AKP បន្ទាយមានជ័យ ថ្ងៃទី១២ ខែសីហា ឆ្នាំ២០២៦--ការងារមនុស្សធម៌នៅតែជាសសរទ្រូងយ៉ាងរឹងមាំក្នុងការជួយសង្គ្រោះ និងបម្រើប្រជាពលរដ្ឋនៅតាមមូលដ្ឋានផ្ទាល់។ ឈរលើស្មារតីយកចិត្តទុកដាក់ខ្ពស់ និងការចង្អុលបង្ហាញពី ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ កាលពីថ្ងៃទី១១ ខែសីហា ឆ្នាំ២០២៦ កន្លងទៅនេះ ក្រុមប្រតិបត្តិសាខាបានចុះបេសកកម្មរៀបចំវគ្គអប់រំបំប៉នសមត្ថភាពយ៉ាងសកម្មជូនដល់អ្នកស្ម័គ្រចិត្តកាកបាទក្រហមសរុបចំនួន ៥៩នាក់ (ស្រី ១៩នាក់) មកពីឃុំចំនួនពីរ ក្នុងស្រុកព្រះនេត្រព្រះ។

លោកស្រី សុខ លាភា នាយិកាសាខាកាកបាទក្រហមកម្ពុជាខេត្តបន្ទាយមានជ័យ បានប្រាប់ឱ្យដឹងថា វគ្គបណ្តុះបណ្តាលដ៏មានសារៈសំខាន់នេះត្រូវបានរៀបចំឡើងក្នុងគោលបំណងពង្រឹងចំណេះដឹង បណ្តុះស្មារតីលះបង់ និងបង្កើនជំនាញជាក់ស្តែងដល់កម្លាំងស្ម័គ្រចិត្តនៅថ្នាក់មូលដ្ឋាន ដោយផ្តោតសំខាន់លើចំណុចគន្លឹះចំនួន ៣គឺ៖ ១. ប្រវត្តិចលនាកាកបាទក្រហម និងអឌ្ឍចន្ទក្រហម៖ ការយល់ដឹងពីប្រភពដើម និងបេសកកម្មបម្រើប្រជាជាតិ។ ២. គោលការណ៍គ្រឹះទាំង ៧៖ ការក្រសោបយកស្មារតី មនុស្សធម៌ ភាពមិនលំអៀង អព្យាក្រឹតភាព ឯករាជ្យភាព សេវាកម្មស្ម័គ្រចិត្ត ឯកភាព និងសកលភាព មកធ្វើជាប្រទីបបំភ្លឺផ្លូវក្នុងការប្រតិបត្តិការងារ និង៣. វិជ្ជាសង្គ្រោះបឋម ៖ ការបណ្តុះបណ្តាលបច្ចេកទេស និងជំនាញជាក់ស្តែង ក្នុងការជួយសង្គ្រោះជីវិតជនរងគ្រោះ ឬអ្នកដែលមានគ្រោះថ្នាក់ជាយថាហេតុ ឱ្យបានទាន់ពេលវេលាមុនពេលបញ្ជូនទៅមន្ទីរពេទ្យ។

យោងតាមរបាយការណ៍ពីសាខាកាកបាទក្រហមកម្ពុជា ខេត្តបន្ទាយមានជ័យ បានឱ្យដឹងថា សិក្ខាកាមដែលជាអ្នកស្ម័គ្រចិត្តទាំង ៥៩នាក់ នោះ រួមមានឃុំប្រាសាទ មានអ្នកចូលរួមចំនួន ២៤នាក់ (ស្រី ០៤នាក់) ឃុំទឹកជោរមានអ្នកចូលរួមចំនួន ៣៥នាក់ (ស្រី ១៥នាក់)។  ការចុះពង្រឹងសមត្ថភាពដល់ផ្ទាល់ដីនាពេលនេះ មិនត្រឹមតែជាការបំពេញបន្ថែមនូវចំណេះដឹងផ្នែកទ្រឹស្តី និងបច្ចេកទេសសង្គ្រោះប៉ុណ្ណោះទេ ប៉ុន្តែថែមទាំងជាការដាស់តឿនក្រើនរំលឹក និងលើកទឹកចិត្តដល់កម្លាំងស្ម័គ្រចិត្តទាំងអស់ ឱ្យបន្តដើរតួនាទីជាប្រឡាយភ្ជាប់ទំនាក់ទំនងយ៉ាងជិតស្និទ្ធរវាងកាកបាទក្រហមកម្ពុជា និងប្រជាពលរដ្ឋរងគ្រោះ ឬងាយរងគ្រោះបំផុត នៅក្នុងសហគមន៍របស់ពួកគេ។

តាមរយៈវគ្គបំប៉ននេះ អ្នកស្ម័គ្រចិត្តទាំងអស់នឹងក្លាយជាកម្លាំងចលករដ៏មានឥទ្ធិពល និងជា អ្នកឆ្លើយតបមុនគេ ប្រកបដោយទំនួលខុសត្រូវ និងវិជ្ជាជីវៈ ក្នុងការចុះជួយអន្តរាគមន៍ សង្គ្រោះ និងសម្រាលទុក្ខលំបាករបស់ប្រជាពលរដ្ឋ ស្របតាមបាវចនា «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណាម្នាក់ចោលឡើយ»៕

ដោយ ឈុន សារ៉ាត