AKP ភ្នំពេញ ថ្ងៃទី២៦ ខែមិថុនា ឆ្នាំ២០២៦--ការប្រកួត GANZBERG KUN KHMER KOMBAT GRAND PRIX & TAEKWONDO ដោយមានប្រកួតគុនខ្មែរ៤គូ និងតេក្វាន់ដូប្រយុទ្ធ៤គូត្រូវបានប្រធានសហព័ន្ធកីឡាប្រដាល់គុនខ្មែរ ឯកឧត្តម ខូវ ឆាយ ចាត់ទុកថាជាព្រឹត្តិការណ៍ប្រកួតជាប្រវត្តិសាស្ត្រថ្មីមួយរបស់វិស័យគុនខ្មែរ ដែលសហការជាមួយស្ថាប័ន KOMBAT GLOBAL ជំនាញកីឡាតេក្វាន់ដូបែបប្រយុទ្ធ។

ការគូសបញ្ជាក់របស់ឯកឧត្តមប្រធានសហព័ន្ធបានធ្វើឡើងក្រោយបញ្ចប់សន្និសីទសារព័ត៌មានស្តីពីការប្រកួតក្នុងព្រឹត្តិការណ៍ថ្មីនេះ នៅថ្ងៃទី២៦ ខែមិថុនា ឆ្នាំ២០២៦ នៅសាលសម្តេចពិជ័យសេនា ទៀ បាញ់ នៃមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) ដោយមានការចូលរួមគាំទ្រពីលោក Rick Shin ប្រធាន KOMBAT និងមន្ត្រីជំនាញជាច្រើនរូបទៀត។

ឯកឧត្តម ខូវ ឆាយ បន្ថែមថា ព្រឹត្តិការណ៍ប្រកួតទាំង៨គូ ចាប់ពីម៉ោង៨យប់តទៅ នាថ្ងៃសៅរ៍ស្អែកនេះ នៅស្តាតចាស់ គឺជាព្រឹត្តិការណ៍ថ្មីមួយដ៏ទាក់ទាញ ដោយនឹងបន្តរៀបចំនៅកម្ពុជា នៅបណ្តាប្រទេសនានាជុំវិញពិភពលោក ខណៈស្ថាប័ន KOMBAT នេះមាន ១២១ប្រទេសជាសមាជិក និងមានរាប់ពាន់ក្លឹប។ ស្ថាប័ននេះនឹងបញ្ជូលកម្មវិធីហ្វឹកហាត់គុនខ្មែរទៅគ្រប់ក្លឹបទាំងអស់។ មូលហេតុនៃកិច្ចសហការជាមួយគុនខ្មែរនេះ គឺអន្តរជាតិកំពុងចាប់អារម្មណ៍មកគុនខ្មែរកំពុងល្បីល្បាញ។ ព្រឹត្តិការណ៍ថ្មី គុនខ្មែរ៤គូ និងតេក្វាន់ដូ៤គូ ដែលចាប់ផ្តើមលើកដំបូងនៅកម្ពុជានេះនឹងកាន់តែជក់ចិត្ត ប្លែកអស្ចារ្យ រួចហើយព្រឹត្តិការណ៍បែបនេះនឹងឆ្ពោះទៅរៀបចំជាអន្តរជាតិ នៅក្រៅប្រទេសនានា ជាបន្តបន្ទាប់ផងដែរ។

ឯកឧត្តម ខូវ ឆាយ បានសង្កត់ធ្ងន់ថា៖ «កន្លងមក សហព័ន្ធកីឡាប្រដាល់គុនខ្មែរបានសហការជាមួយស្ថាប័នអន្តរជាតិជាច្រើនមកហើយៗនៅក្នុងកិច្ចសហការជាមួយ KOMBAT GLOBAL ដែលជាស្ថាប័នធំមួយ នាពេលនេះ គឺជាឱកាសដ៏វិសេសវិសាលមួយសម្រាប់វិស័យកីឡាប្រដាល់គុនខ្មែរ ក្នុងភាពជាដៃគូ ក្នុងការនាំយកគុនខ្មែរទៅឆាកអន្តរជាតិ មានន័យថា គុនខ្មែរនឹងទៅដល់១២១ប្រទេសជាសមាជិករបស់ KOMBAT GLOBAL»។ KOMBAT GLOBAL នឹងឱ្យសមាជិករបស់ខ្លួនទាំងអស់មកចូលរួមជាមួយគ្រួសារគុនខ្មែរ ហើយគ្រោងនឹងបង្កើតសហព័ន្ធកីឡាប្រដាល់គុនខ្មែរ នៅតាមបណ្តាប្រទេសនានា ដែលយើងមិនទាន់មានសហព័ន្ធនៅប្រទេសទាំងនោះ។ ក្លឹបទាំងអស់របស់ KOMBAT GLOBAL ដែលធ្លាប់ហ្វឹកហាត់តេក្វាន់ដូ ជឺជីតស៊ូ ឬក៏ធ្លាប់ហ្វឹកហាត់គុនប្រទេសជិតខាងយើង គឺស្ថាប័នអន្តរជាតិមួយនេះនឹងរៀបចំកម្មវិធីហ្វឹកហាត់គុនខ្មែរឱ្យបានគ្រប់ក្លឹបទាំងអស់»។

គូសបញ្ជាក់បន្ថែមពីលើនេះ ប្រធានសហព័ន្ធរូបនេះបានឱ្យដឹងបែបនេះទៀតថា៖ «មូលហេតុនៃការចាប់ដៃគូគ្នានេះ គឺពិភពលោកកំពុងសំឡឹងមើលមករកគុនខ្មែរយើង ប្រទេសខ្មែរយើង ដែលកំពុងមានភាពល្បីល្បាញ ក្នុងវិស័យក្បាច់គុននេះ ហើយទម្រាំឈានដល់ការចាប់ដៃសហការគ្នានេះ គឺមានការពិភាក្សាគ្នាយ៉ាងយូររវាងខ្ញុំ និងថ្នាក់ដឹកនាំ KOMBAT GLOBAL។ ដោយការយល់ឃើញថា ការបញ្ជូលកម្មវិធីប្រកួតគុនខ្មែរទៅក្នុងកម្មវិធីប្រកួត KOMBAT នឹងជំរុញបន្ថែមដល់ព្រឹត្តិការណ៍ប្រកួតកាន់តែជក់ចិត្តយ៉ាងខ្លាំង។ ខ្ញុំបានទៅចូលរួមនៅប្រទេសប្រេស៊ីល កន្លងមក ខ្ញុំឃើញការប្រកួត KOMBAT តេក្វាន់ដូ KOMBAT ជឺជីតស៊ូ នៅក្នុងទ្រុង គឺប្លែកភ្នែកម្យ៉ាង ហើយខ្ញុំក៏ជឿជាក់ដែរថា ប្រសិនបើបញ្ជូលកម្មវិធីទាំងនេះបញ្ជូលគ្នាឱ្យកីឡាករ កីឡាការិនីតេក្វាន់ដូ មកហ្វឹកហាត់គុនខ្មែរពិតជាល្អ ពីព្រោះថា ការប្រកួតប្រយុទ្ធគឺស្រដៀងគ្នាទេ ដោយមានវាយកណ្តាប់ដៃ ទាត់ជើង មានជង្គង់ កែង ដូចគ្នា ហើយពួកគាត់មកហាត់បន្ថែមនូវក្បាច់ក្លេ ជង្គង់ កែង តាមបែបគុនខ្មែរទៀត នោះការប្រកួតកាន់តែជក់ចិត្ត។ ពេលនេះកីឡាករ កីឡាការិនីទាំងនោះមានចំណាប់អារម្មណ៍ខ្លាំងណាស់ថាចង់ហ្វឹកហាត់គុនខ្មែរដែរ។ យើងចង់ធ្វើសមាហរណកម្មប្រភេទកីឡាប្រយុទ្ធនេះឱ្យកាន់តែជក់ចិត្តអស្ចារ្យកាន់តែខ្លាំងផងដែរ»៕

ដោយ ហេង ណាលីន