AKPកំពង់ធំថ្ងៃទី ១៣ ខែ សីហា ឆ្នាំ ២០២៦--នៅសាលាស្រុកសណ្ដាន់នាព្រឹកថ្ងៃទី ១៣ ខែសីហាឆ្នាំ២០២៦បានរៀបចំពិធីជួបជុំសំណេះសំណាលនិងជូនដំណើរប្រជាពលរដ្ឋ វគ្គទី១ ចំនួន ១០៩ នាក់ ក្នុងចំណោមប្រជាពលរដ្ឋ លោកយាយលោកតា ដែលមានបញ្ហាជំងឺភ្នែក ចំនួន ៣២០ នាក់ទៅពិនិត្យនិងព្យាបាលជំងឺភ្នែកនៅមន្ទីរពេទ្យមិត្តភាពខ្មែរ-សូវៀតទីក្រុងភ្នំពេញ ។

ក្រោមការជួយឧបត្ថម្ភសម្របសម្រួលជាមួយលោកវេជ្ជបណ្ឌិត និងក្រុមគ្រូពេទ្យ ព្រមទាំងការជួយដោះស្រាយ ការហូបចុក និងស្នាក់នៅ ពីសំណាក់លោកជំទាវបណ្ឌិត ជា សេរី អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងឯកឧត្តមនាយឧត្តម សេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជា ការកងទ័ពជើងគោក អនុប្រធានក្រុមការងាររាជរដ្ឋាភិបាលចុះមូលដ្ឋានខេត្ត និងជាប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ ដែលបានជួយឧបត្ថម្ភគាំទ្រប្រេងឥន្ធនៈ និងមធ្យោបាយដឹកជញ្ជូន។

ដែលពិធីនេះស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេប ញ្ជាការតំបន់ប្រតិបត្តិការសឹករងកំពង់ធំ អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ ។

លោកស្រី ឡាក់ សៅចាន់ អភិបាលរងស្រុ កសណ្ដាន់ ដែលមានភារកិច្ចដឹកនាំលោកយាយលោកតា ដែលត្រូវទៅពិនិត្យនិងព្យាបាលជំងឺភ្នែកនៅទីក្រុងភ្នំពេញ បានឡើង​រាយការណ៍បញ្ជាក់ថា ចំនួនប្រជាពលរដ្ឋ និងលោកយាយលោកតា ដែលត្រូវអញ្ជើញទៅពិនិត្យ និងព្យាបាលជំងឺភ្នែកមានចំនួន ៣២០ នាក់ ដោយចែកចេញជាបីវគ្គ គឺ វគ្គទី១ ត្រូវចេញដំណើរនៅព្រឹកថ្ងៃទី ១៣ ខែ សីហានេះមានចំនួន ១០៩ នាក់ដោយរថយន្តក្រុងចំនួន ៨​គ្រឿងហើយ វគ្គទី២ ត្រូវចេញដំណើរនៅថ្ងៃទី ១៤​ ខែ សីហាចំនួន ១១០ នាក់ ដោយរថយន្តក្រុងចំនួន ៨​ គ្រឿង និងវគ្គទី៣​ ត្រូវចេញដំណើរនៅថ្ងៃទី ១៥​ ខែ សីហា ឆ្នាំ ២០២៦ ចំនួន ១០១ នាក់ ដោយមានរថយន្តចំនួន ៨​ គ្រឿង ។​

 ជាមួយ​នេះ​ដែរ​ ជំនួស​មុខ​ឱ្យប្រជាពលរ ដ្ឋ​ និង​លោក​យាយ​ លោក​តា​ ទាំង​អស់​ដែល​ត្រូវ​ទៅ​ពិនិត្យ​ និង​ព្យាបាល​ជំងឺ​ភ្នែក​ សូម​គោរព​ថ្លែង​អំណរគុណ​ដ៍​ជ្រាលជ្រៅ​ជាទីបំផុត​ចំពោះ​សម្តេច​មហា​បវរ​ធិបតី​ ហ៊ុន​ ម៉ាណែត​ និង​លោក​ជំទាវ​ និង​សូម​គោរព​ជូនពរ​សម្តេច​ និងលោក​ជំទាវ​ សូម​ទទួល​បាន​នូវ​ពុទ្ធ​ពរ​ទាំង​បួន​ប្រការ​កុំបី​ឃ្លៀង​ឃ្លាត​ឡើយ​ ។ 

ឧត្តមសេនីយ៍ទោ សោម ស៊ុន ក្នុងនាមអនុប្រធានក្រុមការងាររបស់រាជរ ដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈលោកជំទាវបណ្ឌិត ជា សេរី និងឯកឧត្តមនាយឧត្តមសេនីយ៍ ម៉ៅ សុផាន់ ដែលបានយកចិត្តទុកដាក់ខ្ពស់បំផុតដល់សុខទុក្ខ ជីវភាពរស់នៅ និងសុខុមាលភាពរបស់ប្រជាពលរដ្ឋនៅក្នុងស្រុកសណ្ដាន់ ពិសេសចំពោះលោកយាយលោកតា ដែលត្រូវបានយកចិត្តទុកដាក់ក្នុងការសម្របសម្រួលជាមួយក្រុមគ្រូពេទ្យឯកទេសពិនិត្យ និងព្យាបាលជំងឺភ្នែក នៅមន្ទីរពេទ្យមិត្តភាពខ្មែរ សូវៀត​ ព្រមទាំងបានជួយដោះស្រាយការហូបចុក ការស្នាក់នៅ និងការដឹកជញ្ជូនពួកគាត់ទាំងទៅទាំងមក តាមផែនការដែលបានគ្រោងទុកប្រកបដោយ​ស្មារតី​ទទួល​ខុសត្រូវ​ខ្ពស់​  និងបានសូមគោរពជូនពរដល់លោកយាយលោកតា ដែលត្រូវអញ្ជើញទៅពិនិត្យ និងព្យាបាលជំងឺភ្នែកនៅទីក្រុងភ្នំពេញ​ សូមមប្រកបដោយជោគជ័យ និងសុវត្ថិភាព ក្នុងការស្នាក់នៅ និងធ្វើដំណើរទាំងពេលទៅនឹងពេលត្រឡប់មកវិញ៕ដោយ៖ ស៊ុម វណ្ណា