AKP ភ្នំពេញ ថ្ងៃទី០៦ ខែសីហា ឆ្នាំ២០២៦ -- វេទិកា FireScope AI ដែលជាប្រព័ន្ធបញ្ញាសិប្បនិម្មិតដំបូងគេដែលត្រូវបានរចនាឡើងសម្រាប់ព្យាករណ៍ហានិភ័យភ្លើងឆេះព្រៃ ត្រូវបានពង្រីកវិសាលភាពរបស់ខ្លួនពីទ្វីបអឺរ៉ុបទៅកាន់តំបន់ធំៗនៃទ្វីបអាស៊ី។ ដោយត្រូវបានបង្កើតឡើងនៅប្រទេសប៊ុលហ្គារីដោយវិទ្យាស្ថាន INSAIT នៅសាកលវិទ្យាល័យសូហ្វីយ៉ា វេទិកានេះផ្តល់នូវផែនទីហានិភ័យដែលមានគុណភាពបង្ហាញខ្ពស់ជាបន្តបន្ទាប់ដោយវិភាគរូបភាពផ្កាយរណប ដី និងទិន្នន័យអាកាសធាតុ ដូចជាសីតុណ្ហភាព និងភាពស្ងួតនៃរុក្ខជាតិជាដើម។

ការពង្រីកនេះកើតឡើងនៅពេលវេលាដ៏សំខាន់មួយ ដោយសារសីតុណ្ហភាពខ្ពស់ និងស្ថានភាពស្ងួត ដែលបង្កើនការគំរាមកំហែងភ្លើងឆេះព្រៃនៅទូទាំងពិភពលោក។ នៅទ្វីបអាស៊ី វេទិកា FireScope AI បានបង្ហាញថាមានប្រសិទ្ធភាពជាងសន្ទស្សន៍អាកាសធាតុភ្លើងឆេះព្រៃស្តង់ដារដោយកំណត់អត្តសញ្ញាណតំបន់ដែលមានហានិភ័យខ្ពស់ ដែលក្រោយមកបានជួបប្រទះនឹងភ្លើងឆេះព្រៃ ៧០% បើប្រៀបធៀបទៅនឹងអត្រាភាពត្រឹមត្រូវ ៦២% របស់សន្ទស្សន៍។

ដើម្បីជួយអាជ្ញាធរមូលដ្ឋាន អ្នកឆ្លើយតបបន្ទាន់ និងសាធារណជនវេទិកា FireScope AI ផ្តល់នូវការពន្យល់ និងការវាយតម្លៃហានិភ័យយ៉ាងច្បាស់លាស់ជា ៤៣ភាសា រួមទាំងចំណុចប្រទាក់ប៊ុលហ្គារីដែលទើបបន្ថែមថ្មី។ ព្រឹត្តិការណ៍សំខាន់នេះស្របនឹងគោលដៅរបស់វិទ្យាស្ថាន INSAIT ក្នុងការផ្លាស់ប្តូរវេទិកា FireScope ទៅជាវេទិកាសកលលោក ដែលធ្វើឱ្យបច្ចេកវិទ្យាបង្ការភ្លើងឆេះព្រៃកម្រិតខ្ពស់អាចចូលដំណើរការបានទូទាំងពិភពលោក៕

ដោយ៖ យា ចិន្ដាខន្ដី (ប្រភព៖ BTA)