AKP ភ្នំពេញ ថ្ងៃទី២៥ ខែមិថុនា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោកជំទាវបណ្ឌិត Alona Fisher-Kammឯកអគ្គរដ្ឋទូតអ៊ីស្រាអែល ប្រចាំព្រះរាជាណាចក្រកម្ពុជាបានជួបពិភាក្សាគ្នាស្តីពីការបន្តពង្រឹងកិច្ចសហប្រតិបត្តិការលើវិស័យអប់រំរវាងកម្ពុជា និងអ៊ីស្រាអែល។

ក្នុងជំនួបនាថ្ងៃទី២៤ ខែមិថុនា ឆ្នាំ២០២៦ ភាគីទាំងពីរបានពិភាក្សាពីវឌ្ឍនភាពនៃការអនុវត្តកិច្ចព្រមព្រៀមសហប្រតិបត្តិការលើវិស័យអប់រំរវាងក្រសួងអប់រំ យុវជន និងកីឡាកម្ពុជា និងភាគីអ៊ីស្រាអែល ដែលស្ថានទូតអ៊ីស្រាអែលកំពុងផ្តោតការគាំទ្រលើវិស័យចំនួន៣ រួមមាន វិស័យអប់រំ កសិកម្ម និងការគ្រប់គ្រងធនធានទឹក ជាមួយកិច្ចខិតខំប្រឹងប្រែងជាបន្តបន្ទាប់ដើម្បីបង្កើនកិច្ចសហប្រតិបត្តិការក្នុងវិស័យទាំងនេះ។ ក្រៅពីនេះគូភាគីក៏បានពិភាក្សាពីកិច្ចសហប្រតិបត្តិការលើវិស័យអប់រំពាក់ព័ន្ធនឹងបញ្ញាសិប្បនិម្មិត AI ភាពជាដៃគូរវាងសាកលវិទ្យាល័យកម្ពុជា និងសាកលវិទ្យាល័យអ៊ីស្រាអែល វឌ្ឍនភាពកម្មវិធីចុះកម្មសិក្សា និងអាហារូបករណ៍សម្រាប់និស្សិតកម្ពុជាគាំទ្រដោយរដ្ឋាភិបាលអ៊ីស្រាអែល ការពង្រីកកម្មវិធីសិក្សាសម្រាប់និស្សិតកម្ពុជាលើជំនាញវិស្វកម្មបន្ថែមពីលើមុខវិជ្ជាដែលមានស្រាប់ក្នុងវិស័យកសិកម្ម និងការសិក្សាផ្សេងៗទៀត ស្ថានភាពនិស្សិតកម្ពុជាសិក្សានៅប្រទេសអ៊ីស្រាអែល ទាំងនិស្សិតដែលកំពុងរៀន និងនិស្សិតដែលបានបញ្ចប់ការសិក្សា ហើយបានត្រឡប់មកកម្ពុជាវិញ កិច្ចសហប្រតិបត្តិការលើគម្រោងស្រាវជ្រាវរួមគ្នា តាមរយៈមជ្ឈមណ្ឌលស្រាវជ្រាវ និងនវានុវត្តន៍ និងគំនិតផ្តួចផ្តើមបង្កើតគម្រោងស្រាវជ្រាវរួមគ្នាបន្ថែមទៀត។ 

ក្នុងឱកាសនៃជំនួបនោះ ភាគីអ៊ីស្រាអែលបានប្តេជ្ញាពង្រឹង និងពង្រីកឱកាសសិក្សាជំនាញខ្ពស់ និងជួយដល់ការត្រៀមខ្លួនរបស់និស្សិតកម្ពុជាសម្រាប់ទីផ្សារការងារ និងលើកកម្ពស់ការផ្លាស់ប្តូរផ្នែកអប់រំ។

សូមជម្រាបផងដែរថា កន្លងមកកិច្ចសហប្រតិបត្តិការរវាងក្រសួងអប់រំ យុវជន និងកីឡានៃព្រះរាជាណាចក្រកម្ពុជា និងរដ្ឋាភិបាលអ៊ីស្រាអែល តាមរយៈស្ថានទូតអ៊ីស្រាអែលប្រចាំកម្ពុជា និងតាមរយៈទីភ្នាក់ងារកិច្ចសហប្រតិបត្តិការអភិវឌ្ឍអន្តរជាតិរបស់អ៊ីស្រាអែល ហៅកាត់ថា MASHAV គឺផ្ដោតសំខាន់ទៅលើវិស័យអាហារូបករណ៍ ការបណ្ដុះបណ្ដាលធនធានមនុស្ស និងការអភិវឌ្ឍជំនាញបច្ចេកវិទ្យាកសិកម្ម ក្នុងនោះរួមមាន៖ 

១. អាហារូបករណ៍ និងការបណ្តុះបណ្តាលរបស់ MASHAV តាមរយៈវគ្គបណ្តុះបណ្តាលរយៈពេលខ្លី និងមធ្យមសម្រាប់មន្ត្រីរាជការ លោកគ្រូ អ្នកគ្រូ និងអ្នកជំនាញក្នុងវិស័យអប់រំរបស់កម្ពុជាផ្តោតលើជំនាញការគ្រប់គ្រងការអប់រំ ការច្នៃប្រឌិតក្នុងការអប់រំ ការអប់រំផ្នែកវិទ្យាសាស្ត្រ និងបច្ចេកវិទ្យា (STEM) និងការអប់រំកុមារតូច។ 

២. កម្មវិធីកម្មសិក្សាជំនាញកសិកម្មបច្ចេកវិទ្យាកម្រិតខ្ពស់ និងការអភិវឌ្ឍធនធានមនុស្សកម្រិតឧត្តមសិក្សា។ រៀងរាល់ឆ្នាំនិស្សិតកម្ពុជារាប់រយនាក់ត្រូវបានបញ្ជូនទៅធ្វើកម្មសិក្សាបែបស្វែងយល់ និងអនុវត្តផ្ទាល់នៅតាមកសិដ្ឋានទំនើបៗក្នុងប្រទេសអ៊ីស្រាអែលរយៈពេល ១១ខែដែលអនុញ្ញាតឱ្យពួកគេទទួលបានទាំងចំណេះដឹង ទ្រឹស្តី និងបទពិសោធបច្ចេកវិទ្យាកសិកម្មកម្រិតខ្ពស់។ 

៣. ការផ្លាស់ប្តូរបទពិសោធ ទស្សនកិច្ចសិក្សា និងកិច្ចសហប្រតិបត្តិការលើវិស័យកីឡា តាមរយៈការផ្លាស់ប្តូរបទពិសោធផ្នែកកីឡា និងការបណ្តុះបណ្តាលគ្រូបង្វឹក ឬកីឡាករ ក្នុងក្របខណ្ឌអភិវឌ្ឍន៍សមត្ថភាពផ្នែកកីឡារបស់កម្ពុជា។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះកិច្ចសហប្រតិបត្តិការលើវិស័យអប់រំរវាងអ៊ីស្រាអែល និងកម្ពុជា ដែលបានរួមចំណែកយ៉ាងសំខាន់ដល់ការបណ្ដុះបណ្ដាលធនធានមនុស្សជំនាញខ្ពស់លើវិស័យកសិកកម្ម បច្ចេកវិទ្យា STEM វិស្វកម្ម និងសហគ្រិនភាព ដែលបានឆ្លើយតបយ៉ាងល្អទៅនឹងយុទ្ធសាស្ត្រអភិវឌ្ឍមូលធនមនុស្សរបស់រាជរដ្ឋាភិបាលកម្ពុជា ព្រមទាំងបានគូសបញ្ជាក់នូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះការប្តេជ្ញាចិត្តក្នុងការបន្តពង្រឹង និងពង្រីកកិច្ចសហប្រតិបត្តិការនេះឱ្យកាន់តែរីកចម្រើន គាំទ្រដល់ការអភិវឌ្ឍសេដ្ឋកិច្ចសង្គមជាតិប្រទេសទាំងពីរ៕

ដោយ ចាន់ សុភឿន (ប្រភព៖ ក្រសួងអប់រំ)