AKP កំពង់ធំ ថ្ងៃទី១៥ ខែសីហាឆ្នាំ២០២៦--

ដើម្បីឆ្លើយតបទៅនឹងសំណូមពរចាំបាច់របស់ប្រជាពលរដ្ឋក្នុងការធ្វើដំណើរក៏ដូចជាដឹកកសិផលទៅកាន់ទីផ្សារ និងសិស្សានុសិស្សធ្វើដំណើរទៅសាលារៀន លោកឧកញ៉ា ឈន សុផល ប្រធានក្រុមការងារចុះជួយឃុំផាន់ញើមកាលពីថ្ងៃទី១៤ ខែសីហា ឆ្នាំ២០២៦បានដឹកនាំក្រុមការងាររៀបចំដាក់គ្រឿងចក្រ ចុះជួសជុលសម្រួលកែលម្អឡើងវិញ ផ្លូវក្រាលគ្រួសក្រហមប្រវែង១៥៨៥០ម៉ែត្រស្ថិតនៅភូមិព្រហ៊ូត សុជុល ផ្ដៀក ព្រៃម្រ៉ី ក្រញូង ឃុំផាន់ញើមដើម្បីជួយសម្រួលដល់ប្រជាពលរដ្ឋបានធ្វើដំណើរងាយស្រួលជាងមុន នាឱកាសពិធីបុណ្យកាន់បិណ្ឌនិងភ្ជុំបិណ្ឌខាងមុខនេះក្រោមការឧបត្ថម្ភទាំងស្រុងពីលោកអ្នកឧកញ៉ាបណ្ឌិត ទ្រី ភាព ប្រធានក្រុមការងារចុះជួយគណបក្សប្រជាជនកម្ពុជាស្រុកប្រាសាទបល្ល័ង្ក។

លោកឧកញ៉ា ឈន សុផលបានបញ្ជាក់ថា គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី តែតែងបានយកចិត្តទុកដាក់និងគិតគូរពីសុខទក្ខប្រជាពលរដ្ឋជាប់ជានិច្ច មិនថាប្រជាពលរដ្ឋនៅតំបន់ដាច់ស្រយាលនោះឡើយ។ រយៈពេល៤៦ឆ្នាំកន្លងមកនេះបន្ទាប់ពីថ្ងៃជ័យជំនះ៧មករា១៩៧៩ រាជរដ្ឋាភិបាលនិងគណបក្សប្រជាជនកម្ពុជា តែងបានផ្សារភ្ជាប់រួមសុខរួមទុក្ខជាមួយប្រជាពលរដ្ឋ ពុះពារឆ្លងកាត់រាល់ឧបសគ្គដឹកនាំប្រទេសឱ្យរួចផុតពីស្ថានភាពដែលវិនាសខ្ទេចខ្ទី ឈានមកដល់ដំណាក់កាល អភិវឌ្ឍន៍លើគ្រប់វិស័យ ប្រកបដោយមោទនភាពជាទីបំផុត។

លោកឧកញ៉ាបន្តថា ក្រោមការដឹកនាំរបស់គណបក្សប្រជាជនកម្ពុជា សមិទ្ធផលថ្មីៗជាច្រើនអនេក រួមមាន៖ផ្លូវ ស្ពាន ប្រព័ន្ធធារាសាស្រ្ត បណ្តាញទឹកស្អាត អគ្គិសនី ប្រព័ន្ធពត៌មាន រោងចក្រ កសិដ្ឋាន សំណង់តូចធំ មណ្ឌលពាណិជ្ជកម្ម សាលារៀន មន្ទីរពេទ្យ វត្តអារាម ត្រូវបានកសាងពង្រីកទាំងនៅទីក្រុង ទាំងនៅជនបទ និងតំបន់ដាច់ស្រយាល។

‌លោកឧកញ៉ា ឈន សុផល បានបញ្ជាក់ថា ផ្លូវគឺជាសរសៃឈាមនៃសេដ្ឋកិច្ចជាតិ មានផ្លូវ គឺមានសង្ឃឹម ដូចនេះការបើកការដ្ឋានជួសជុលផ្លូវលំគឺដើម្បីសម្រួលដល់ជីវភាពរស់នៅ ការតភ្ជាប់ការធ្វើដំណើរ និងដឹកជញ្ជូនកសិផលរបស់ប្រជាពលរដ្ឋនៅឃុំទាំង២នេះ។ ស្របជាមួយគ្នានោះដែរលោកក៏បានអំពាវនាវឱ្យប្រជាពលរដ្ឋទាំងអស់នៅពេលផ្លូវថ្មីជួលជុលហើយ ត្រូវរួមគ្នាថែរក្សាឱ្យបានគង់វង្សនិងបានថ្លែងអំណរគុណចំពោះប្រជាពលរដ្ឋដែលបានសហការយ៉ាងល្អក្នុងការបង្កលក្ខណៈងាយស្រួល ជួយដោះស្រាយនូវរាល់ផលប៉ះពាល់នៃការពង្រីកផ្លូវថ្មីឱ្យមានភាពធំទូលាយព្រមទាំងបានសំណូមពរដល់ប្រជាពលរដ្ឋទាំងអស់ ដែលប្រើប្រាស់ផ្លូវនេះសូមមេត្តាជួយថែរក្សាកុំឱ្យខូចខាត ដោយមិនត្រូវដឹកជញ្ជូនលើសទម្ងន់កំណត់ ដើម្បីធ្វើឱ្យផ្លូវនេះប្រើប្រាស់បានយូរអង្វែងសម្រាប់កូនចៅយើងជំនាន់ក្រោយៗទៀត។ត្រូវគោរពច្បាប់ចរាចរណ៍ មិនត្រូវបើកបរលើសស្បឿនកំណត់ ដែលនាំឱ្យមានគ្រោះថ្នាក់ របួសពិការឬបាត់បង់ជីវិតឡើយ ព្រមទាំងបានអំពាវនាវដល់ប្រជាពលរដ្ឋទាំងអស់ ដែលមានឈ្មោះក្នុងបញ្ជីបោះឆ្នោត សូមមេត្តាអញ្ជើញទៅបោះឆ្នោតជ្រើសក្រុមប្រឹក្សាឃុំសង្កាត់ អាណត្តិទី៦នៅថ្ងៃទី៦ ខែមិថុនា ឆ្នាំ២០២៧ខាងមុខនេះឱ្យបានគ្រប់ៗគ្នា។

នៅក្នុងពិធីនោះ‎ឧកញ៉ាបបានឧបត្ថម្ភថវិកាដល់អ្នកចូលរួមចំនួន១៣០នាក់ក្នុងម្នាក់ទទួលបាន២ម៉ឺនរៀល។សាខាបក្សភូមិទាំង៨ភូមិក្នុងម្នាក់ទទួលបាន៣ម៉ឺនរៀលនិងបានចុះសួរសុខទុក្ខជនមានពិការភាពនៅភូមិស្មោញចំនួន១គ្រួសារឧបត្ថម្ភ រទេះរុញ១គ្រឿង អង្ករ៥០គីឡូទឹកត្រី១យួទឹកស៊ីអុីវ១យួត្រីខ១យួនិងថវិកាចំនួន២០ម៉ឺនរៀលព្រមទាំងបានឧបត្ថម្ភដល់លោកតាលោកយាយចាស់ជរានិងកុមារចំនួន១៤នាក់ក្នុងម្នាក់ចំនួន៥ម៉ឺនរៀលផងដែរ៕

ដោយ ស៊ុម វណ្ណា