AKP ព្រះសីហនុ ថ្ងៃទី៦ ខែកក្កដា ឆ្នាំ២០២៦

ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងបញ្ជាក់ថា គម្រោងគ្រួសាររឹងមាំ គឺពិតជាបានផ្ដល់នូវសុភមង្គលផ្លូវកាយ ផ្លូវចិត្តដល់គ្រួសារប្រជាពលរដ្ឋ ព្រោះគម្រោងនេះគឺជាមាគ៌ាមួយដែលផ្ដោតសំខាន់ទៅលើវេទិកាគ្រួសារ។

ការថ្លែងបញ្ជាក់របស់ឯកឧត្ដម ឧត្តមសេនីយ៍ឯកបែបនេះ ក្នុងឱកាសដែលលោកទទួលបានការអនុញ្ញាតពីឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ចុះសហការជាមួយក្រុមប្រឹក្សាបណ្តាញព្រះវិហារគ្រីស្ទបរិស័ទកម្ពុជា ដើម្បីពិនិត្យនិងបន្តអនុវត្តន៍ការងារគ្រួសាររឹងមាំ(Strong family)ដែលជាគម្រោងមួយបង្កើតដោយអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) នៅក្រុងព្រះសីហនុ ខេត្តព្រះសីហនុ ចាប់ពីថ្ងៃទី៤-៥ ខែកក្កដា ឆ្នាំ២០២៦។

ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត បានពាំនាំនូវប្រសាសន៍សួរសុខទុក្ខពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជូនដល់ប្រជាសហគមន៍ ដែលនឹងក្លាយជាគ្រួសារដែលមានបទពិសោធន៍ក្នុងការអប់រំកូនចៅកុំឱ្យទៅពាក់ព័ន្ធនឹងបញ្ហាគ្រឿងញៀនតាមរយៈការចូលរួមនៅគម្រោងគ្រួសាររឹងមាំនេះ។

ឯកឧត្ដម ឧត្តមសេនីយ៍ឯកបានជម្រាបជូនថា គម្រោងគ្រួសាររឹងមាំនេះ គឺជាមាគ៌ាមួយដែលផ្ដោតសំខាន់ទៅលើវេទិកាគ្រួសារដែលចំណាយពេលចាប់ពី ៥នាទីឡើងទៅក្នុងមួយថ្ងៃ តាមរយៈការទទួលព័ត៌មានពីកូនចៅ ឆ្លើយតបរាល់សំណើ សំណូមពររបស់កូនចៅ ផ្ដល់ភាពកក់ក្តៅដល់កូនចៅ ហើយកូនចៅ នឹងសហការផ្ដល់នូវព័ត៌មានផ្សេងៗដែលគាត់បានជួបប្រទះនៅសង្គមក្រៅពីគ្រួសារ ឪពុកម្ដាយ អាណាព្យាបាលងាយទទួលបាននូវរាល់ការប្រព្រឹត្តរបស់កូនចៅនៅខាងក្រៅ។

ឯកឧត្ដម ឧត្តមសេនីយ៍ឯកបានបន្ថែមថា តាមរយៈការចូលរួមនៅក្នុងគម្រោងនេះ យើងក៏ងាយនឹងអាចបង្ការដោះស្រាយបាននូវរាល់បញ្ហាពិសេសគឺបញ្ហាគ្រឿងញៀនបានទាន់ពេលវេលា៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន