឯកឧត្តមរដ្ឋមន្ត្រីក៏បានអំពាវនាវដល់អ្នកសារព័ត៌មាន និងអ្នកផលិតមាតិកាព័ត៌មានទាំងអស់ ចូលរួមជាមួយក្រសួងព័ត៌មាន និងរាជរដ្ឋាភិបាល ក្នុងការបង្កើតបរិយាកាសព័ត៌មានប្រកបដោយវិជ្ជាជីវៈ សីលធម៌ និងការទទួលខុសត្រូវ ដោយផ្តោតលើការផ្សព្វផ្សាយព័ត៌មានដែលមានប្រយោជន៍ និងរួមចំណែកដល់ការអភិវឌ្ឍសង្គម។

ឯកឧត្តមរដ្ឋមន្ត្រីក្រសួងព័ត៌មានរំពឹងថា អង្គភាពសារព័ត៌មាន និងអ្នកសារព័ត៌មានទាំងអស់ នឹងបន្តពង្រឹងស្មារតីវិជ្ជាជីវៈ ប្រកាន់ខ្ជាប់នូវក្រមសីលធម៌ និងចូលរួមកសាងសង្គមព័ត៌មានដែលមានគុណភាព ពោរពេញដោយការទទួលខុសត្រូវ និងការគោរពចំពោះតម្លៃមនុស្ស សីលធម៌ វប្បធម៌ និងប្រពៃណីដ៏ល្អផូរផង់របស់កម្ពុជា៕

ដោយ៖ រិទ្ធី, រូបថត៖ ខឹម សុវណ្ណារ៉ា