AKP ព្រះវិហារ ថ្ងៃទី៦ ខែសីហា ឆ្នាំ២០២៦ -- ការលះបង់ និងភាពក្លាហានរបស់បងប្អូនកងទ័ពនៅសមរភូមិមុខ តែងតែទទួលបាននូវការគិតគូរ និងគាំទ្រយ៉ាងពេញទំហឹងពីសមរភូមិក្រោយជានិច្ច។ ជាក់ស្តែង នាព្រឹកថ្ងៃទី០៦ ខែសីហា ឆ្នាំ២០២៦នេះ លោកជំទាវ ខូយ ប៊ុនថាន សមាជិកក្រុមប្រឹក្សាខេត្តព្រះវិហារ និងលោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ និងសហការី បាននាំយកស្បៀងអាហារដែលជាអំណោយដ៏ថ្លៃថ្លារបស់ លោកជំទាវ សុខា គងពិសី គីម រិទ្ធី ទៅប្រគល់ជូនដោយផ្ទាល់ដល់កងទ័ពសមរភូមិមុខ ចំនួន ២អង្គភាព ចំណុះឱ្យកងពលតូចអន្ដរាគមន៍លេខ៨ ដែលកំពុងឈរជើងការពារបូរណភាពទឹកដី ប្រចាំទិសទី១ ប្រាសាទព្រះវិហារ។

ក្នុងឱកាសនោះ លោកជំទាវ ខូយ ប៊ុនថាន បានគូសបញ្ជាក់ថា ជំនួយ និងអំណោយស្បៀងអាហារនាពេលនេះ គឺជាទឹកចិត្តដ៏សប្បុរស និងថ្លៃថ្លាបំផុតរបស់ លោកជំទាវ សុខា គងពិសី គីម រិទ្ធី តាមរយៈមន្ទីរព័ត៌មានខេត្តព្រះវិហារ។ លោកជំទាវបានពាំនាំនូវប្រសាសន៍ផ្តាំផ្ញើសាកសួរសុខទុក្ខ ប្រកបដោយក្តីនឹករលឹកយ៉ាងជ្រាលជ្រៅពីសំណាក់ថ្នាក់ដឹកនាំនៅជួរក្រោយ ជូនចំពោះវីរកងទ័ពទាំងអស់នៅជួរមុខ ដែលជានិច្ចកាល ថ្នាក់ដឹកនាំតែងតែនឹកឃើញ និងយកចិត្តទុកដាក់ពីសុខទុក្ខរបស់បងប្អូនកងទ័ពគ្រប់ពេលវេលា។

ជាមួយគ្នានេះ លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ បានសម្តែងនូវការគោរពកោតសរសើរ និងបានជូនពរដល់វីរកងទ័ពទាំងអស់ ឱ្យមានសុខភាពល្អបរិបូរណ៍ កម្លាំងមាំមួន និងទទួលបានជោគជ័យគ្រប់ភារកិច្ច ជាពិសេសទទួលបានជ័យជម្នះក្នុងគ្រប់សមរភូមិ ក្នុងបុព្វហេតុដ៏ឧត្តុង្គឧត្តម នៃការការពារបូរណភាពទឹកដី និងអធិបតេយ្យភាពជាតិ។

ជាការឆ្លើយតប តំណាងវីរកងទ័ព នៃកងពលតូចអន្តរាគមន៍លេខ៨ បានសម្តែងនូវក្តីរំភើបរីករាយយ៉ាងក្រៃលែង ចំពោះការយកចិត្តទុកដាក់ និងក្តីស្រឡាញ់ពីសមរភូមិក្រោយ ដោយចាត់ទុកអំណោយ និងវត្តមានផ្ទាល់នាពេលនេះ គឺជាការផ្តល់កម្លាំងចិត្តដ៏ធំធេង ធ្វើឱ្យកងទ័ពកាន់តែមានទឹកចិត្តក្លាហាន និងរឹងមាំបន្ថែមទៀត។ ទន្ទឹមនេះ ដើម្បីតបស្នងសងគុណចំពោះទឹកចិត្តដ៏ប្រពៃរបស់សមរភូមិក្រោយ វីរកងទ័ពទាំងអស់បានប្តេជ្ញាចិត្តយ៉ាងមុតមាំថា នឹងឈរជើងការពារបូរណភាពទឹកដីនៃមាតុភូមិឱ្យបានគង់វង្ស និងប្តូរផ្តាច់ការពាររហូតដល់ដំណាក់កាលចុងក្រោយ។

សូមជម្រាបជូនថា អំណោយដែលបានឧបត្ថម្ភនាឱកាសនោះ រួមមាន ទឹកបរិសុទ្ធចំណុះ ១ ៥០០មីលីលីត្រចំនួន ៤០០យួរ (ស្មើនឹង ២០០កេស) ភេសជ្ជៈ V-Active ចំនួន ៥០កេស និងមីកញ្ចប់ចំនួន ២០០កេស រួមជាមួយអាហារស្រស់ៗ ដូចជា សាច់គោ ៤០គីឡូក្រាម សាច់ជ្រូក ៤០គីឡូក្រាម សាច់មាន់ ៤០គីឡូក្រាម ព្រមទាំងបន្លែស្រស់ៗចំនួន ៣មុខ ដោយក្នុងមួយមុខៗមានទម្ងន់ ១០គីឡូក្រាម៕

ដោយ៖ រិទ្ធី, ប្រភព៖ មន្ទីរព័ត៌មានខេត្ដព្រះវិហារ