AKP ភ្នំពេញ ថ្ងៃទី១៧ ខែសីហា ឆ្នាំ២០២៦ -- ក្រុមឧទ្ទាមហ៊ូធី បានបើកការវាយប្រហារថ្មីដោយយន្តហោះគ្មានមនុស្សបើក (ដ្រូន) និងមីស៊ីល នៅទីក្រុងម៉ូកា និងទីក្រុងម៉ារីប នៅភាគនិរតីនៃប្រទេសយេម៉ែន ខណៈដែលការភាពតានតឹងនៃអំពើហិង្សានៅតែបន្តកើនឡើងនៅក្នុងប្រទេសអារ៉ាប់ដែលហែកហួរដោយសង្គ្រាមមួយនេះ។ នេះបើយោងតាមកងកម្លាំងគាំទ្ររដ្ឋាភិបាល និងប្រព័ន្ធផ្សព្វផ្សាយក្នុងស្រុក។

កងកម្លាំងតស៊ូជាតិ ដែលសហការជាមួយរដ្ឋាភិបាលយេម៉ែនដែលទទួលស្គាល់ជាអន្តរជាតិ និងដឹកនាំដោយសមាជិកក្រុមប្រឹក្សាភាពជាអ្នកដឹកនាំប្រធានាធិបតី លោក តារីក សាឡេះ បាននិយាយថា គ្រាប់មីស៊ីលមួយគ្រាប់បានវាយប្រហារទីក្រុងម៉ូកា ដោយលោកមិនបានផ្តល់ព័ត៌មានលម្អិតអំពីការរងរបួស ឬការខូចខាតណាមួយនោះទេ។

នៅទីក្រុងម៉ារីប ការិយាល័យប្រព័ន្ធផ្សព្វផ្សាយរបស់រដ្ឋាភិបាលទីក្រុងបាននិយាយថា គ្រាប់មីស៊ីលផ្លោងចំនួនប្រាំមួយគ្រាប់ និងយន្តហោះគ្មានមនុស្សបើកចំនួនបួន បានវាយប្រហារទៅលើសង្កាត់លំនៅដ្ឋាននៅក្នុងទីក្រុងនេះកាលពីល្ងាចថ្ងៃសៅរ៍សប្តាហ៍មុន ដែលធ្វើឱ្យមនុស្សបួននាក់រងរបួស និងបណ្តាលឱ្យខូចខាតផ្ទះសម្បែង និងទ្រព្យសម្បត្តិស៊ីវិល។

សេចក្តីថ្លែងការណ៍មួយរបស់ការិយាល័យប្រព័ន្ធផ្សព្វផ្សាយបាននិយាយថា ការវាយប្រហារមួយបានធ្វើឡើងលើហាងនំប៉័ងមួយកន្លែងនៅក្នុងសង្កាត់អាល់-សារីកា នៅភាគខាងជើងនៃទីក្រុងម៉ារីប ដែលបណ្តាលឱ្យមនុស្សម្នាក់រងរបួស។

សេចក្តីថ្លែងការណ៍នោះបាននិយាយថា ការវាយប្រហារនោះក៏បានវាយប្រហារទៅលើសង្កាត់ជាច្រើននៅក្នុងទីក្រុងដែលមានប្រជាជនរស់នៅច្រើនមួយនេះផងដែរ ដោយបានបំផ្លាញយានយន្ត និងផ្ទះសម្បែងមួយចំនួន។

ការិយាល័យប្រព័ន្ធផ្សព្វផ្សាយបានអំពាវនាវដល់សហគមន៍អន្តរជាតិឱ្យ «ថ្កោលទោសការវាយប្រហារ និងឧក្រិដ្ឋកម្មទាំងនេះ ដែលកំណត់គោលដៅលើជំរុំភៀសខ្លួន សង្កាត់លំនៅដ្ឋាន និងកន្លែងស្នាក់នៅរបស់ជនស៊ីវិល ហើយចាត់ទុកថា វាជាការរំលោភច្បាប់មនុស្សធម៌អន្តរជាតិ»៕

ដោយ៖ យា ចិន្ដាខន្ដី (ប្រភព៖ AA-AKP)