AKP សៀមរាប ថ្ងៃទី២៦ ខែមិថុនា ឆ្នាំ២០២៦--ថ្លែងនៅក្នុងកម្មវិធីយុទ្ធនាការផ្សព្វផ្សាយសុវត្ថិភាពចរាចរណ៍ផ្លូវគោក នៅសួនច្បារព្រះរាជដំណាក់ ក្រុងសៀមរាប នាព្រឹកថ្ងៃទី២៦ ខែមិថុនា ឆ្នាំ២០២៦ ឯកឧត្តម ម៉ា ស៊ុនហួត អនុរដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការរងនៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានលើកឡើងថា ដោយសារតែគ្រោះថ្នាក់ចរាចរណ៍បង្កឱ្យមានផលប៉ះពាល់យ៉ាងធ្ងន់ធ្ងរ ទាំងក្នុងកម្រិតបុគ្គល គ្រួសារ និងសង្គមជាតិ។ ដូច្នេះ ឯកឧត្តម សំណូមពរដល់អ្នកប្រើប្រាស់ផ្លូវទាំងអស់ចូលរួមគោរពច្បាប់ចរាចរណ៍ឱ្យបានគ្រប់ៗគ្នា និងគ្រប់ពេលវេលាទាំងអស់ ដើម្បីកាត់បន្ថយគ្រោះថ្នាក់ចរាចរណ៍ឱ្យមកស្ថិតក្នុងកម្រិតទាបបំផុត។

ឯកឧត្តម ម៉ា ស៊ុនហួត បន្តថា ក្នុងមួយថ្ងៃៗគ្រោះថ្នាក់ចរាចរណ៍ដែលបង្កឡើងដោយម៉ូតូមានច្រើន ដូច្នេះការធ្វើយុទ្ធនាការនេះដើម្បីចូលរួមកាត់បន្ថយចំនួនអ្នកស្លាប់ និងរបួសឱ្យមកនៅក្នុងកម្រិតមួយទាបបំផុត។ ឯកឧត្តមបន្តទៀតថា ពាក់ព័ន្ធបញ្ហានេះក្នុងនាមមន្ត្រីជំនាញ បានសិក្សា និងឈ្វេងយល់អំពីបច្ចេកវិទ្យានានា ដើម្បីចូលរួមកាត់បន្ថគ្រោះថ្នាក់ដល់អ្នកប្រើប្រាស់ម៉ូតូ ដោយក្រុមហ៊ុន Honda បានប្រើប្រាស់ប្រព័ន្ធបើកភ្លើងចង្កៀងមុខដោយស្វ័យប្រវត្តិ ឬហៅថា ការបើកភ្លើងពេលថ្ងៃ (AHO - Automatic Headlight On) ដែលប្រព័ន្ធនេះអាចជួយបង្កើនលទ្ធភាពមើលឃើញរវាងអ្នកបើកបរ និងអ្នកប្រើប្រាស់ផ្លូវដទៃទៀត ដែលអាចកាត់បន្ថយគ្រោះថ្នាក់យ៉ាងមានប្រសិទ្ធភាព ជាពិសេសក្នុងស្ថានភាពអាកាសធាតុប្រែប្រួល ដូចជាមានភ្លៀងធ្លាក់ ចុះអ័ព្ទ ឬមេឃងងឹត។

យុទ្ធនាការផ្សព្វផ្សាយសុវត្ថិភាពចរាចរណ៍ផ្លូវគោកនាពេលនេះ ក៏អនុញ្ញាតឱ្យប្រជាពលរដ្ឋ បានចូលរួមសាកល្បងជាមួយនឹង «ម៉ាស៊ីនសាកល្បងបើកបរ» ដើម្បីរៀនពីរបៀបប្រមើលមើលគ្រោះថ្នាក់ ព្រមទាំងបានអនុវត្តន៍បើកបរជាក់ស្តែងនៅលើ «ទីលានអនុវត្តន៍ដៃចង្កូតម៉ូតូ» ដែលរៀបចំឡើងដូចទម្រង់ប្រឡងយកប័ណ្ណបើកបរពិតៗផងដែរ។

យុទ្ធនាការនេះ មិនត្រឹមតែផ្តល់ចំណេះដឹងផ្នែកច្បាប់ប៉ុណ្ណោះទេ ប៉ុន្តែថែមទាំងបានបង្កើតបរិយាកាសរីករាយតាមរយៈកម្មវិធីសំណួរចម្លើយកម្សាន្ត ដើម្បីទទួលបានរង្វាន់មួកសុវត្ថិភាព និងសម្ភារៈផ្សេងៗ ដែលធ្វើឱ្យការអប់រំកាន់តែជ្រាបចូលទៅក្នុងចិត្តរបស់សហគមន៍មូលដ្ឋាន និងបានចែកជូននូវឯកសារពាក់ព័ន្ធនឹងច្បាប់ស្តីពីសុវត្ថិភាពចរាចរណ៍ផ្លូវគោក តាមរយៈការសួរនិងឆ្លើយសំណួរដើម្បីទទួលបានមួកសុវត្ថិភាពជារង្វាន់៕

ដោយ ឃុត សៅ