AKP កំពង់ធំ ថ្ងៃទី២៨ ខែមិថុនា ឆ្នាំ២០២៦--

នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤នាព្រឹកថ្ងៃទី២៨ ខែមិថុនា ឆ្នាំ២០២៦បានប្រារព្ធពិធីមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាមដែលបានពលីជីវិតក្នុងសម័យសង្គ្រាមនៅកម្ពុជា ដែលកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមសហការជាមួយកម្លាំងក្រុមបច្ចេកទេស ជីករុករកអដ្ឋិធាតុ K៧២ របស់ទីក្រុងដុងណាយ នៃសាធារណរដ្ឋសង្គមនិយមវៀតណាម ជីករុករកបាននៅក្នុងរដូវប្រាំងឆ្នាំ ២០២៥-២០២៦ ក្នុងភូមិសាស្ត្រខេត្តកំពង់ធំក្រោម​អធិបតីភាព​ឧត្ដមសេនីយ៍​ទោ​ សោម​ ស៊ុន​ មេបញ្ជាការ​តំបន់​ប្រតិបត្តិការ​សឹក​រង​កំពង់​ធំ​ និង​លោក​វរសេនីយ៍ទោ​ ង្វៀន ​វ៉ាន់​ឡុង​ តំណាងគណៈកម្មការឯកទេសជីក​រុករក​អដ្ឋិធាតុ​ទី​ក្រុង​ដុង​ណាយ​ នៃ​សាធារណរដ្ឋ​សង្គម​និយម​វៀតណាម​ ។

លោកវរសេនីយ៍ទោ ង្វៀន វ៉ាន់ឡុង បានឡើងរាយការណ៍អំពីលទ្ធផលសហការជីករុករកបានអដ្ឋិធាតុកងទ័ពស្ម័គ្រចិត្តវៀតណាម​នៅក្នុងរដូវប្រាំងដំណាក់កាលទី២៥ ឆ្នាំ២០២៥-២០២៦នេះ បានចំនួន ១៩ អដ្ឋិធាតុ ដែលត្រូវធ្វើមាតុភូមិនិវត្តន៍នៅពេលនេះ ។ ព្រមជាមួយនេះ ក៏បានបញ្ជាក់ជូនអំពីការលំបាក ការងាយស្រួល និងបញ្ហាប្រឈមមួយចំនួនក្នុងការស្រាវជ្រាវជីករុករកអដ្ឋិធាតុនាពេលកន្លងទៅ ដោយភូមិសាស្ត្រមានការប្រែប្រួល ហើយសាក្សីមួយចំនួនត្រូវបានទទួលមរណភាព និងមួយចំនួនទៀតវង្វេងទីតាំងដែលបានធ្លាប់ស្គាល់។

នៅក្នុងឱកាសនេះផងដែរ លោកវរសេនីយ៍ទោ ង្វៀន វ៉ាន់ឡុង បានសូមគោរពថ្លែងអំណរគុណដ៍ជ្រាលជ្រៅជាទីបំផុត ចំពោះអាជ្ញាធរដែនដី កងកម្លាំងប្រដាប់អាវុធទាំងបី និងប្រជាពលរដ្ឋនៅក្នុងខេត្តកំពង់ធំ​ ដែលបានបង្កលក្ខណៈងាយស្រួល ដោយបានរួមសហការក្នុងការជីករុករកនិងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាមទៅកាន់មាតុប្រទេសវិញ នៅពេលកន្លងទៅ ក៏ដូចជានៅពេលនេះបានយ៉ាងល្អប្រសេីរ​ ។

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការឯកទេសជីករុករកអដ្ឋិធាតុ ខេត្តកំពង់ធំ បានគូសបញ្ជាក់ថា ដោយអនុវត្តតាមកិច្ចព្រមព្រៀងរវាងរដ្ឋាភិបាលនៃប្រទេសទាំងពីរ កម្ពុជា​ និង​វៀតណាម​ ស្ដីពីការងារមនុស្សធម៌ក្នុងការសហការស្រាវជ្រាវជីក គាស់ លើកអដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅកម្ពុជា ដើម្បីធ្វើមាតុភូមិនិវត្តន៍វិលត្រឡប់ទៅកាន់ប្រទេសកំណើតវិញ ។ ខេត្តកំពង់ធំបានដំណើរការអនុវត្តចាប់តាំងពីឆ្នាំ ២០០៣ រហូតមកដល់ឆ្នាំ ២០២៦នេះ មានរយៈពេលជិត២៣ឆ្នាំមកហើយ ។ ហើយអដ្ឋិធាតុដែលសហការជីករុករកបាននឹងធ្វើបានមាតុភូមិនិវត្តន៍ទៅកាន់ប្រទេសកំណើតវិញបានចំនួន ១.១៩៧ អដ្ឋិធាតុរួចហើយ គិតទាំងចំនួន១៩ អដ្ឋិធាតុ ដែលកំពុងរៀបចំពិធីមាតុភូមិនិវត្តន៍នៅថ្ងៃនេះ ផងដែរ ។

នៅក្នុងឱកាសនេះឧត្តមសេនីយ៍ទោ សោម ស៊ុន បានថ្លែងអំណរគុណចំពោះកងទ័ពស្ម័គ្រចិត្តវៀតណាម ដែលបានរួមសហការជាមួយកងកម្លាំងរណសិរ្សសាមគ្គីសង្គ្រោះជាតិកម្ពុជា ដឹកនាំដោយសម្ដេចធម្មពោធិសាល ជា ស៊ីម សម្ដេចមហាពញាចក្រី ហេង សំរិន និងសម្ដេចអគ្គមហាសេនាបតីតេជោ ហ៊ុន សែន ដែលបានវាយផ្ដួលរំលំរបបប្រល័យពូជសាសន៍ ប៉ុល ពត រំដោះអាយុជីវិតប្រជាជនកម្ពុជាឱ្យរួចផុតពីរបបវាលពិឃាដអស់រយៈពេល ៣ ឆ្នាំ ៨ ខែ និង២០ ថ្ងៃ នៅថ្ងៃទី ៧ មករា ឆ្នាំ១៩៧៩និងបានសូមជូនពរឱ្យចំណងសាមគ្គីភាព មិត្តភាព និងកិច្ចសហប្រតិបត្តិការល្អ រវាងប្រទេសទាំងពីរ(កម្ពុជា-វៀតណាម)ស្ថិតស្ថិរចីរកាល៕

ដោយ ស៊ុម វណ្ណា