AKP ភ្មំពេញ ថ្ងៃទី0១ ខែកក្កដា ឆ្នាំ២០២៦--ឯកឧត្តម ទៀវ សុគន្ធ រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា នៅព្រឹកថ្ងៃទី១ ខែកក្កដា ឆ្នាំ២០២៦នេះបានអញ្ជើញបើកសិក្ខាសាលាពង្រឹងសមត្ថភាពមន្ត្រីក្នុងការរៀបចំផែនការ និងរបាយការណ៍ ដល់មន្ត្រីមន្ទីរ ស.អ.យ. រាជធានី ខេត្ត ទាំង១២ រួមមាន រាជធានីភ្នំពេញ ខេត្តកំពត កែប តាកែវ បន្ទាយមានជ័យ ឧត្តរមានជ័យ បាត់ដំបង ពោធិ៍សាត់ កំពង់ឆ្នាំង ប៉ៃលិន ព្រះសីហនុ និងខេត្តកំពង់ស្ពឺ។

នៅក្នុងឱកាសដ៏មានសារៈសំខាន់នេះ ឯកឧត្តមរដ្ឋលេខាធិការ បានគូសបញ្ជាក់ថា សិក្ខាសាលានេះរៀបចំឡើងក្នុងគោលបំណងគន្លឹះចំនួន ៣ រួមមាន៖ ទី១ ពង្រឹងសមត្ថភាពមន្ត្រីលើការរៀបចំផែនការផ្អែកលើសមិទ្ធកម្ម និងការរៀបចំរបាយការណ៍ប្រកបដោយគុណភាព សំដៅគ្រប់គ្រងធនធានប្រកបដោយប្រសិទ្ធភាព និងចំគោលដៅ, ទី២ ពង្រឹងសមត្ថភាពមន្ត្រីក្នុងការប្រមូលទិន្នន័យដោយផ្អែកលើម៉េតាទិន្នន័យនៃសូចនាកររបស់ក្រសួង និង៣ ពង្រឹងសមត្ថភាពមន្ត្រីក្នុងការវិភាគទិន្នន័យ។

ឯកឧត្តម បានមានប្រសាសន៍បន្តទៀតថា ការរៀបចំផែនការ និងការធ្វើរបាយការណ៍ គឺជាឧបករណ៍គន្លឹះ និងជាខ្នងបង្អែកមិនអាចខ្វះបានក្នុងការគ្រប់គ្រង និងដឹកនាំស្ថាប័ន។ ផែនការដែលច្បាស់លាស់ស្តែងចេញពីទិសដៅវែងឆ្ងាយ រីឯរបាយការណ៍ដែលត្រឹមត្រូវ គឺជាមូលដ្ឋានគ្រឹះដ៏រឹងមាំសម្រាប់ថ្នាក់ដឹកនាំក្នុងការពិនិត្យ វាយតម្លៃ និងធ្វើការសម្រេចចិត្តជាយុទ្ធសាស្ត្រ។ សិក្ខាកាមទាំងអស់ ដែលជាប្រធានមន្ទីរ អនុប្រធានមន្ទីរ និងមន្ត្រីជំនាញ ត្រូវយកចិត្តទុកដាក់ ត្រងត្រាប់ស្តាប់ ក្រេបជញ្ជក់ចំណេះដឹង និងចូលរួមពិភាក្សាឱ្យបានសកម្ម ដើម្បីធានាថា ក្រោយបញ្ចប់សិក្ខាសាលារយៈពេល ៣ថ្ងៃនេះ នឹងទទួលបានសមត្ថភាពពេញលេញក្នុងការដឹកនាំ រៀបចំផែនការ និងរបាយការណ៍នៅតាមអង្គភាពរបស់ខ្លួនប្រកបដោយប្រសិទ្ធភាព និងស័ក្តសិទ្ធិភាព ។

ជាមួយគ្នានេះ សិក្ខាសាលានេះក៏ជាការឆ្លើយតបទៅនឹងសំណូមពររបស់មន្ត្រីជំនាញកាលពីឆ្នាំមុន ដើម្បីបន្តបណ្តុះបណ្តាល ដុសខាត់ និងពង្រឹងសមត្ថភាពការងារឱ្យកាន់តែប្រសើរឡើង ៕

ដោយ ណយ នឿន (ប្រភព៖ក្រសួងសង្គមកិច្ច)