AKP បន្ទាយមានជ័យ ថ្ងៃទី១៤ ខែសីហា ឆ្នាំ២០២៦-- លោកជំទាវ នួម សុភ័ណ អ្នកតំណាងរាស្ត្រមណ្ឌលខេត្តបន្ទាយមានជ័យ បានអមដំណើរដោយលោក អែម សុខា អភិបាលនៃគណៈអភិបាលស្រុកអូរជ្រៅ ព្រមទាំងអាជ្ញាធរមូលដ្ឋាន បានអញ្ជើញចុះជួបសំណេះសំណាល និងនាំយកស្បៀងអាហារ ព្រមទាំងសម្ភារប្រើប្រាស់ ទៅចែកជូនដល់ប្រជាពលរដ្ឋដែលមានជីវភាពខ្វះខាតចំនួន ៦២គ្រួសារ រស់នៅក្នុងឃុំកូប ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១៣ ខែសីហា ឆ្នាំ២០២៦។

ក្នុងឱកាសដ៏មានអត្ថន័យនេះ លោកជំទាវ នួម សុភ័ណ អ្នកតំណាងរាស្ត្រ បានពាំនាំនូវការផ្តាំផ្ញើសួរសុខទុក្ខយ៉ាងយកចិត្តទុកដាក់បំផុតពីសំណាក់ថ្នាក់ដឹកនាំរាជរដ្ឋាភិបាល ជូនចំពោះបងប្អូនប្រជាពលរដ្ឋទាំងអស់។ លោកជំទាវបានគូសបញ្ជាក់ពីការគិតគូរឥតឈប់ឈរចំពោះសុខទុក្ខរបស់ប្រជាពលរដ្ឋ និងការចូលរួមចែករំលែករាល់ការលំបាកជាមួយគ្រួសារដែលមានជីវភាពខ្វះខាត ដោយការផ្ដល់ជូននូវស្បៀងអាហារ និងសម្ភារៈនាពេលនេះ គឺដើម្បីជួយសម្រាលបន្ទុកជីវភាពរស់នៅប្រចាំថ្ងៃរបស់បងប្អូនបានមួយកម្រិត។

បន្ថែមពីនេះ លោកជំទាវ និងលោក អែម សុខា អភិបាលស្រុកអូរជ្រៅ ក៏បានផ្ដាំផ្ញើដល់ប្រជាពលរដ្ឋគ្រប់រូបឱ្យបន្តយកចិត្តទុកដាក់ខ្ពស់លើការថែរក្សាសុខភាព រស់នៅដោយប្រកាន់ភ្ជាប់នូវអនាម័យល្អ និងខិតខំប្រឹងប្រែងបង្កបង្កើនផលបន្ថែមទៀត ដើម្បីលើកកម្ពស់កម្រិតជីវភាពគ្រួសារឱ្យកាន់តែប្រសើរឡើងទ្វេដង។

ការចុះសួរសុខទុក្ខ និងផ្ដល់អំណោយដោយផ្ទាល់ពីសំណាក់ថ្នាក់ដឹកនាំ បានបង្កើតឡើងនូវបរិយាកាសស្និទ្ធស្នាល ដ៏កក់ក្តៅ និងពោរពេញដោយក្តីសង្ឃឹម។ ប្រជាពលរដ្ឋទាំង ៦២គ្រួសារដែលបានទទួលអំណោយ បានសម្តែងនូវក្តីរំភើបរីករាយជាខ្លាំង និងបានថ្លែងអំណរគុណយ៉ាងជ្រាលជ្រៅចំពោះលោកជំទាវ នួម សុភ័ណ ព្រមទាំងក្រុមការងារ និងអាជ្ញាធរដែនដីគ្រប់ជាន់ថ្នាក់ ដែលតែងតែយកចិត្តទុកដាក់ គិតគូរ និងមិនដែលបោះបង់ចោលប្រជាពលរដ្ឋក្នុងគ្រាលំបាកនោះឡើយ៕

ដោយ ឈុន សារ៉ាត