AKP តាកែវ ថ្ងៃទី១៤ ខែសីហា ឆ្នាំ ២០២៦--ឯកឧត្តមបណ្ឌិត ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ និងប្រតិភូអមដំណើរ បានថ្លែងថា លោកយាយ លោកតា អ៊ុំ ពូមីង ដែលជាអតីតយុទ្ធជន និងនិវត្តន៍ជនទាំងអស់មិនត្រឹមតែបានលះបង់កម្លាំងកាយចិត្តបម្រើជាតិមាតុភូមិប៉ុណ្ណោះទេ ប៉ុន្តែគឺជាគ្រឹះដ៏រឹងមាំនៃការចូលរួមអភិវឌ្ឍប្រទេសជាតិឱ្យមានការរីកចម្រើនរហូតមកដល់សព្វថ្ងៃថែមទៀត។ ឯកឧត្តមបានលើកឡើងដូច្នេះ ក្នុងឱកាសអញ្ជើញចុះជួបសំណេះសំណាលជាមួយអតីតយុទ្ធជន និងនិវត្តន៍ជន នៅស្រុកត្រាំកក់ ដោយមានការអញ្ជើញចូលរួមពីឯកឧត្តម យស ណាស៊ី ប្រធានក្រុមប្រឹក្សាខេត្តតាកែវ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ឯកឧត្តម លោកជំទាវសមាជិក សមាជិកាក្រុមប្រឹក្សាខេត្តតាកែវ មន្ត្រីរាជការ កងកម្លាំងប្រដាប់អាវុធ អាជ្ញាធរមូលដ្ឋាន ព្រមទាំងបងប្អូនអតីតយុទ្ធជន និងនិវត្តន៍ជនប្រមាណជាង ១.០០០នាក់ កាលពីថ្ងៃទី១៣ ខែសីហា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ បានមានប្រសាសន៍ថា អតីតយុទ្ធជន និងនិវត្តន៍ជន បានបន្សល់ទុកនូវស្នាដៃជាកេមរតកដ៏មានតម្លៃជាច្រើនរាប់មិនអស់សម្រាប់កូនចៅជំនាន់ក្រោយ។ ឯកឧត្តម បានបន្ថែមថា «ពួកយើងជាកូនចៅជំនាន់ក្រោយ បានចងចាំជានិច្ច ដោយមិនអាចបំភ្លេចបាន និងបន្តរៀនសូត្រពីគំរូវីរភាពនេះទុកជាបទពិសោធន៍ សម្រាប់ធានាប្រសិទ្ធភាពក្នុងការបំពេញភារកិច្ចជូនជាតិមាតុភូមិក្នុងពេលបច្ចុប្បន្ន និងពេលអនាគត»។

ឯកឧត្តមបណ្ឌិត ជា វ៉ាន់ដេត បានមានប្រសាសន៍បន្តថា ប្រមុខរាជរដ្ឋាភិបាលអាណត្តិមុន និងបន្តមកដល់អាណត្តិនេះ ដែលតែងតែបានគិតគូរ និងយកចិត្តទុកដាក់ជានិច្ចចំពោះសុខទុក្ខដល់ជីវភាព និងសុខុមាលភាពរបស់បងប្អូនអតីតយុទ្ធជន និងនិវត្តន៍ជន ដែលមានគុណបំណាច់ចំពោះជាតិ តស៊ូរំដោះប្រទេសជាតិពីភ្លក់ភ្លើងសង្គ្រាមដ៏រាំរ៉ៃរាប់ទសវត្ស រួមគ្នាជាមួយរាជរដ្ឋាភិបាលក្នុងការស្ដារ និងកសាងប្រទេសជាតិពីបាតដៃទទេរហូតមានសុខសន្ដិភាព ការអភិវឌ្ឍ និងរីកចម្រើនលើគ្រប់វិស័យ។

ឯកឧត្តមបណ្ឌិត ជា វ៉ាន់ដេត បានមានប្រសាសន៍ថា ដើម្បីជាការតបស្នងសងគុណចំពោះអតីតយុទ្ធជន និងនិវត្តន៍ជនគ្រប់រូប រាជរដ្ឋាភិបាលតែងតែបានផ្ដល់ប្រាក់ឧបត្ថម្ភ និងជួយទំនុកបម្រុងគ្រប់បែបយ៉ាងនាពេលកន្លងមក ដោយមិនបោះបង់បងប្អូនណាម្នាក់ឡើយ។ បន្ថែមពីលើនេះ ក៏បានសាងសង់អគារអតីតយុទ្ធជន និងនិវត្តន៍នៅតាមបណ្ដាខេត្តនានាផងដែរ ដើម្បីទុកជាមរតកដល់កូនចៅជំនាន់ក្រោយយកគម្រូតាម។

ឆ្លៀតក្នុងឱកាសនោះ ឯកឧត្តមរដ្ឋមន្រ្តី ជា វ៉ាន់ដេត ក៏បានណែនាំអាជ្ញាធរមូលដ្ឋាន និងមន្រ្តីរាជការទាំងអស់ ត្រូវបន្តយកចិត្តទុកដាក់ចុះជួយបងប្អូនអតីតយុទ្ធជន និងនិវត្តន៍ជនទាំងអស់ ដែលកំពុងជួបការលំបាកឱ្យបានទាន់ពេលវេលា ដើម្បីលើកកម្ពស់ជីវភាពពួកគាត់ឱ្យបានល្អប្រសើរឡើង ស្របតាមគោលនយោបាយរបស់រាជរដ្ឋាភិបាល៕

ដោយ៖ អ៊ុច សៀង