AKP ភ្នំពេញ ថ្ងៃទី៣០ ខែកក្កដា ឆ្នាំ ២០២៦ -- អគ្គលេខាធិការដ្ឋានព្រឹទ្ធសភា នាថ្ងៃទី៣០ ខែកក្កដា ឆ្នាំ២០២៦ នេះ បានរៀបចំកម្មវិធីធ្វើបទបង្ហាញចែករំលែកចំណេះដឹង ស្តីពី «ការវិភាគគោលនយោបាយ និងវិធីសាស្ត្រស្រាវជ្រាវសម្រាប់កម្ពុជា» ជូនមន្ត្រីរាជការរបស់ខ្លួនជាង ៨០រូប ក្នុងគោលបំណងចែករំលែកចំណេះដឹង និងបទពិសោធន៍ដែលទទួលបានពីការចូលរួមវគ្គបណ្តុះបណ្តាល និងទស្សនកិច្ចសិក្សានៅសាធារណរដ្ឋប្រជាមានិតចិន ព្រមទាំងពង្រឹងសមត្ថភាពវិភាគគោលនយោបាយ និងវិធីសាស្ត្រស្រាវជ្រាវបែបវិទ្យាសាស្ត្រ សម្រាប់គាំទ្របេសកកម្មរបស់ថ្នាក់ដឹកនាំ និងសមាជិក សមាជិកាព្រឹទ្ធសភា ក្រោមគោលការណ៍ «ប្រព័ន្ធការងារសភាបម្រើប្រជាជន»។

ក្នុងឱកាសនោះ ឯកឧត្តម សុខ បញ្ញា នាយករងខុទ្ទកាល័យ ឯកឧត្តមអនុប្រធានទី១ ព្រឹទ្ធសភា បានគូសបញ្ជាក់ពីសារៈសំខាន់នៃការចែករំលែកចំណេះដឹង និងបទពិសោធន៍ ដែលគណៈប្រតិភូទទួលបានពីប្រទេសចិន។ ឯកឧត្តមសង្ឃឹមយ៉ាងមុតមាំថា បទបង្ហាញរបស់សហការីនឹងផ្តល់ព័ត៌មាន ចំណេះដឹង និងទស្សនៈថ្មីៗ ដែលអាចយកទៅប្រើប្រាស់ក្នុងការងារជាក់ស្តែងរបស់ស្ថាប័ន ដោយបទបង្ហាញនេះ រួមមាន ប្រធានបទ៖ «ការអភិវឌ្ឍប្រទេស និងទំនើបកម្មចិន» ដោយបទបង្ហាញនេះបានសង្ខេបមេរៀនគន្លឹះចំនួន៨ ស្តីពីការអភិវឌ្ឍ និងទំនើបកម្មរបស់ចិន ដែលអាចប្រើជាធាតុចូលសម្រាប់ការសិក្សា ពិចារណា និងសម្រាប់ប្រើក្នុងការកែទម្រង់ស្ថាប័នសាធារណៈនៅកម្ពុជា។ ប្រធានបទ៖ «ទស្សនកិច្ចសិក្សានៅតំបន់សេដ្ឋកិច្ច និងមជ្ឈមណ្ឌលសេវាសាធារណៈនៅទីក្រុងប៉េកាំង និងគុនមីង» បទបង្ហាញនេះបានលើកឡើងពីបទពិសោធន៍ជាក់ស្តែង ពាក់ព័ន្ធនឹងសេវាសាធារណៈ ឌីជីថលូបនីយកម្ម ការអភិវឌ្ឍសេដ្ឋកិច្ច ការអភិរក្សបរិស្ថាន និងការអភិវឌ្ឍជនបទ។ ប្រធានបទ៖ «លទ្ធផលដែលទទួលបាន និងការចូលរួមពង្រឹងមិត្តភាពដែកថែបកម្ពុជា-ចិន» បទបង្ហាញនេះបានផ្តល់ធាតុចូលពាក់ព័ន្ធនឹងការពង្រឹងកិច្ចសហប្រតិបត្តិការកម្ពុជា-ចិន និងការសម្របយកបទពិសោធន៍បរទេសឱ្យស្របតាមបរិបទជាតិ ដោយផ្អែកលើទស្សនវិជ្ជាដឹកនាំរបស់សម្តេចតេជោ «ធ្វើអាវឱ្យត្រូវសាច់ ធ្វើស្បែកជើងឱ្យត្រូវជើង»៕

ដោយ៖ ចាន់ សុភឿន (ប្រភព៖ ព្រឹទ្ធសភា)