AKP សៀមរាប ថ្ងៃទី១៥ ខែមិថុនា ឆ្នាំ២០២៦-- រដ្ឋបាលខេត្តត្បូងឃ្មុំបានរៀបចំបើកកិច្ចប្រជុំដ៏សំខាន់មួយ ដើម្បីត្រួតពិនិត្យ និងសិក្សាអំពីស្ថានភាពច្រកទ្វារព្រំដែនដែលមានស្រាប់ នៅក្នុងភូមិសាស្ត្រខេត្តត្បូងឃ្មុំ នាព្រឹកថ្ងៃទី១៥ ខែមិថុនា ឆ្នាំ២០២៦ ក្នុងគោលបំណងត្រៀមរៀបចំបង្កើត និងដំឡើងកម្រិតច្រកទ្វារព្រំដែនគោក រវាងកម្ពុជា-វៀតណាម ឱ្យកាន់តែមានប្រសិទ្ធភាព និងស្របតាមតម្រូវការជាក់ស្ដែង។

កិច្ចប្រជុំនេះត្រូវបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តម គៀត ច័ន្ទថារិទ្ធ រដ្ឋលេខាធិការក្រសួងមហាផ្ទៃ និងជាប្រធានក្រុមការងារអន្តរក្រសួង រួមជាមួយ ឯកឧត្ដម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ។

ក្នុងកិច្ចប្រជុំនោះ ឯកឧត្តម គៀត ច័ន្ទថារិទ្ធ បានគូសបញ្ជាក់យ៉ាងច្បាស់ថា "ការរៀបចំបង្កើត និងការដំឡើងកម្រិតច្រកទ្វារព្រំដែន គឺជាយុទ្ធសាស្ត្រដ៏សំខាន់របស់រាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ចជាតិ តាមរយៈការសម្រួលពាណិជ្ជកម្ម ការផ្លាស់ប្តូរទំនិញ និងទេសចរណ៍ទ្វេភាគី។ ទន្ទឹមនឹងការជំរុញសេដ្ឋកិច្ច យើងត្រូវតែបន្តយកចិត្តទុកដាក់ខ្ពស់បំផុត លើការគ្រប់គ្រងសន្តិសុខ សណ្តាប់ធ្នាប់សាធារណៈ និងការទប់ស្កាត់រាល់បទល្មើសឆ្លងដែនគ្រប់ប្រភេទ ដើម្បីធានាឱ្យបាននូវបន្ទាត់ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។"

ពាក់ព័ន្ធនឹងការងារនេះ ឯកឧត្ដម ប៉ែន កុសល្យ បានថ្លែងបញ្ជាក់ពីការប្តេជ្ញាចិត្តរបស់រដ្ឋបាលខេត្តថា៖ "រដ្ឋបាលខេត្តត្បូងឃ្មុំ បាននិងកំពុងត្រៀមលក្ខណៈសម្បត្តិរួចជាស្រេច ទាំងការរៀបចំហេដ្ឋារចនាសម្ព័ន្ធតភ្ជាប់ និងកម្លាំងអាជ្ញាធរពាក់ព័ន្ធ ដើម្បីសហការយ៉ាងជិតស្និទ្ធជាមួយក្រុមការងារអន្តរក្រសួង។ ការដំឡើងកម្រិតច្រកទ្វារព្រំដែនក្នុងភូមិសាស្ត្រខេត្តយើង មិនត្រឹមតែជួយលើកស្ទួយម៉ាក្រូសេដ្ឋកិច្ចប៉ុណ្ណោះទេ ប៉ុន្តែនឹងផ្តល់អត្ថប្រយោជន៍ដោយផ្ទាល់ដល់ប្រជាពលរដ្ឋក្នុងមូលដ្ឋាន ជួយសម្រួលដល់ការដោះដូរកសិផល ព្រមទាំងបង្កើតឱកាសការងារ ដែលជាការរួមចំណែកកាត់បន្ថយភាពក្រីក្រយ៉ាងពិតប្រាកដ។"

កិច្ចប្រជុំនេះ ក្រុមការងារអន្តរក្រសួង រួមជាមួយថ្នាក់ដឹកនាំខេត្តត្បូងឃ្មុំ បានពិនិត្យ និងវាយតម្លៃស៊ីជម្រៅទៅលើលក្ខខណ្ឌភូមិសាស្ត្រ ហេដ្ឋារចនាសម្ព័ន្ធបច្ចុប្បន្ន ស្ថានភាពសន្តិសុខ និងសណ្តាប់ធ្នាប់នៅតាមបណ្តាច្រកទ្វារព្រំដែននានាក្នុងខេត្ត។ ការពិភាក្សាក៏បានផ្តោតលើលទ្ធភាព និងយន្តការក្នុងការបង្កើតច្រកទ្វារព្រំដែនថ្មី ក៏ដូចជាការដំឡើងកម្រិតច្រកទ្វារព្រំដែនដែលមានស្រាប់ ឱ្យក្លាយទៅជាច្រកទ្វារអន្តរជាតិ ឬទ្វេភាគី ដែលអាចជំរុញសកម្មភាពសេដ្ឋកិច្ច ពាណិជ្ជកម្ម និងទេសចរណ៍រវាងប្រទេសទាំងពីរ៕

ដោយ ហ៊ីម លុកម៉ាន