AKP កំពង់ស្ពឺ ថ្ងៃទី១០ ខែសីហា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ  អភិបាល នៃគណៈអភិបាលខេត្តកំពង់ ស្ពឺ បានអញ្ជើញជាអធិបតីភាពក្នុងពិធីបើកហឹបវិញ្ញាសាប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ថ្ងៃទី១០ ខែសីហា ឆ្នាំ២០២៦ នៅមណ្ឌលប្រឡងវិទ្យាល័យកំពង់ស្ពឺ ដោយមានការចូលរួមពីតំណាងក្រសួងអប់រំ យុវជន និងកីឡា លោក- លោកស្រីប្រធានមណ្ឌល អនុរក្ស ព្រមទាំងអាជ្ញាធរដែនដី និងកងកម្លាំងប្រដាប់អាវុធពាក់ព័ន្ធយ៉ាងច្រើនកុះករ។

‎

‎ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានសម្តែងនូវការកោតសរសើរដល់គណៈកម្មការរៀបចំការប្រឡងទាំងអស់ ដែលបានខិតខំបំពេញភារកិច្ចយ៉ាងសកម្ម ដើម្បីធានាឱ្យដំណើរការប្រឡងប្រព្រឹត្តទៅដោយរលូន ប្រកបដោយតម្លាភាព និងយុត្តិធម៌។

‎

‎ជាមួយគ្នានេះ ឯកឧត្តមបានផ្តាំផ្ញើសារ និងលើកទឹកចិត្តឱ្យក្មួយៗសិស្សានុ សិស្សទាំងអស់ ខិតខំប្រឹងប្រែងប្រើប្រាស់ចំណេះដឹង និងសមត្ថភាពដែលបានខិតខំរៀនសូត្រកន្លងមកឱ្យអស់ពីលទ្ធភាព។

ឯកឧត្តមបានរំលឹកឱ្យក្មួយៗត្រូវគោរពបទបញ្ជាផ្ទៃក្នុងនៃការប្រឡងឱ្យបានខ្ជាប់ខ្ជួន ដោយមិនត្រូវនាំយកឯកសារ ឬឧបករណ៍អេឡិចត្រូនិកផ្សេងៗចូលក្នុ ងបន្ទប់ប្រឡងឡើយ ព្រមទាំងត្រូវថែរក្សាសុខភាព និងរក្សាស្មារតីឱ្យបានស្ងប់ស្ងាត់ មានទំនុកចិត្តលើខ្លួនឯង។‎

‎ជាមួយនោះ អភិបាលខេត្តកំពង់ស្ពឺ បានគូបញ្ជាក់ថាបេក្ខជនដែលប្រឡងជាប់ទទួលបាន និទ្ទេស A នឹងទទួលបានការលើកទឹកចិត្តជារង្វាន់ កុំព្យូទ័រ ១គ្រឿង ពី ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ។

‎

បន្ថែមពីនេះ ឯកឧត្តមបណ្ឌិត អភិបាលខេត្ត ក៏បានណែនាំដល់គណៈកម្មការប្រឡង និងកងកម្លាំងមានសមត្ថកិច្ចទាំងអស់ ត្រូវបំពេញភារកិច្ចដោយស្មារតីទទួលខុសត្រូវខ្ពស់ ស្របតាមគោលការណ៍ «អ្នកចេះគឺជាប់» ព្រមទាំងសហការគ្នាយ៉ាងម៉ឺងម៉ាត់ ដើម្បីធានាឱ្យបាននូវសន្តិសុខ សុវត្ថិភាព និងសណ្ដាប់ធ្នាប់ល្អនៅតាមគ្រប់មណ្ឌលប្រឡងទាំងអស់ក្នុងខេត្ត។‎

គួរបញ្ជាក់ផងដែរថា៖ តាមរបាយការណ៍ លោក ថន ថារិន ប្រធានមន្ទីរអប់រំ យុវជន និងកីឡា ខេត្តកំពង់ស្ពឺ បានឱ្យដឹងថា ក្នុងថ្ងៃទីមួយនៃសម័យប្រឡងនេះ មន្ទីរបានរៀបចំមណ្ឌលប្រឡងចំនួន ១៣មណ្ឌល ដែលមានចំនួន ២៤៥បន្ទប់ ក្នុងនោះថ្នាក់វិទ្យាសាស្ត្រចំនួន២មណ្ឌល ស្មើនិង៤០បន្ទប់ ថ្នាក់វិទ្យាសាស្ត្រសង្គម១១មណ្ឌលស្មើនិង២០៥បន្ទប់។  ចំពោះបេក្ខជនប្រឡង មានចំនួន៦០៨៨នាក់(ស្រី៣៤៦៨នាក់)។ ក្នុងនោះបេក្ខជនថ្នាក់វិទ្យាសាស្ត្រសង្គមចំនួន៥១២២នាក់(ស្រី២៨៥២នា ក់) ហើយក្នុងចំណោមបេក្ខជនទាំងអស់ មានបេក្ខជនប្រឡងភាសាអង់គ្លេសចំនួន៦០២៥នាក់ (ស្រី៣៤៣៤នាក់)និងបេក្ខជនប្រឡងភាសាបារាំងចំនួន៦៣នាក់ (ស្រី៣៤នាក់) ៕

ដោយ៖ ម៉ែន ប៊ុនធីម