AKP ត្បូងឃ្មុំ ថ្ងៃទី១៨ ខែសីហា ឆ្នាំ២០២៦-- ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ផ្លូវក្រាលកៅស៊ូប្រភេទ DBST ប្រវែង ៥,៧០៤ម៉ែត្រ និងបើកការដ្ឋានសាងសង់ផ្លូវ DBST ថ្មីប្រវែង ៦,០០០ម៉ែត្រ ស្ថិតក្នុងឃុំមេមត់ ស្រុកមេមត់ ខេត្តត្បូងឃ្មុំ នាថ្ងៃទី១៨ ខែសីហា ឆ្នាំ២០២៦ ដោយពិធីនេះបានធ្វើឡើងនៅសាលាបុណ្យ ស្ថិតក្នុងភូមិមុខក្រាស់ ឃុំមេមត់ ដោយមានការចូលរួមពីថ្នាក់ដឹកនាំខេត្ត សមាជិកក្រុមប្រឹក្សាខេត្ត អភិបាលរងខេត្ត ប្រធាន-អនុប្រធានមន្ទីរ អង្គភាពជំនាញជុំវិញខេត្ត អាជ្ញាធរមូលដ្ឋាន កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋជាច្រើនរូប។

ក្នុងឱកាសនោះ លោក ស្រេង លី អភិបាលស្រុកមេមត់ បានថ្លែងសុន្ទរកថាស្វាគមន៍ និងបញ្ជាក់ថា ស្រុកមេមត់ជាតំបន់ខ្ពង់រាបដីក្រហម មានព្រំប្រទល់ជាប់ប្រទេសវៀតណាមប្រវែង ១០១គីឡូម៉ែត្រ ហើយប្រជាពលរដ្ឋប្រមាណ ៩០% ប្រកបរបរកសិកម្ម។ លោកបានចាត់ទុកសមិទ្ធផលផ្លូវទាំងពីរខ្សែនេះថា ជាការរួមចំណែកដ៏សំខាន់ក្នុងការផ្លាស់ប្តូរមុខមាត់ស្រុកមេមត់ ពីផ្លូវដីដែលជួបការលំបាកក្នុងរដូវវស្សា ទៅជាផ្លូវក្រាលកៅស៊ូដែលមានភាពរលូន និងងាយស្រួលធ្វើដំណើរ។ គម្រោងនេះផ្តល់ប្រយោជន៍ដោយផ្ទាល់ដល់ប្រជាពលរដ្ឋចំនួន ៤ភូមិ ស្មើនឹងប្រមាណ ១៧,៦៦៨នាក់ ក្នុងឃុំមេមត់ និងជួយពង្រឹងការតភ្ជាប់ប្រព័ន្ធដឹកជញ្ជូនពីឃុំគគីរ ឃុំកំពាន់ និងឃុំដារ មកកាន់ទីរួមស្រុកមេមត់។

ឯកឧត្តម ប៉ែន កុសល្យ បានលើកឡើងថា សមិទ្ធផលផ្លូវទាំងពីរខ្សែគឺជាសមិទ្ធផលថ្មីមួយទៀតដែលកើតចេញពីការយកចិត្តទុកដាក់របស់រាជរដ្ឋាភិបាល និងការខិតខំប្រឹងប្រែងរបស់រដ្ឋបាលខេត្ត ក្នុងការអភិវឌ្ឍហេដ្ឋារចនាសម្ព័ន្ធ និងឆ្លើយតបនឹងតម្រូវការជាក់ស្តែងរបស់ប្រជាពលរដ្ឋនៅមូលដ្ឋាន។ ផ្លូវទាំងនេះបានជួយសម្រួលដល់ការធ្វើដំណើររបស់ប្រជាពលរដ្ឋទៅកាន់សាលារៀន មន្ទីរពេទ្យ និងទីប្រជុំជន ព្រមទាំងកាត់បន្ថយការលំបាកក្នុងការដឹកជញ្ជូនកសិផលទៅកាន់ទីផ្សារ។

ឯកឧត្តមអភិបាលខេត្តបានគូសបញ្ជាក់ថា សន្តិភាព គឺជាមូលដ្ឋានដ៏សំខាន់សម្រាប់ការអភិវឌ្ឍ ព្រោះប្រសិនបើគ្មានសន្តិភាព ក៏មិនអាចមានឱកាសសាងសង់ហេដ្ឋារចនាសម្ព័ន្ធ និងសមិទ្ធផលនានាបានដូចបច្ចុប្បន្នឡើយ។ ក្រោមនយោបាយឈ្នះ-ឈ្នះ ដែលបាននាំមកនូវសន្តិភាព ឯកភាពជាតិ និងស្ថិរភាព ប្រទេសកម្ពុជាបាននិងកំពុងបន្តបោះជំហានលើមាគ៌ាអភិវឌ្ឍន៍ជាបន្តបន្ទាប់។ ទន្ទឹមនេះ ស្រុកមេមត់ ដែលកាលពីអតីតកាលធ្លាប់ជាតំបន់ដាច់ស្រយាល និងរងផលប៉ះពាល់ពីសង្គ្រាម បច្ចុប្បន្នកំពុងប្រែក្លាយទៅជាតំបន់ដែលមានសក្តានុពលខ្ពស់លើវិស័យសេដ្ឋកិច្ច និងកសិកម្ម។ ការរីកចម្រើនលើវិស័យហេដ្ឋារចនាសម្ព័ន្ធ និងការតភ្ជាប់ផ្លូវថ្នល់ បានចូលរួមលើកកម្ពស់ជីវភាព និងបង្កើនឱកាសសេដ្ឋកិច្ចរបស់ប្រជាពលរដ្ឋ។

ចំពោះផ្លូវ DBST ប្រវែង ៥,៧០៤ម៉ែត្រ ដែលបានសម្ពោធដាក់ឱ្យប្រើប្រាស់ជាផ្លូវការ ឯកឧត្តមអភិបាលខេត្តបានបញ្ជាក់ថា ផ្លូវនេះនឹងជួយកាត់បន្ថយពេលវេលាធ្វើដំណើរ និងការចំណាយលើការដឹកជញ្ជូន ព្រមទាំងសម្រួលដល់ការដឹកជញ្ជូនផលកសិកម្មពីតំបន់ផលិតកម្មទៅកាន់ទីផ្សារ និងជំរុញសកម្មភាពសេដ្ឋកិច្ចនៅតាមតំបន់ជាប់ដងផ្លូវ។ ទន្ទឹមនឹងនេះ ក៏ជួយឱ្យសិស្សានុសិស្ស ប្រជាពលរដ្ឋ និងអ្នកជំងឺ អាចធ្វើដំណើរបានកាន់តែងាយស្រួល និងមានសុវត្ថិភាព។ ជាមួយគ្នានេះ រដ្ឋបាលខេត្តក៏បានបើកការដ្ឋានសាងសង់ផ្លូវ DBST ថ្មីប្រវែង ៦,០០០ម៉ែត្រ ដើម្បីបន្តពង្រីកបណ្តាញផ្លូវ និងពង្រឹងការតភ្ជាប់ក្នុងឃុំមេមត់។ ឯកឧត្តមអភិបាលខេត្តបានបញ្ជាក់ថា ការបើកការដ្ឋាននេះ គឺជាការឆ្លើយតបទៅនឹងតម្រូវការ និងសំណូមពររបស់ប្រជាពលរដ្ឋ ខណៈរដ្ឋបាលខេត្តនឹងបន្តស្វែងរកប្រភពធនធាន និងកៀរគរថវិកា ដើម្បីពង្រីកបណ្តាញផ្លូវនៅទូទាំងខេត្តឱ្យកាន់តែមានប្រសិទ្ធភាព។

ឯកឧត្តម ប៉ែន កុសល្យ ក៏បានណែនាំដល់ក្រុមហ៊ុនសាងសង់ និងមន្ទីរជំនាញពាក់ព័ន្ធ ត្រូវយកចិត្តទុកដាក់លើគុណភាព និងស្តង់ដារបច្ចេកទេស ដោយត្រូវធានាឱ្យផ្លូវមានភាពរឹងមាំ និងអាចប្រើប្រាស់បានយូរអង្វែង។ ក្រុមការងារពាក់ព័ន្ធត្រូវចុះត្រួតពិនិត្យការដ្ឋានជាប្រចាំ និងកាត់បន្ថយផលប៉ះពាល់ដល់ប្រជាពលរដ្ឋក្នុងអំឡុងពេលសាងសង់ ដូចជាការបាញ់ទឹកកាត់បន្ថយធូលី និងការដាក់ស្លាកសញ្ញាចរាចរណ៍ឱ្យបានច្បាស់លាស់។

ឯកឧត្តមអភិបាលខេត្តក៏បានអំពាវនាវដល់ប្រជាពលរដ្ឋ អាជ្ញាធរមូលដ្ឋាន និងម្ចាស់អាជីវកម្មដឹកជញ្ជូន ចូលរួមថែរក្សាផ្លូវសាធារណៈ ដោយមិនដឹកជញ្ជូនលើសទម្ងន់កំណត់ មិនរំលោភយកដីចំណីផ្លូវ និងមិនបង្ហូរទឹកកខ្វក់ចូលលើទ្រូងផ្លូវ។ ជាពិសេស ត្រូវចូលរួមគោរពច្បាប់ចរាចរណ៍ បើកបរដោយប្រុងប្រយ័ត្ន និងមិនបើកបរក្នុងល្បឿនលឿន ដើម្បីធានាសុវត្ថិភាព និងកាត់បន្ថយគ្រោះថ្នាក់ចរាចរណ៍។

ទន្ទឹមនឹងនេះ ឯកឧត្តមបានថ្លែងអំណរគុណដល់ក្រសួង ស្ថាប័ន មន្ទីរជំនាញ អាជ្ញាធរមូលដ្ឋាន ក្រុមការងារពាក់ព័ន្ធ និងប្រជាពលរដ្ឋទាំងអស់ ដែលបានចូលរួមសហការ ធ្វើឱ្យសមិទ្ធផលហេដ្ឋារចនាសម្ព័ន្ធទាំងនេះលេចចេញជារូបរាង។ បន្ទាប់មក ឯកឧត្តមអភិបាលខេត្ត និងឯកឧត្តមតំណាងក្រសួង បានប្រកាសសម្ពោធដាក់ឱ្យប្រើប្រាស់ផ្លូវ DBST ប្រវែង ៥,៧០៤ម៉ែត្រ និងបើកការដ្ឋានសាងសង់ផ្លូវ DBST ថ្មីប្រវែង ៦,០០០ម៉ែត្រ ក្នុងឃុំមេមត់ ស្រុកមេមត់ ចាប់ពីពេលនេះតទៅ៕

ដោយ AKP