AKP ស្ទឹងត្រែង ថ្ងៃទី១២ ខែសីហា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នាព្រឹកថ្ងៃពុធទី១២ ខែសីហា ឆ្នាំ២០២៦នេះ នឹងអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលនានាក្នុងក្រុង​ស្ទឹងត្រែង ខេត្តស្ទឹងត្រែង។

សមិទ្ធផលដែល សម្តេចមហាបវរធិបតីនាយករដ្ឋមន្រ្តី នឹងសម្ពោធដាក់ឱ្យប្រើប្រាស់ជាផ្លូវការ​រួមមាន ទីលានតេជោធិបតី និងវេទិកានាគជ័យ, សួនបវរធិបតី, សួនសុវណ្ណភូមិ និងសួនស្វាគមន៍រូបម្នាស់ទឹកឃ្មុំ។

ខេត្តស្ទឹងត្រែង ស្ថិតនៅភាគឦសាននៃប្រទេស មានព្រំប្រទល់ខាងជើងជាប់ខេត្តពីរនៃសាធារណរដ្ឋប្រជាធិបតេយ្យប្រជាមានិតឡាវ គឺខេត្តចំប៉ាសាក់ និងខេត្តអាត់តាពើ ដែលមានបណ្ដោយព្រំដែនប្រមាណ ២៥៥គីឡូម៉ែត្រ ចាប់ពីបង្គោលព្រំដែនលេខ ០២៩ ដល់បង្គោលព្រំដែនលេខ ០៩៧ មានខ្សែព្រំដែនដើរតាមផ្លូវគោកប្រមាណ ១៨៦គីឡូម៉ែត្រ ខ្សែព្រំដែនដើរតាមផ្លូវទឹកប្រមាណ ៦៩គីឡូម៉ែត្រ ខាងត្បូងជាប់ខេត្តក្រចេះ និងខេត្តមណ្ឌលគិរី ខាងកើតជាប់ខេត្តរតនគិរី និងខាងលិចជាប់នឹងខេត្តព្រះវិហារ និងខេត្តកំពង់ធំ។ សណ្ឋានដីជាតំបន់ខ្ពង់រាប មានវាលទំនាប និងភ្នំខ្ពស់ៗនៅជ្រុងទិសឦសាន។

ខេត្តមានទន្លេបួនហូរកាត់គឺទន្លេមេគង្គ ទន្លេកុង (សេកុង) ទន្លេសាន (សេសាន) និងទន្លេស្រែពក ដែលទន្លេមេគង្គកាត់ចំកណ្ដាលខេត្ត ពីជើងទៅត្បូងចាប់ពីព្រំប្រទល់ប្រទេសឡាវដល់ខេត្តក្រចេះ ជាប្រភពនៃធនធានមច្ឆជាតិ និងប្រព័ន្ធជីវៈចម្រុះអេកូឡូហ្ស៊ី។

ខេត្តមានផ្ទៃដី ១២.០១៦គីឡូម៉ែត្រការ៉េ ផ្ទៃដីខេត្តគ្របដណ្ដប់ភាគច្រើនដោយព្រៃឈើជាង ៦៧% ផ្ទៃដីបង្កបង្កើនផលប្រមាណ ២១% ផ្ទៃដីវារីវប្បកម្មនិងប្រភពទឹក ៣% ផ្ទៃដីវាលស្មៅ-ហួតហែង ១% និងដីលំនៅឋានប្រមាណ ៨%។ ដីពុំសូវមានជីជាតិច្រើន តែមានភាពអនុគ្រោះលើផ្នែកកសិឧស្សាហកម្ម។

​ក្នុងការគ្រប់គ្រងរដ្ឋបាលដែនដីចែកជា ៦ក្រុង ស្រុក ៣៤ឃុំ សង្កាត់ និង១៣៧ភូមិ មានប្រជាពលរដ្ឋសរុប ១៩១.០៧១នាក់ (ស្រី ៩៤.១៨៦នាក់) ស្មើនឹង ៤៦.០៨៣គ្រួសារ ប្រជាពលរដ្ឋមានអាយុ ១៨ឆ្នាំឡើង ១១៨.៦៤២នាក់ (ស្រី ៥៨.៧៦២នាក់) មានអត្រាកំណើនប្រចាំឆ្នាំ ៥% ដង់ស៊ីតេប្រជាជន ១៦នាក់ ក្នុង១គីឡូម៉ែត្រការ៉េ។

ប្រជាពលរដ្ឋមានមុខរបរកសិកម្មជាង ៧៦% ពាណិជ្ជកម្ម ៥% សិប្បកម្ម ៤% ចិញ្ចឹមសត្វ ៣% និងនេសាទ ១%។ ផលិតផលក្នុងស្រុកសរុបប្រចាំឆ្នាំប្រមាណជា ៣៦៩លានដុល្លារសហរដ្ឋអាមេរិក ក្នុងនោះ ផ.ស.ស. សម្រាប់ប្រជាជនម្នាក់ ១.៨៩៨ដុល្លារ អត្រាភាពក្រីក្រស្ថិតក្នុងរង្វង់ ១៧%៕

ដោយ៖ គង់ សិរីរ័ត្ន