AKPបន្ទាយមានជ័យថ្ងៃទី១៣ខែសីហាឆ្នាំ២០២៦--លោកស្រីមុំពុទ្ធីតា អភិបាលរងខេត្ត និងជាប្រធានលេខាធិការដ្ឋាននៃគណៈ កម្មាធិការប្រយុទ្ធប្រឆាំងអំពើជួញដូរមនុស្សខេត្តបន្ទាយមានជ័យ (គ.ខ.ប.ជ) បានថ្លែងអំពាវនាវ និងជំរុញយ៉ាងទទូចដល់គ្រប់ភាគីពាក់ព័ន្ធទាំងអស់ ឱ្យបន្តរួមដៃគ្នាក្នុងស្មារតីទទួលខុសត្រូវខ្ពស់ ដើម្បីធ្វើឱ្យការងារប្រយុទ្ធប្រឆាំងអំពើជួញដូរមនុស្សកាន់តែមានប្រសិទ្ធភាព និងចេញជាលទ្ធផលជាក់ស្តែងបន្ថែមទៀត ដើម្បីធានាសន្តិសុខ សុវត្ថិភាព និងកិច្ចការពារសិទ្ធិមនុស្សនៅក្នុងខេត្តជាប់ព្រំដែនមួយនេះ។

ការថ្លែងបែបនេះរបស់លោកស្រីមុំពុទ្ធីតាបានធ្វើឡើងនៅក្នុងកិច្ចប្រជុំបូកសរុបលទ្ធផលការងារប្រចាំខែកក្កដា ឆ្នាំ២០២៦ របស់លេខាធិការដ្ឋាន គ.ខ.ប.ជ ខេត្តបន្ទាយមានជ័យ នាព្រឹកថ្ងៃព្រហស្បតិ៍ ទី១៣ ខែសីហា ឆ្នាំ២០ ២៦ នេះ នៅសាលប្រជុំក្រុមប្រឹក្សាខេត្ត ។

លោកស្រីអភិបាលរងខេត្ត បានគូសប ញ្ជាក់ថា បញ្ហាអំពើជួញដូរមនុស្សគឺជាប្រធានបទដ៏ស្មុគស្មាញ ដែលទាមទារឱ្យមានកិច្ចសហការជិតស្និទ្ធរវាងអាជ្ញាធរដែនដី និងកងកម្លាំងប្រដាប់អាវុធត្រូវបង្កើនការល្បាត ការឃ្លាំមើលតាមច្រកព្រំដែន និងការផ្លាស់ប្តូរព័ត៌មានទាន់ពេលវេលា។មន្ទីរ អង្គភាពជំនាញ ជួយជ្រោមជ្រែងលើការអប់រំ ផ្សព្វផ្សាយ និងផ្តល់សេវាគាំទ្រផ្នែកច្បាប់ និងសង្គមកិច្ច។

អង្គការដៃគូអភិវឌ្ឍន៍ និងសង្គមស៊ីវិល ចូលរួមក្នុងយន្តការការពារ ជួយសង្គ្រោះ និងស្តារនីតិសម្បទាជនរងគ្រោះ។

"ការលុបបំបាត់អំពើជួញដូរមនុស្សមិនមែនជាភារកិច្ចដាច់ដោយឡែករបស់ស្ថាប័នណាមួយឡើយ ប៉ុន្តែវាជាការទទួលខុសត្រូវរួមគ្នារបស់យើងទាំងអស់គ្នា ដើម្បីការពារកិត្តិយស និងសុវត្ថិភាពរបស់ប្រជាពលរដ្ឋ។" 

ដើម្បីបង្កើនប្រសិទ្ធភាពការងារឱ្យកាន់តែខ្លាំងក្លា លោកស្រី មុំ ពុទ្ធីតា បានដាក់ចេញនូវអនុសាសន៍ និងទិសដៅសំខាន់ៗមួយចំនួនពង្រឹងការផ្សព្វផ្សាយ និងអប់រំត្រូវចុះអប់រំដោយផ្ទាល់ដល់មូលដ្ឋាន ជាពិសេសតំបន់ប្រឈម និងតាមច្រកព្រំដែន ដើម្បីឱ្យប្រជាពលរដ្ឋយល់ដឹងពីល្បិចកលថ្មីៗរបស់ជនខិ លខូច។

បង្កើនការអនុវត្តច្បាប់ និងស្រាវជ្រាវបង្ក្រាបមេខ្យល់ ឬបណ្តាញជួញដូរមនុស្សដោយគ្មានការលើកលែង។

ការផ្តល់សេវាកម្ម និងកិច្ចការពារជនរងគ្រោះ ធានាថាជនរងគ្រោះទទួលបានការការពារ ស្តារស្មារតី និងជួយជ្រោមជ្រែងបណ្តុះបណ្តាលវិជ្ជាជីវៈដើម្បីធ្វើសមាហរណកម្មចូលក្នុងសង្គមវិញដោយសុវត្ថិភាព។     

អង្គប្រជុំនាព្រឹកនេះ មានការអញ្ជើញចូលរួមពីសំណាក់ លោក លោកស្រី ជាប្រធាន-អនុប្រធានមន្ទីរ អង្គភាពជុំវិញខេត្ត កងកម្លាំងទាំងបីប្រភេទ អភិបាលក្រុង-ស្រុក តំណាងអង្គការដៃគូអភិវឌ្ឍន៍ ព្រមទាំងមន្ត្រីពាក់ព័ន្ធនៃលេខាធិការដ្ឋាន គ.ខ.ប.ជ ខេត្តយ៉ាងច្រើន ដែលនេះ បានស្តែងឱ្យឃើញពីឆន្ទៈ និងការប្តេជ្ញាចិត្តរួមគ្នាយ៉ាងពិតប្រាកដ ក្នុងបេសកកម្មបម្រើជាតិ និងការពារប្រជាពលរដ្ឋចេញពីគ្រោះថ្នាក់នៃអំពើជួញដូរមនុស្ស៕

ដោយ៖ឈុនសារ៉ាត