AKP កំពង់ធំ ថ្ងៃទី១៤ ខែសីហា ឆ្នាំ ២០២៦--ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានប្រចាំការ និងជាប្រធានលេខាធិការដ្ឋាន នៃគណៈកម្មាធិការសមាគមអតីតយុទ្ធជន និងនិវត្តន៍ជនកម្ពុជាខេត្តកំពង់ធំ តំណាងឯកឧត្ដម នួន ផារ័ត្ន អភិបាលខេត្តកំពង់ធំ និងជាប្រធានគណៈកម្មាធិការសមាគមអតីតយុទ្ធជន និងនិវត្តន៍ជនកម្ពុជា ខេត្តកំពង់ធំ អមដំណើរដោយលោក ជួន សិលាវិត ប្រធានសាខាមូលនិធិជាតិជំនួយសង្គមខេត្ត និងជាអនុប្រធានគណៈកម្មាធិការសមាគមអតីតយុទ្ធជន និងនិវត្តន៍ជនកម្ពុជាខេត្តកំពង់ធំ កាលពីរសៀលថ្ងៃទី១៣ ខែសីហា ឆ្នាំ២០២៦ បាននាំយកថវិកាបេឡាមរណៈសង្គ្រោះទៅប្រគល់ជូនក្រុមគ្រួសារសពអតីតយុទ្ធជន និងគោរពវិញ្ញាណក្ខន្ធលោកវរសេនីយ៍ទោ អ៊ុក ផាវ អាយុ ៦៣ឆ្នាំ ដែលបានទទួលមរណភាពដោយរោគាពាធនាពេលថ្មីៗកន្លងទៅនេះ។

លោកអនុសេនីយ៍ទោ នួន ស៊ីថាល់ ក្រុមលេខាធិការដ្ឋានសមាគមអតីតយុទ្ធជន និងនិវត្តន៍ជនកម្ពុជាខេត្ត បានឡើងអានសារលិខិតចូលរួមរំលែកទុក្ខរបស់ សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តន៍ជនកម្ពុជា និងបានគូសបញ្ជាក់អំពីប្រវត្តិរបស់លោកវរសេនីយ៍ទោ អ៊ុក ផាវ ដែលធ្លាប់បានចូលបម្រើក្នុងជួរនគរបាលនៅក្នុងឆ្នាំ១៩៨៥ នៅអង្គភាពស្នងការនគរបាលខេត្តកំពង់ធំ មានតួនាទីជានាយរងការិយាល័យព្រហ្មទណ្ឌកម្រិតធ្ងន់ ហើយក្រោយមកត្រូវបានក្រសួងមហាផ្ទៃដាក់ឱ្យចូលសោធននិវត្តន៍នៅឆ្នាំ២០១៩។ លោកមានភរិយាឈ្មោះ ឈន វួចណា អាយុ ៥៧ឆ្នាំ មានកូននៅក្នុងបន្ទុកចំនួន ០៤នាក់ រស់នៅភូមិទី៧ សង្កាត់កំពង់ធំ ក្រុងស្ទឹងសែន ខេត្តកំពង់ធំ។

ឧត្ដមសេនីយ៍ទោ សោម ស៊ុន បានថ្លែងនូវការសោកស្ដាយអាឡោះអាល័យជាទីបំផុតចំពោះការបាត់បង់លោកវរសេនីយ៍ទោ អ៊ុក ផាវ ដែលជាអតីតយុទ្ធជន ធ្លាប់មានគុណបំណាច់ចំពោះជាតិ និងមាតុភូមិ ជាស្វាមី និងជាឪពុកដ៏ល្អក្នុងគ្រួសាររបស់លោកស្រី ឈម វួចណា ដែលត្រូវជាភរិយា និងបានសូមគោរពបួងសួងដល់វិញ្ញាណក្ខន្ធលោកឱ្យបានទៅកាន់សុគតិភពកុំបីឃ្លៀងឃ្លាតឡើយ។

នៅក្នុងឱកាសនោះ ឧត្តមសេនីយ៍ទោ សោម ស៊ុន និងសហការី បាននាំយកថវិកាបេឡាមរណសង្គ្រោះចំនួន ៤លានរៀលរបស់គណៈកម្មាធិការសមាគមអតីតយុទ្ធជន និងនិវត្តន៍ជនកម្ពុជា និងអំណោយមនុស្សធម៌របស់ សម្តេចមហាបវរធិបតី ហ៊ុន ម៉ាណែត និងលោកជំទាវ ប្រគល់ជូនក្រុមគ្រួសារសពផងដែរ៕

ដោយ៖ ស៊ុម វណ្ណា