AKP ភ្នំពេញ ថ្ងៃទី០១ ខែកក្កដា ឆ្នាំ២០២៦--ឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបន្ទុកជំរុញការអភិវឌ្ឍចលនាកីឡា ប្រធានគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ថា ការបង្កើតសហព័ន្ធកីឡាសាំបូនៅកម្ពុជានាពេលនេះនឹងក្លាយជាកាលានុវត្តភាពថ្មីមួយសម្រាប់ចលនាអូឡាំពិកកម្ពុជា ក្នុងការស្វែងរកឧត្តមភាពកីឡានៅលើឆាកអន្តរជាតិបន្ថែមទៀត។

ការគូសបញ្ជាក់របស់ឯកឧត្តមបណ្ឌិត ថោង ខុន បានធ្វើឡើងនៅក្នុងមហាសន្និបាតសហព័ន្ធកីឡាសាំបូកម្ពុជា អាណត្តិទី១ ឆ្នាំ២០២៦-២០៣០ នៅទីស្នាក់ការ NOCC នៅថ្ងៃទី០១ ខែកក្កដា ឆ្នាំ២០២៦ ក្នុងឱកាសដែលឯកឧត្តមបណ្ឌិត ថោង ខុន ទទួលបានការគាំទ្រជាប្រធានសហព័ន្ធកីឡាសាំបូកម្ពុជា ក្នុងអាណត្តិទី១នេះ ដោយមានសមាសភាពគណៈកម្មាធិការប្រតិបត្តិសហព័ន្ធសរុបចំនួន ១៣រូប ក្នុងនោះមានអនុប្រធាន៦រូប។

ឯកឧត្តមបណ្ឌិត ថោង ខុន បានថ្លែងថា សំាបូ គឺជាកីឡាប្រយុទ្ធ និងសិល្បៈការពារខ្លួនត្រូវបានបង្កើតជាផ្លូវការនៅឆ្នាំ១៩៣៨ ដែលដឹកនាំដោយសហព័ន្ធសំាបូអន្តរជាតិ (FIAS) និងទទួលស្គាល់ដោយគណៈកម្មាធិការអូឡាំពិកអន្តរជាតិ (IOC) នៅឆ្នាំ២០២១។ កីឡាសំាបូត្រូវបានបញ្ចូលជាកីឡាមួយដែលទទួលការគាំទ្រពីក្រុមប្រឹក្សាអូឡាំពិកអាស៊ី (OCA) នៅឆ្នាំ២០១៤ ហើយកីឡានេះបានបញ្ចូលក្នុងព្រឹត្តិការណ៍អាស៊ីជាច្រើន ដូចជា Asian Beach Games, Asian Indoor and Martial Arts Games និង Asian Youth Games ហើយ OCA ក៏ត្រៀមបញ្ចូលកីឡាសាំបូក្នុងការប្រកួតកីឡាយុវជនអាស៊ី ឆ្នាំ២០២៩ នៅប្រទេសអ៊ូសបេគីស្ថាន។ ដូច្នេះ ការបង្កើតសហព័ន្ធកីឡាសាំបូកម្ពុជា នាពេលនេះនឹងក្លាយជាកាលានុវត្តភាពថ្មីមួយសម្រាប់ចលនាអូឡាំពិកកម្ពុជា ក្នុងការស្វែងរកឧត្តមភាពកីឡានៅលើឆាកអន្តរជាតិបន្ថែមទៀត។

ឯកឧត្តមបណ្ឌិតបានលើកឡើងបន្ថែមថា ការរៀបចំមហាសន្និបាតបង្កើតសហព័ន្ធកីឡាសាំបូកម្ពុជា អាណត្តិទី១ នាពេលនេះ គឺស្របតាមការចុះអនុស្សរណៈនៃការយោគយល់គ្នារវាង NOCC និងគណៈកម្មាធិការអូឡាំពិករុស្សីលើកិច្ចសហប្រតិបត្តិការអភិវឌ្ឍកីឡា និងចលនាអូឡាំពិក ពិសេសជាមួយនឹងទំនាក់ទំនងយ៉ាងស្អិតរមួតរវាងកម្ពុជា-រុស្សី រយៈពេល ៧០ឆ្នាំមកហើយ។ ក្នុងនោះ យើងក៏បានជួបពិភាក្សាការងារជាមួយ លោក Suresh Gopi និង លោក Maxim តំណាងសហព័ន្ធកីឡាសាំបូអន្តរជាតិ (FIAS) ២លើកមកហើយ ក្នុងការរៀបចំរចនាសម្ព័ន្ធដឹកនាំ និងបំពេញលក្ខខណ្ឌតម្រូវផ្សេងៗ ស្របតាមធម្មនុញ្ញរបស់សហព័ន្ធកីឡាសាំបូអន្តរជាតិ គោលការណ៍ក្រសួងអប់រំ យុវជន និងកីឡា និងគោលការណ៍ចលនាអូឡាំពិកកម្ពុជា។

ជាមួយគ្នានេះ ឯកឧត្តមបណ្ឌិត ថោង ខុន បានថ្លែងអំណរគុណលោក Suresh Gopi អគ្គលេខាធិការ សហភាពកីឡាសំាបូអាស៊ី និងអូសេអានី (SUAO) ចំពោះការគាំទ្រដល់ការបង្កើតសហព័ន្ធកីឡាសាំបូកម្ពុជា ហើយឯកឧត្តមសង្ឃឹមជឿជាក់ថា លោកអគ្គលេខាធិការ និងសហព័ន្ធកីឡាសាំបូអន្តរជាតិនឹងបន្តគាំទ្រដល់សហព័ន្ធលើការអភិវឌ្ឍគុណផលកីឡាករ កីឡាការិនី ការបណ្តុះបណ្តាលមន្ត្រីបច្ចេកទេស និងគាំទ្រលើសម្ភារបរិក្ខាបច្ចេកទេសផងដែរ។ ប្រធានសហព័ន្ធក៏បានថ្លែងអំណរគុណដល់ លោក Sergey Novosetslev លេខាទី១នៃស្ថានទូតរុស្ស៊ីប្រចាំកម្ពុជា ដែលបានអញ្ជើញចូលរួមជាសក្ខីកម្មនៅក្នុងមហាសន្និបាត នាពេលនេះ។

ជាមួយគ្នានេះ ឯកឧត្តម ប៊ុយ សុភ័ណ្ឌ អគ្គលេខាធិការ សហព័ន្ធកីឡាសាំបូកម្ពុជាបានជម្រាបជូនថា យើងបានសហការជាមួយបណ្តាក្លឹប-សហព័ន្ធកីឡាយុទ្ធគុននៅកម្ពុជា ដោយបង្កើតបានក្លឹបកីឡាសំាបូជាសមាជិកចំនួន ៦ក្លឹប ដែលជាលក្ខខណ្ឌតម្រូវក្នុងការបង្កើតសហព័ន្ធកីឡាជាតិថ្មីនៅកម្ពុជា។ ក្រុមការងារសហព័ន្ធបានធ្វើការយ៉ាងជិតស្និតជាមួយសហភាពកីឡាសំាបូអាស៊ី និងអូសេអានីលើការរៀបចំលក្ខន្តិកៈ និងបទប្បញ្ញត្តិផ្សេងៗរបស់សហព័ន្ធ ស្របតាមធម្មនុញ្ញរបស់សហព័ន្ធកីឡាសាំបូអន្តរជាតិ និងធម្មនុញ្ញអូឡាំពិកផងដែរ។ សហព័ន្ធកីឡាសាំបូកម្ពុជា ប្រមូលផ្តុំដោយឥស្សរជនសំខាន់ៗបញ្ចប់ការសិក្សានៅរុស្សី ឥស្សរជនកីឡា ព្រឹទ្ធាចារ្យយុទ្ធគុន គ្រូបង្វឹកកីឡាសាំបូអន្តរជាតិ និងមន្ត្រីដែលមានចំណេះដឹង និងបទពិសោធន៍ខ្ពស់ ដើម្បីធានាថាអង្គប្រតិបត្តិរបស់សហព័ន្ធ អាណត្តិដំបូងនេះមានមូលដ្ឋានគ្រឹះនៃការដឹកនាំដ៏រឹងមាំជាមួយចក្ខុវិស័យច្បាស់លាស់។

ឯកឧត្តមអគ្គលេខាធិការបញ្ជាក់ទៀតថា បើទោះបីជាសហព័ន្ធកីឡាសាំបូកម្ពុជាត្រូវបានបង្កើតឡើងដំបូងក៏ពិតមែន ប៉ុន្តែកីឡាសាំបូប្រវត្តិ និងមានមូលដ្ឋានគ្រឹះនៅកម្ពុជាតាំងពីយូរណាស់មកហើយ ក្នុងនោះ ឯកឧត្តម វ៉ាត់ ចំរើន (អនុប្រធានសហព័ន្ធ) ក៏ជាអតីតកីឡាករសាំបូដ៏ឆ្នើមមួយរូប ដោយធ្លាប់បានហ្វឹកហាត់កីឡាសាំបូជាមួយគ្រូបង្វឹកអន្តរជាតិ និងចូលរួមប្រកួតនៅសហភាពសូវៀត ឆ្នាំ១៩៨៩ដែរ។ ជាទិសដៅបន្ទាប់ សហព័ន្ធនឹងរៀបចំផែនការយុទ្ធសាស្រ្តអភិវឌ្ឍកីឡាសាំបូ អាណត្តិទី១ ដើម្បីស្វែងរកឧត្តមភាពកីឡាសាំបូលើឆាកអន្តរជាតិ នាពេលអនាគត៕

ដោយ ហេង ណាលីន (រូបភាព៖ NOCC)