AKP ភ្នំពេញ ថ្ងៃទី២២ ខែមិថុនា ឆ្នាំ២០២៦--លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ នាថ្ងៃទី២១ ខែមិថុនា ឆ្នាំ២០២៦ បានដឹកនាំក្រុមការងារ ចុះជួបសំណេះសំណាល សាកសួរសុខទុក្ខ និងនាំយកស្បៀងអាហារ ដែលជាអំណោយដ៏ថ្លៃថ្លារបស់ លោកជំទាវ សន ម៉ារ៉ាដា រដ្ឋលេខាធិការក្រសួងព័ត៌មាន និងការចូលរួមចំណែកថវិកាផ្ទាល់ខ្លួនរបស់លោកស្រីប្រធានមន្ទីរ ចុះទៅប្រគល់ជូនវីរកងទ័ពជួរមុខ ដែលកំពុងឈរជើងបំពេញភារកិច្ចការពារអធិបតេយ្យជាតិ និងបូរណភាពទឹកដី នៅតាមខ្សែបន្ទាត់ព្រំដែនកម្ពុជា-ថៃ ចំនួនពីរគោលដៅ ស្ថិតក្នុងភូមិសាស្ត្រស្រុកជាំក្សាន្ត ខេត្តព្រះវិហារ។

ក្នុងឱកាសនោះ លោកស្រី ហែម សុគុណពិសី បានពាំនាំនូវប្រសាសន៍ផ្ដាំផ្ញើសាកសួរសុខទុក្ខ ដោយក្តីនឹករលឹកបំផុតពីសំណាក់ ឯកឧត្តមរដ្ឋមន្ត្រីក្រសួងព័ត៌មាន ព្រមទាំងថ្នាក់ដឹកនាំក្រសួងព័ត៌មាន និងលោកជំទាវ សន ម៉ារ៉ាដា រដ្ឋលេខាធិការក្រសួងព័ត៌មាន ផ្ញើជូនដល់បងប្អូនវីរកងទ័ពជួរមុខទាំងអស់ ដែលជានិច្ចកាល ថ្នាក់ដឹកនាំគ្រប់លំដាប់ថ្នាក់តែងតែគិតគូរ និងយកចិត្តទុកដាក់ខ្ពស់ចំពោះសុខុមាលភាពរបស់បងប្អូនកងទ័ពនៅសមរភូមិមុខ។ លោកស្រីប្រធានមន្ទីរ ក៏បានថ្លែងនូវការកោតសរសើរដោយស្មោះស្ម័គ្រ និងវាយតម្លៃខ្ពស់ចំពោះវីរភាពអង់អាចក្លាហាន ស្មារតីលះបង់ និងការតស៊ូអត់ធ្មត់គ្រប់បែបយ៉ាងរបស់បងប្អូនវីរកងទ័ពទាំងអស់ ដែលបានខិតខំពុះពារជម្នះគ្រប់ឧបសគ្គ ឈរជើងការពារខ្សែបន្ទាត់ព្រំដែន ដើម្បីសុខសន្តិភាព និងភាពសុខសាន្តរបស់ប្រជាពលរដ្ឋនៅជួរក្រោយ។ 

ជាមួយគ្នានេះ លោកស្រីប្រធានមន្ទីរព័ត៌មានខេត្ដព្រះវិហារ ក៏បានសម្ដែងនូវការដឹងគុណយ៉ាងជ្រាលជ្រៅបំផុតចំពោះវីរកងទ័ព និងបានប្រសិទ្ធពរជ័យសិរីសួស្តី ជ័យមង្គល វិបុលសុខគ្រប់ប្រការ សូមឱ្យបងប្អូនវីរកងទ័ពទាំងអស់មានសុខភាពល្អបរិបូរណ៍ កម្លាំងមាំមួន និងទទួលបានជោគជ័យគ្រប់ភារកិច្ចបម្រើជាតិមាតុភូមិ។

សូមជម្រាបជូនថា អំណោយដែលបាននាំយកទៅប្រគល់ជូនដល់វីរកងទ័ពនាឱកាសនោះ រួមមាន៖ ទឹកបរិសុទ្ធចំនួន ៦០កេស ព្រមទាំងគ្រឿងឧបភោគបរិភោគ មានបន្លែស្រស់ៗចំនួន ៥មុខ, ត្រីស្រស់, ត្រីងៀត និងសាច់ជ្រូកមួយចំនួន។ ទន្ទឹមនេះ លោកស្រីប្រធានមន្ទីរព័ត៌មានខេត្ត និងក្រុមការងារ ក៏បានចូលរួមឧបត្ថម្ភថវិកាផ្ទាល់ខ្លួនបន្ថែមទៀត សម្រាប់រៀបចំជាអាហារសាមគ្គីរួមគ្នាជាមួយបងប្អូនវីរកងទ័ព ដើម្បីបង្កើតនូវបរិយាកាសដ៏រីករាយ ស្និទ្ធស្នាល និងកក់ក្តៅជាទីបំផុត ជាមហាគ្រួសារតែមួយ។ សកម្មភាពចុះសាកសួរសុខទុក្ខ និងការចូលរួមអាហារសាមគ្គីនាឱកាសនេះ បានស្តែងឱ្យឃើញយ៉ាងច្បាស់ពីសាមគ្គីភាព និងមនោសញ្ចេតនាយ៉ាងជ្រាលជ្រៅរវាង «សមរភូមិក្រោយ និងសមរភូមិមុខ» ដែលជានិច្ចកាលតែងតែនៅជាប់ជាមួយគ្នា ផ្តល់កម្លាំងចិត្តឱ្យគ្នាទៅវិញទៅមក ក្នុងបុព្វហេតុការពារជាតិមាតុភូមិកម្ពុជា ឱ្យបានរឹងមាំ៕

ដោយ៖ រិទ្ធី, ប្រភព៖ មន្ទីរព័ត៌មានខេត្ដព្រះវិហារ