AKP ភ្នំពេញ ថ្ងៃទី ១៨ ខែសីហា ឆ្នាំ២០២៦--

បន្ទាប់ពីបញ្ចប់បេសកកម្មរួមគ្នា កម្ពុជា និងក្រុមអឺរ៉ុប (TeamEurope)បានចេញសេចក្តីប្រកាសរួមមួយទៅកាន់បណ្តាខេត្តនៅភាគឦសាន ដើម្បីរំលេច អំពីលទ្ធផលនៃភាពជាដៃគូ ក្នុងវិស័យកសិកម្មប្រកបដោយនិរន្តភាព ការអភិរក្ស ជីវចម្រុះ និងការធ្វើពាណិជ្ជកម្មផលិតផលកសិកម្ម កាន់តែមាននិរន្តរភាព ចាប់ពីថ្ងៃទី១៧ដល់ថ្ងៃទី ១៨ ខែ សីហា ឆ្នាំ ២០២៦។

គួរបញ្ជាក់ផងដែរថា ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ រួមជាមួយនឹង ឯកឧត្តម អ៊ុហ្គូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា បានដឹកនាំគណៈ ប្រតិភូជាន់ខ្ពស់បំពេញបេសកកម្មនៅខេត្តមួយចំនួននៅភាគឦសាននៃប្រទេសកម្ពុជា ដែលរួមមាន ខេត្តត្បូងឃ្មុំ ខេត្ត ក្រចេះ និងខេត្តស្ទឹងត្រែង។

សេចក្តីប្រកាសរួមនេះបានបញ្ជាក់ពីបេសកកម្ម និងការប្តេជ្ញាចិត្តរួមគ្នារបស់រាជរដ្ឋាភិបាលកម្ពុជា និងក្រុមអឺរ៉ុប ក្នុងការលើកកម្ពស់ កសិកម្មធន់នឹងការប្រែប្រួលអាកាសធាតុ ប្រព័ន្ធចំណីអាហារធន់ ការអភិរក្សជីវចម្រុះ និងការអភិវឌ្ឍន៍ជនបទប្រកបដោយ បរិយាបន្ន។

ដោយចាប់ផ្តើមពី ខេត្ត ត្បូងឃ្មុំ គណៈប្រតិភូបានទៅទស្សនាសហគមន៍កសិកម្មជ័យរុងរឿង។បន្ទាប់មកបន្តទៅខេត្តក្រចេះ បេសកកម្មបានផ្តោតលើតំបន់អភិរក្សផ្សោតទន្លេមេគង្គ គ្រប់គ្រងដោយរដ្ឋបាលជលផល និងអង្គការ WWF។ នៅខេត្តស្ទឹងត្រែងដែលជាខេត្ត ចុងក្រោយ គណៈប្រតិភូបានចុះទស្សនកិច្ចនៅសិប្បកម្មកែច្នៃគ្រាប់ស្វាយចន្ទីស្ទឹងត្រែង សហគមន៍កសិកម្មចំបក់។ដំណើរទស្សនកិច្ចនេះបានបង្ហាញយ៉ាងច្បាស់ថា ដៃគូ រវាងក្រសួងកសិកម្ម ក្រុមអឺរ៉ុប និងដៃគូនានា កំពុងផ្តល់ផលប្រយោជន៍យ៉ាងពិតប្រាកដដល់ជីវភាពរស់នៅរបស់ប្រជាពលរដ្ឋ ក្នុងមូលដ្ឋាន និងការគ្រប់គ្រងធនធានធម្មជាតិ។

វាជាគំនិតផ្តួចផ្តើមរបស់ក្រុមអឺរ៉ុប ដែលប្រើប្រាស់ថវិកាសរុបចំនួន ២៤,៣ លានអឺរ៉ូ (ក្នុងនោះ វិភាគទានរបស់សហភាពអឺរ៉ុប ចំនួន ១៧ លានអឺរ៉ូ និងរបស់ប្រទេសអាល្លឺម៉ង់ចំនួន ៧,៣ លានអឺរ៉ូ) ដែលត្រូវបានគ្រប់គ្រង និងអនុវត្តដោយទី ភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) និងអង្គការភីផលអ៊ុននីត ចាប់ពីឆ្នាំ២០២៤ ដល់ឆ្នាំ ២០២៩។ កម្មវិធីនេះជួយលើកកម្ពស់ ឬកែលម្អខ្សែច្រវាក់តម្លៃស្វាយចន្ទី និងម្រេច ឱ្យកាន់តែមាននិរន្តរភាព និងកាន់តែ មានភាពធន់នឹងការប្រែប្រួលអាកាសធាតុ តាមរយៈការពង្រឹងប្រព័ន្ធសុវត្ថិភាពចំណីអាហារ និងប្រព័ន្ធអនាម័យ និងភូត គាមអនាម័យ (SPS) ដោយគាំទ្រកសិករចំនួន ៦ ០០០នាក់ ដើម្បីបង្កើនផលិតភាព ពង្រឹងសមត្ថភាពរបស់សហគមន៍ កសិកម្ម និងសហគ្រាសធុនតូច និងមធ្យម (SME)ចំនួន ៤០ ព្រមទាំងបង្កើនការកែច្នៃនៅក្នុងស្រុក ការវិនិយោគ និងការ ធ្វើឱ្យមានភាពរួចរាល់ដើម្បីនាំចេញផលិតផលកសិកម្ម ទៅកាន់ទីផ្សារអន្តរជាតិនៅក្នុងតំបន់ និងនៅសហភាពអឺរ៉ុប។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា៖ «កម្ពុជាកំពុងប្តូរពីការធ្វើកសិកម្មបែបគ្រួសារទៅជាការផលិតបែបពាណិជ្ជកម្ម។ តាមរយៈ ការផ្លាស់ប្តូរមុខមាត់វិស័យកសិកម្ម សហគមន៍កសិកម្មទំនើប (MACs) និងផលិតកម្មកសិកម្មតាមកិច្ចសន្យា យើងកំពុងរៀបចំចងក្រងកសិករក្នុងស្រុកឱ្យផ្គត់ ផ្គង់ផលដំណាំបានទៀងទាត់ និងឋិតថេរដល់រោងចក្រកែច្នៃ។

កិច្ចសហការជាមួយសហភាពអឺរ៉ុប និងដៃគូរនានា បាននិង កំពុងលើកកម្ពស់ស្តង់ដារសុវត្ថិភាពចំណីអាហារ និរន្តរភាព និងសមត្ថភាពប្រកួតប្រជែងក្នុងទីផ្សារ សម្រាប់ដំណាំសំខាន់ៗ ដូចជា ស្វាយចន្ទី និងម្រេចកំពុងបើកឱកាសថ្មីៗសម្រាប់កសិករទាំងក្នុងស្រុក និងនៅលើឆាកអន្តរជាតិ»។

ឯកឧត្តម អ៊ុហ្គូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា បានគូសបញ្ជាក់ថា៖ «តាមរយៈ យុទ្ធសាស្ត្រច្រកទ្វារសកល (Global Gateway) របស់សហភាពអឺរ៉ុប ក្រុមអឺរ៉ុបកំពុងវិនិយោគលើជំនាញបច្ចេកទេស សុវត្ថិភាពចំណីអាហារ និងប្រព័ន្ធកែច្នៃ ដើម្បីជំរុញខ្សែច្រវាក់តម្លៃស្វាយចន្ទី និងម្រេចរបស់កម្ពុជា។ កត្តានេះជួយអាជីវកម្ម កសិកម្មក្នុងស្រុកអាចបង្កើតផលិតផលដែលមានតម្លៃបន្ថែមខ្ពស់នៅក្នុងប្រទេស និងពង្រីកខ្លួនទៅកាន់ទីផ្សារនាំចេញតម្លៃ ខ្ពស់។

គួរបញ្ជាក់ថា រាជរដ្ឋាភិបាលកម្ពុជា និងក្រុមអឺរ៉ុប បានបញ្ជាក់ជាថ្មីអំពីជំហរក្នុងការបន្តកិច្ចសហប្រតិបត្តិការ ដើម្បីអភិវឌ្ឍ វិស័យកសិកម្ម ប្រព័ន្ធស្បៀងអាហារ ការថែរក្សាការពារជីវចម្រុះ និងការអភិវឌ្ឍន៍នៅទីជនបទ ឱ្យកាន់តែធន់នឹងការប្រែប្រួល អាកាសធាតុ និងឱ្យកាន់តែមាននិរន្តរភាព៕

ដោយ មករា