AKP ក្រចេះ ថ្ងៃទី២៦ ខែកក្កដា ឆ្នាំ២០២៦

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះបានថ្លែងបញ្ជាក់ថា ការចុះមូលដ្ឋាន មិនមែនជាការចុះបំពេញបែបបទ ឬគ្រាន់តែរៀបចំកិច្ចប្រជុំនោះទេ ប៉ុន្តែជាការចុះស្តាប់ប្រជាពលរដ្ឋ កំណត់បញ្ហា ដោះស្រាយបញ្ហា និងទទួលខុសត្រូវចំពោះលទ្ធផល ខណ:ដែលប្រជាពលរដ្ឋ គឺជាអ្នកវាស់វែងពិតប្រាកដនៃប្រសិទ្ធភាពរបស់ក្រុមការងារ។

ការថ្លែងបញ្ជាក់របស់ឯកឧត្ដមបែបនេះ ក្នុងអញ្ជើញជាអធិបតីដឹកនាំកិច្ចប្រជុំបូកសរុបសកម្មភាព និងលទ្ធផលការងារចុះមូលដ្ឋានប្រចាំឆមាសទី១ ឆ្នាំ២០២៦ និងលើកទិសដៅការងារបន្តរបស់ក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ដើម្បីពង្រឹងប្រសិទ្ធភាពការងារ ស្របតាមគោលនយោបាយរបស់រាជរដ្ឋាភិបាល និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ នាថ្ងៃទី២៥ ខែកក្កដា ឆ្នាំ២០២៦ នៅសាលមហោស្រពខេត្ត ដោយមានការអញ្ជើញចូលពី ក្រុមការងាររាជរដ្ឋាភិបាលចុះមូលដ្ឋាន រដ្ឋបាលខេត្ត រដ្ឋបាលក្រុង ស្រុក រដ្ឋបាលឃុំ សង្កាត់ សរុបប្រមាណជាង ៤០០រូប។

កិច្ចប្រជុំនាឱកាសនេះធ្វើឡើងក្នុងគោលបំណងពិនិត្យ វាយតម្លៃ និងបូកសរុបលទ្ធផលការងារដែលសម្រេចបានក្នុងរយៈពេល៦ខែដើមឆ្នាំ២០២៦ ព្រមទាំងពិភាក្សាអំពីបញ្ហាប្រឈម កត្តារាំងស្ទះ និងដាក់ចេញនូវដំណោះស្រាយជាក់ស្តែង។

ឯកឧត្តម នេត្រ ភក្ត្រា ឯកឧត្តម បានគូសបញ្ជាក់ថា គោលដៅរួមគឺធ្វើឱ្យគោលនយោបាយរបស់រាជរដ្ឋាភិបាល ប្រែក្លាយទៅជាសេវាសាធារណៈល្អ ជីវភាពប្រសើរ សន្តិសុខ សុវត្ថិភាព និងយុត្តិធម៌សម្រាប់ប្រជាពលរដ្ឋនៅគ្រប់មូលដ្ឋាន។ ឯកឧត្ដមបានកោតសរសើរចំពោះការខិតខំប្រឹងប្រែងរបស់ក្រុមការងារ រាជរដ្ឋាភិបាល និងអាជ្ញាធរមូលដ្ឋានគ្រប់លំដាប់ថ្នាក់ ដែលបានសហការគ្នាអនុវត្តន៍ការងារចុះមូលដ្ឋាន ដើម្បីបម្រើប្រជាពលរដ្ឋ និងរួមចំណែកជំរុញការអភិវឌ្ឍសង្គមសេដ្ឋកិច្ចនៅក្នុងខេត្តក្រចេះ។

ឯកឧត្តមប្រធានក្រុមការងារបានណែនាំឱ្យក្រុមការងារទាំងអស់បន្តពង្រឹងការសហការជាមួយអាជ្ញាធរមូលដ្ឋាន ធ្វើការចុះជិតស្និទ្ធជាមួយប្រជាពលរដ្ឋ ស្តាប់មតិយោបល់ និង ដោះស្រាយបញ្ហាប្រឈមនានា ដើម្បីធានាបាននូវការអភិវឌ្ឍ ប្រកបដោយប្រសិទ្ធភាព និងឆ្លើយតបទៅនឹងតម្រូវការរបស់ ប្រជាពលរដ្ឋ។

ឯកឧត្តមក៏បានលើកទឹកចិត្តដល់ក្រុមការងាររាជរដ្ឋាភិបាលគ្រប់លំដាប់ថ្នាក់ ត្រូវបន្តអនុវត្តការងារដោយឈរលើស្មារតីទទួលខុសត្រូវខ្ពស់ សាមគ្គីភាព ការសម្របសម្រួលជិតស្និទ្ធជាមួយអាជ្ញាធរមូលដ្ឋាន និងស្ថាប័នពាក់ព័ន្ធ ព្រមទាំងផ្តោតសំខាន់លើការដោះស្រាយបញ្ហាជូនប្រជាពលរដ្ឋឱ្យបានទាន់ពេលវេលា ប្រកបដោយតម្លាភាព ប្រសិទ្ធភាព និងគណនេយ្យភាព។ ឯកឧត្ដមប្រធានក្រុមការងារក៏បានជំរុញដល់អាជ្ញាធរដែនគ្រប់លំដាប់ថ្នាក់ បន្តថែរក្សាសន្តិសុខ សណ្តាប់ធ្នាប់ និងធនធានធម្មជាតិ ហើយត្រូវអនុវត្តន៍គោលនយោបាយភូមិ ឃុំ សង្កាត់មានសុវត្ថិភាពឱ្យមានប្រសិទ្ធភាព ដោយផ្តោតលើគ្រឿងញៀន ក្មេងទំនើង អំពើហិង្សា ចរាចរណ៍ បទល្មើសធនធានធម្មជាតិ និងការកាប់បំផ្លាញព្រៃឈើ។ ទន្ទឹមនេះ ត្រូវបន្តផ្សព្វផ្សាយ និងចាត់វិធានការទប់ស្កាត់បទល្មើសឆបោកតាមប្រព័ន្ធអនឡាញតាមទិសដៅដែលបានកំណត់ក្នុងរបាយការណ៍។

ក្នុងកិច្ចប្រជុំនេះដែរ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ បានណែនាំដល់អាជ្ញាធរមូលដ្ឋាន និងកងកម្លាំងមានសមត្ថកិច្ចពាក់ព័ន្ធ ត្រូវពន្លឿនការធ្វើ និងផ្តល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋឱ្យបានទាន់ពេលវេលា ដើម្បីធានាថាពលរដ្ឋគ្រប់រូបមានឯកសារផ្លូវច្បាប់សម្រាប់ប្រើប្រាស់ក្នុងការទទួលសេវាសាធារណៈ និងបំពេញសិទ្ធិ កាតព្វកិច្ចនានាតាមច្បាប់។ ឯកឧត្តមអភិបាលខេត្ត ក៏បានជំរុញឱ្យកងកម្លាំងមានសមត្ថកិច្ច បន្តពង្រឹងវិធានការបង្ក្រាបហ្គេមអនឡាញខុសច្បាប់ និងរាល់សកម្មភាពល្មើសច្បាប់ពាក់ព័ន្ធ ដោយមិនអនុញ្ញាតឱ្យមានការបើកដំណើរការ ឬលួចលាក់ប្រព្រឹត្តនៅក្នុងភូមិសាស្ត្រខេត្តក្រចេះជាដាច់ខាត៕

ដោយ៖ រិទ្ធី, រូបថត៖ ខឹម សុវណ្ណារ៉ា