AKP សៀមរាប ថ្ងៃទី​​១​៧​ ខែមិថុនា​ ​​​ឆ្នាំ២០២៦ ---អាជ្ញាធរជាតិអប្សរា បានរៀបចំវគ្គបណ្តុះ បណ្តាលផ្សព្វផ្សាយពិសេសមួយស្តីពី ប្រវត្តិសាស្ត្រ និងកិច្ចអភិរក្សទីក្រុងហរិហរល័យ ជូនដល់យុវជនជានិស្សិត និងសិស្សានុសិស្សចំនួន៥០នាក់ មកពីវិទ្យាល័យហ៊ុនសែនប្រាសាទបាគង ដែលវគ្គបណ្តុះបណ្តាលនេះត្រូវបានធ្វើឡើងនៅថ្ងៃទី​១៧ខែមិថុនាឆ្នាំ២០២៦ ដោយបានអញ្ជើញវាគ្មិនកិត្តិយសដែលជាថ្នាក់ដឹកនាំនិងមន្ត្រីជំនាញជាន់ខ្ពស់របស់អាជ្ញាធរជាតិអប្សរាចំនួន៤រូប មកផ្តល់កិត្តិយសធ្វើបទបង្ហាញលើប្រធាន បទសំខាន់ៗចំនួន៤ផ្សេងៗគ្នា។

វគ្គបណ្តុះបណ្តាលដ៏មានសារសំខាន់នេះ មិនត្រឹមតែជាការផ្តល់ចំណេះដឹងនៅក្នុងថ្នាក់រៀនប៉ុណ្ណោះទេ ប៉ុន្តែថែម ទាំងបានបើកឱកាសឱ្យសិស្សានុសិស្សបានចុះកម្មសិក្សា និងធ្វើទស្សនកិច្ចសិក្សាផ្ទាល់នៅតាមតំបន់ប្រាសា ទបុរាណ។ ហើយតាមរយៈការសិក្សាផ្ទាល់ភ្នែកនេះ យុវជនជំនាន់ក្រោយទទួលបាននូវការយល់ដឹងយ៉ាងជ្រាលជ្រៅអំពីប្រវត្តិសាស្ត្រតំបន់លលៃ ប្រវត្តិសិល្បៈ ភស្តុតាងបុរាណវិទ្យា និងអាថ៌កំបាំងនៃសិលាចារឹក។

លើសពីនេះទៅទៀត ពួកគេបានឃើញផ្ទាល់នូវការអនុវត្តជាក់ស្តែងលើកិច្ចការជួសជុល និងគាំពារប្រាសាទបុរាណប្រកបដោយចីរភាព ដែលជាបទពិ សោធន៍ដ៏កម្រក្នុងការបណ្តុះគំនិតឱ្យចេះស្រឡាញ់ លើកតម្លៃមរតកវប្បធម៌ និងចូលរួមថែរក្សាការពារសម្បត្តិបេតិកភណ្ឌដែលស្ថិតនៅក្នុងសហគមន៍របស់ខ្លួនផ្ទាល់។

ការស្គាល់ច្បាស់ពីប្រវត្តិសាស្ត្រ និងឫសគល់នៃទឹកដីកំណើត គឺជាគ្រឹះដ៏រឹងមាំបំផុតក្នុងការកសាងស្មារតីស្រឡាញ់ជាតិ និងការពារមរតកវប្បធម៌។ ដូច្នេះកម្មវិធីនេះត្រូវបានរៀបចំឡើងក្នុងន័យតម្រង់ទិសឱ្យយុវជនក្នុងសហគមន៍បានយល់ដឹងស៊ីជម្រៅ ក្នុងនាមជាម្ចាស់ស្រុកដែលត្រូវបន្តវេនថែរក្សាព្រលឹងវប្បធម៌ដូនតារបស់ខ្លួន។
 
គួរបញ្ជាក់ថា វាគ្មិនកិត្តិយសចំនួន៤រូបដែលអាជ្ញាធរជាតិអប្សរាបញ្ជូនមកនោះរួមមានលោក អ៊ឹម សុខរិទ្ធី ប្រធាននាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ បានធ្វើបទបង្ហាញលើប្រធានបទ ប្រវត្តិសាស្ត្រតំបន់រលួស។ ទី២លោក អន សុភាព មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា បានពង្រីកចំណេះដឹងផ្នែកសោភ័ណភាពតាមរយៈប្រធានបទ ប្រវត្តិសាស្ត្រសិល្បៈរចនាបថប្រាសាទព្រះគោ។ ទី៣លោក សារ៉ាយ គឹមហួល មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា បានផ្តល់ចំណេះដឹងផ្នែកបច្ចេកទេស នៃការថែទាំ តាមរយៈបទបង្ហាញស្តីពី ការអភិរក្ស និងជួសជុលប្រាសាទព្រះគោ។ និងទី៤គឺលោក វង្ស សាវុទ្ធី បុគ្គលិកបច្ចេកទេសនៃនាយកដ្ឋានស្រាវជ្រាវ បណ្តុះប ណ្តាល និងផ្សព្វផ្សាយ បាននាំយុវជនទៅជួបនឹងភស្តុតាងជាអក្សរចារឹក តាមរយៈប្រធានបទ សិលាចារឹកប្រាសាទព្រះគោ៕

ដោយ៖ ហង្ស សៀក