AKP ភ្នំពេញ ថ្ងៃទី១៣ ខែសីហា ឆ្នាំ២០២៦--ក្រុមមន្ត្រីជំនាញនៃនាយកដ្ឋានឧតុនិយម ក្រសួងធនធានទឹក និងឧតុនិយម នាថ្ងៃព្រហស្បតិ៍ទី១៣ ខែសីហា ឆ្នាំ២០២៦ បានចុះបេសកកម្មពិនិត្យ ជួសជុល និងថែទាំស្ថានីយឧតុនិយមស្វ័យប្រវត្តិ ស្ថិតក្នុងភូមិសាស្ត្រខេត្តកំពង់ឆ្នាំង ដើម្បីធានាបាននូវនិរន្តភាព និងប្រសិទ្ធភាពក្នុងការតាមដាន ព្រមទាំងការគណនាព្យាករណ៍ស្ថានភាពអាកាសធាតុ។

ក្នុងសកម្មភាពចុះបំពេញការងារនេះ ក្រុមមន្ត្រីជំនាញបច្ចេកទេសក្រសួង ដោយមានកិច្ចសហការយ៉ាងជិតស្និទ្ធជាមួយមន្ទីរធនធានទឹក និងឧតុនិយមខេត្តកំពង់ឆ្នាំង បានចុះអនុវត្តការងារបច្ចេកទេសផ្ទាល់នៅស្ថានីយឧតុនិយមស្វ័យប្រវត្តិចំនួន២ទីតាំង រួមមាន៖ ១. ស្ថានីយក្រាំងលាវ ស្ថិតក្នុងភូមិក្រាំងលាវ ឃុំក្រាំងលាវ ស្រុករលាប្អៀ ខេត្តកំពង់ឆ្នាំង ២.ស្ថានីយកំពង់ឆ្នាំង ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។

ក្រុមការងារបច្ចេកទេសក៏បានពិនិត្យរាល់ឧបករណ៍វាស់ស្ទង់ និងប្រព័ន្ធ Data Logger ដើម្បីធានាថាការបញ្ជូនទិន្នន័យទៅកាន់ម៉ាស៊ីនមេ (Server) ប្រព្រឹត្តទៅបានយ៉ាងល្អប្រសើរ ព្រមទាំងការទាញយកទិន្នន័យ (Download Data) រក្សាទុកផងដែរ។ បន្ថែមពីនេះ ក្រុមការងារក៏បានធ្វើការផ្លាស់ប្តូរស៊ីមកាត (SIM Card) អាគុយ (Battery) ម៉ូដឹម (Modem) និងផ្លាស់ប្តូរ Data Logger ១គ្រឿង ព្រមទាំងពិនិត្យឧបករណ៍វាស់កម្រិតទឹកភ្លៀង សីតុណ្ហភាព សំណើម ទិសដៅនិងល្បឿនខ្យល់ សម្ពាធបរិយាកាស។ បន្ថែមពីនេះ ក្រុមការងារបានកាប់ឆ្ការព្រៃ និងសម្អាតបរិវេណស្ថានីយទាំងមូល ដើម្បីជៀសវាងការរំខានដល់ដំណើរការចាប់សញ្ញារបស់ឧបករណ៍៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)