AKP ភ្នំពេញ ថ្ងៃទី១៣ ខែសីហា ឆ្នាំ២០២៦ -- សារព័ត៌មាន Manila Bulletin បានរាយការណ៍ថា រដ្ឋាភិបាលបារាំងកំពុងផ្តល់ហិរញ្ញប្បទានចំនួន២០០លានអឺរ៉ូ (ជិត ២៣១លានដុល្លារអាម៉េរិក) ដើម្បីជួយប្រជាជនហ្វីលីពីនដែលមានប្រាក់ចំណូលទាបក្នុងការទទួលបានសិទ្ធិទទួលបានអាហារដែលមានជីវជាតិកាន់តែប្រសើរឡើង ក្រោមកម្មវិធីសន្តិសុខស្បៀង និងអាហារូបត្ថម្ភថ្មីមួយ។

ក្រសួងហិរញ្ញវត្ថុហ្វីលីពីន (DOF) បាននិយាយកាលពីពេលថ្មីៗនេះថាប្រាក់កម្ចីដែលផ្តល់ដោយទីភ្នាក់ងារអភិវឌ្ឍន៍បារាំង (AFD) នឹងគាំទ្រដល់ការអនុវត្តគម្រោងកាត់បន្ថយអសន្តិសុខស្បៀង និងកង្វះអាហារូបត្ថម្ភជាមួយនឹងប័ណ្ណអេឡិចត្រូនិច (REFUEL)។

គម្រោងនេះត្រូវបានអនុវត្តដោយសម្របសម្រួលជាមួយក្រសួងសុខុមាលភាពសង្គម និងអភិវឌ្ឍន៍ហ្វីលីពីន (DSWD) ដែលត្រូវបានគេរំពឹងថានឹងផ្តល់អត្ថប្រយោជន៍ដល់គ្រួសារដែលមានប្រាក់ចំណូលទាបប្រហែល៧៥០.០០០គ្រួសារ។ គ្រួសារដែលមានសិទ្ធិទទួលបាននឹងទទួលបានប័ណ្ណអេឡិចត្រូនិចប្រចាំខែ ដែលអាចប្រើដើម្បីទិញអាហារពីអ្នកលក់រាយដែលមានការទទួលស្គាល់។

លោក ហ្រ្វេឌើរីក ហ្គោ រដ្ឋមន្ត្រីក្រសួងហិរញ្ញវត្ថុហ្វីលីពីន បាននិយាយថា កម្មវិធីនេះនឹងជួយគ្រួសារងាយរងគ្រោះទទួលបានអាហារដែលមានជីវជាតិដោយផ្ទាល់ និងទាន់ពេលវេលា។ ការធ្វើឌីជីថលកម្មសម្រាប់ដំណើរការជំនួយក៏នឹងធ្វើឱ្យប្រសើរឡើងនូវតម្លាភាព និងប្រសិទ្ធភាពក្នុងការចែកចាយធនធានផងដែរ។

បន្ថែមពីលើជំនួយស្បៀងអាហារ គ្រួសារដែលចូលរួមនឹងទទួលបានការអប់រំអាហារូបត្ថម្ភ និងការគាំទ្រជីវភាពរស់នៅ រួមទាំងការណែនាំអំពីអាហារូបត្ថម្ភមាតា និងកុមារ អនាម័យត្រឹមត្រូវ និងរបបអាហារដែលមានសុខភាពល្អ ក៏ដូចជាឱកាសបង្កើតប្រាក់ចំណូល។

គម្រោង REFUEL ត្រូវបានផ្តល់ហិរញ្ញប្បទានរួមគ្នាដោយធនាគារអភិវឌ្ឍន៍អាស៊ី (ADB) ដែលជាផ្នែកមួយនៃកិច្ចសហប្រតិបត្តិការកាន់តែទូលំទូលាយរវាងប្រទេសហ្វីលីពីន និងដៃគូអភិវឌ្ឍន៍របស់ខ្លួន ដើម្បីពង្រឹងប្រព័ន្ធការពារសង្គម និងគាំទ្រសហគមន៍ងាយរងគ្រោះ។

លោកស្រី ម៉ារី ហ្វុនតានែល ឯកអគ្គរដ្ឋទូតបារាំងប្រចាំប្រទេសហ្វីលីពីន បានស្វាគមន៍ចំពោះការប្តេជ្ញាចិត្តរបស់រដ្ឋាភិបាលហ្វីលីពីនក្នុងការរួមបញ្ចូលសកម្មភាពអាកាសធាតុ ការការពារមហាសមុទ្រ និងសុខុមាលភាពសង្គមទៅក្នុងរបៀបវារៈអភិវឌ្ឍន៍ជាតិរបស់ខ្លួន។

លោកស្រីបាននិយាយថា អាទិភាពទាំងនេះមានសារៈសំខាន់មិនត្រឹមតែសម្រាប់អនាគតរបស់ប្រទេសហ្វីលីពីនប៉ុណ្ណោះទេ ប៉ុន្តែថែមទាំងសម្រាប់ការពង្រឹងភាពធន់ និងការលើកកម្ពស់ការអភិវឌ្ឍប្រកបដោយចីរភាពផងដែរ។

ទន្ទឹមនឹងនេះ លោកស្រី បេណេឌីកតេ ហ្កាហ្សុន នាយកទីភ្នាក់ងារAFD ប្រចាំប្រទេសហ្វីលីពីន បាននិយាយថា គម្រោង REFUEL នឹងបន្ថែមវិមាត្រសង្គមដល់កិច្ចសហប្រតិបត្តិការអភិវឌ្ឍន៍រវាងប្រទេសបារាំង និងហ្វីលីពីន ដោយជួយគាំទ្រសហគមន៍ងាយរងគ្រោះ និងលើកកម្ពស់គំរូអភិវឌ្ឍន៍ដែលមានលក្ខណៈបរិយាបន្នកាន់តែច្រើននៅក្នុងប្រទេស៕

ដោយ៖ យា ចិន្ដាខន្ដី (ប្រភព៖ VNA)