AKP កំពង់ធំ ថ្ងៃទី១៥ ខែសីហា ឆ្នាំ២០២៦--

ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹកនិងឧតុនិយមបានលើកឡើងថា អាងទឹកត្រពាំងព្រីង និងអាងទឹកបាដាកគឺជាប្រភពទឹកដ៏មានសារសំខាន់ក្នុងការផ្គត់ផ្គង់ និងបញ្ចូលទឹកទៅកាន់ប្រព័ន្ធធារាសាស្ត្រអាងទឹក៣០កញ្ញាលើកកម្ពស់ជីវភាពពលរដ្ឋក្នុងតំបន់ស្រោចស្រព។ឯកឧត្តម ចាន់ ស៊ីណាត បានឱ្យដឹងដូច្នេះក្នុងឱកាសដែលឯកឧត្តម តំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយមនិងជាប្រធានក្រុមការងារចុះមូលដ្ឋានស្រុកស្ទោង ខេត្តកំពង់ធំ បានអញ្ជើញចុះពិនិត្យដោយផ្ទាល់នូវស្ថានភាពប្រភពទឹក អាងទឹកបាដាក ស្ថិតក្នុងស្រុកសង្គមថ្មី ខេត្តព្រះវិហារ និង អាងទឹកត្រពាំងព្រីង ស្ថិតក្នុងស្រុកប្រាសាទបាល័ង្គ ខេត្តកំពង់ធំ កាលពីថ្ងៃទី១៤ ខែសីហា ឆ្នាំ២០២៦។

ឯកឧត្តមរដ្ឋលេខាធិការ បានគូសបញ្ជាក់ថា ដើម្បីឆ្លើយតបទៅនឹងតម្រូវការប្រើប្រាស់ទឹកជាក់ស្តែង និងចំពោះមុខរបស់ប្រជាពលរដ្ឋក្នុងខេត្តទាំងពីរ (ព្រះវិហារ និងកំពង់ធំ) ជាពិសេសប្រជាពលរដ្ឋក្នុងតំបន់ដែលទាញយកទឹកពីអាងទឹក៣០កញ្ញា ក្រសួងចាំបាច់ត្រូវតែបន្តធ្វើការអភិវឌ្ឍ កែលម្អ និងធ្វើទំនើបកម្មប្រព័ន្ធធារាសាស្ត្រ ដោយចាប់ផ្តើមពីប្រភពទឹក រហូតដល់ប្រព័ន្ធបែងចែកទឹកឱ្យមានប្រសិទ្ធភាពខ្ពស់ ខណៈប្រភពទឹកទាំងពីរនេះ គឺជាប្រភពទឹកដ៏មានសារសំខាន់ក្នុងការផ្គត់ផ្គង់ និងបញ្ចូលទឹកទៅកាន់ប្រព័ន្ធធារាសាស្ត្រអាងទឹក៣០កញ្ញា។

ឯកឧត្តមបានបន្ថែមថា ការធ្វើទំនើបកម្មនេះ គឺដើម្បីធានាឱ្យប្រព័ន្ធធារាសាស្ត្របំពេញតួនាទីយ៉ាងសំខាន់ក្នុងការស្ទាក់ និងរក្សាទុកទឹកសម្រាប់ប្រើប្រាស់ជាលក្ខណៈពហុបំណង ព្រមទាំងក្លាយជាប្រភពធនធានទឹកដ៏មានយុទ្ធសាស្ត្រ ក្នុងការផ្គត់ផ្គង់ទឹកស្រោចស្រព និងប្រើប្រាស់ប្រចាំថ្ងៃជូនដល់ប្រជាពលរដ្ឋក្នុងខេត្តទាំងមូល ក៏ដូចជាតំបន់ផ្នែកខាងក្រោមផងដែរ៕

ដោយ ស៊ុម វណ្ណា