AKP ព្រះសីហនុ ថ្ងៃទី៣ ខែសីហា ឆ្នាំ២០២៦--ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ាង ស៊ីណេត អភិបាល នៃគណៈអភិ បាលខេត្តព្រះសីហនុបាននាំយកទៀនព្រះវស្សា ទេយ្យទាន និងបច្ច័យវេប្រគេនព្រះសង្ឃគង់ចាំព្រះវស្សានៅក្នុងវត្តទូទាំងខេត្តព្រះសីហនុចំនួន ៤៣វត្ត។កម្មវិធីវេប្រគេនទៀនវស្សា ទេយ្យទាន និងបច្ច័យនេះ បានរៀបចំធ្វើនៅមជ្ឈមណ្ឌលវិបស្សនាធុរៈគិរីនាគវ័ន (ហៅវត្តសមាធិ) ស្ថិតនៅសង្កាត់រាម ក្រុងកំពង់សោម ខេត្តព្រះសីហនុ នៅព្រឹកថ្ងៃចន្ទទី៣ ខែសីហា ឆ្នាំ២០២៦នេះ។

ក្នុងឱកាសនោះ ក៏មានវត្តមានចូលរួមពីសំណាក់ឯកឧត្តម លោកជំទាវ សមាជិកក្រុមប្រឹកស្សាខេត្ត លោក លោកស្រីអភិ បាលរងខេត្ត លោកអភិបាលក្រុង ស្រុក ប្រធានមន្ទីរ អង្គភាព កងកម្លាំងប្រដាប់អាវុធ និងពុទ្ធបរិស័ទ្ធក្នុងខេត្តព្រះសីហនុ ។

ក្នុងឱកាសនោះ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានបូជាទៀនធូប កម្រងផ្កា សមាទានសីល និងវេរប្រគេនទៀនព្រះវស្សា ទេយ្យទាន គ្រឿងឧបភោគបរិភោគ ថ្វាយព្រះមេគណខេត្តព្រះសីហនុ និងព្រះចៅអធិការវត្តទាំង៤៣ នៅមជ្ឈមណ្ឌលវិបស្សនា ធុរៈគិរីនាគវ័ន (ហៅវត្តសមាធិ) ស្ថិតនៅសង្កាត់រាម ក្រុងកំពង់សោម ខេត្តព្រះសីហនុប្រកបដោយ សុទ្ធាជ្រះថ្លា ។

សូមរម្លឹកថា ពិធីបុណ្យចូលព្រះវស្សានេះ រដ្ឋបាលខេត្តព្រះសីហនុបានរៀបចំប្រារព្ធធ្វើឡើងជារៀងរាល់ឆ្នាំចាប់ពីថ្ងៃ១រោច ខែអាសាធ ដល់ថ្ងៃ១៥ កើត ខែអស្សុជ ហើយប្រជាពុទ្ធបរិស័ទខ្មែរដែលជាអ្នកកាន់ជំនឿមុតមាំលើព្រះពុទ្ធសាសនាតែងតែបាននាំយកទៀនចំណាំព្រះវស្សា និងទេយ្យទានផ្សេងៗយកមកប្រគេនព្រះសង្ឃគង់ចាំព្រះវស្សាក្នុងរយៈពេលប្រមាណ ៣ខែ នៅ តាមទីអារាមនានា សម្រាប់ទ្រទ្រង់ចង្ហាន់ដល់ព្រះសង្ឃក្នុងកំលុងរដូវចូលវស្សា។

ក្នុងឱកាសនោះ ឯកឧត្តមប្រធានក្រុមប្រឹក្សាខេត្ត និងឯកឧត្តម អភិបាលខេត្តបាននាំយកទៀនព្រះវស្សា ទេយ្យទាន គ្រឿងឧប ភោគ បរិភោគ និងថវិកាជូនវត្តនិមួយៗ រួមមាន៖ ទៀនព្រះវស្សា ១គូរ, កម្ពស់ ១,៦០ម៉ែត្រ និងគ្រឿងឧបភោគបរិភោគ ១៦មុខ និងបច្ច័យកសាងវត្តក្នុងមួយវត្ត ១ ៥៨០ ០០០លានរៀល និងប្រគេនព្រះសង្ឈចូលរួម ៤៣អង្គ ១អង្គ ២០ម៉ឺនរៀល ព្រមទាំងចែកជូនក្រណាត់ស និងថវិកាជូនយាយជី តាជីដែលបានចូលរួមផងដែរ ៕

ដោយ ងូ សុមុនី