AKP ភ្នំពេញ ថ្ងៃទី១៥ ខែមិថុនា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ថា សូមឱ្យពិធីបើកការដ្ឋាននេះមិនត្រឹមតែជានិមិត្តរូបនៃការចាប់ផ្តើមសាងសង់អគារវះកាត់ថ្មីមួយប៉ុណ្ណោះទេ ប៉ុន្តែថែមទាំងជាការពង្រឹងចក្ខុវិស័យរួមមួយគឺ៖ ព្រះរាជាណាចក្រកម្ពុជា ដែលកុមារគ្រប់រូបអាចទទួលបានការថែទាំព្យាបាលវះកាត់ប្រកបដោយសុវត្ថិភាព គុណភាពខ្ពស់ និងទាន់ពេលវេលា។ រួមគ្នាដើម្បីសុខភាពកុមារ គឺរួមគ្នាដើម្បីអនាគតកម្ពុជា។

នេះជាប្រសាសន៍របស់ឯកឧត្តមសាស្ត្រាចារ្យរដ្ឋមន្ត្រីក្នុងពិធីបើកការដ្ឋានសាងសង់ អគារសល្យសាស្រ្តកុមារនៃមន្ទីរពេទ្យកុមារជាតិ ដែលជាជំនួយរបស់សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នាព្រឹកថ្ងៃចន្ទ ទី១៥ ខែមិថុនា ឆ្នាំ២០២៦ នៅមន្ទីរពេទ្យកុមារជាតិ។

ឯកឧត្តមសាស្រ្តាចារ្យរដ្ឋមន្រ្តីបានគូសរំលេចថា បុណ្យកុសលធំដែលផ្តល់ផលប្រយោជន៍លើពិភពលោកគឺ ជួយសង្គ្រោះ ជាពិសេសទារក និងកុមារ។ ដូច្នេះសូមឱ្យកុសលទាំងនេះ ក្លាយទៅជាសមិទ្ធផលមួយដែលស្ថិតនៅស្ថេរយូអង្វែង ដែលផលទទួលបានពីការកសាងអគារ និងព្យាបាល គឺភាពឋិតឋេរសម្រាប់មនុស្សតជំនាន់។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តីបានកោតសរសើរចំពោះកិច្ចខិតខំប្រឹងប្រែងរបស់សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានផ្តោតការយកចិត្តទុកដាក់លើការសង្គ្រោះជីវិត។ នេះជានិមិត្តរូបនៃសេចក្តីស្រឡាញ់ដ៏បរិសុទ្ធប្រកបដោយបេះដូងមនុស្សធម៌ និងការគាំទ្រលើវិស័យសុខាភិបាលកន្លងមក និងទៅអនាគត ពិសេសការជួយពង្រឹងគុណភាព ហេដ្ឋារចនាសម្ព័ន្ធ និងបរិក្ខារពេទ្យថ្មីៗដល់មន្ទីរពេទ្យកុមារជាតិ និងមន្ទីរពេទ្យជាច្រើនទៀតនៅទូទាំងប្រទេស ព្រមទាំងបានណែនាំដល់គ្រប់មន្ទីរពេទ្យទាំងអស់ ត្រូវផ្តល់អាទិភាពនៃការគិតគូរលើការអភិវឌ្ឍន៍លើការបម្រើសេវាដល់កុមារ ទារកជាពិសេស ឱ្យកាន់តែប្រសើរថែមទៀត នៅគ្រប់មន្ទីរពេទ្យទាំងឡាយ ដោយកុមារ ទារក គឺជាអនាគតរបស់ប្រទេសជាតិ។ ឯកឧត្តមសាស្រ្តាចារ្យរដ្ឋមន្រ្តីបានណែនាំដល់មន្ទីរពេទ្យ ត្រូវរៀបចំផែនការទុកជាមុន ប្លង់រួម សំណង់អគារ ផែនការនៃដំណើរការ ការអភិវឌ្ឍមន្ទីរពេទ្យរបស់ខ្លួន និងផលដែលទទួលបានមកវិញកម្រិតណា ដើម្បីជាការកៀរគរ ការវិយោគវិស័យសាធារណៈ និងដៃគូអភិវឌ្ឍងាយស្រួលក្នុងការចូលរួម និងឧបត្ថម្ភគាំទ្រ។

ជាមួយគ្នានេះដែរ ឯកឧត្តមសាស្រ្តាចារ្យរដ្ឋមន្រ្តីបានផ្តល់នូវអនុសាសន៍ដល់មន្រ្តីសុខាភិបាលទាំងអស់ ដោយត្រូវយកចិត្តទុកក្នុងការអនុវត្ត៖ ១) ពង្រឹងគុណភាពសេវា និងក្រមសីលធម៌វិជ្ជាជីវៈ ក្នុងនោះត្រូវពង្រឹងសមត្ថភាពជំនាញ ដើម្បីធានាបានការធ្វើរោគវិនិច្ឆ័យ និងការព្យាបាលប្រកបដោយប្រសិទ្ធភាព ក្រមសីលធម៌ អាកប្បកិរិយា បដិសណ្ឋារកិច្ច ពាក្យសម្តីទន់ភ្លន់ យកចិត្តទុកដាក់ និងការផ្តល់ក្តីសង្ឃឹមដល់អ្នកជំងឺ និងក្រុមគ្រួសារ ដែលជាផ្នែកមួយដ៏សំខាន់នៃការព្យាបាលផ្នែកស្មារតី។ ២) ការបម្រើសេវាដោយមិនរើសអើង ដោយត្រូវធានាថាកុមារកម្ពុជាគ្រប់រូប ទទួលបានការបម្រើសេវា សុខាភិបាលប្រកបដោយគុណភាព។ ៣) ការគ្រប់គ្រង និងថែទាំសមិទ្ធផល ថែទាំអគារ និងបរិក្ខារ នៅពេលអគារថ្មីសាងសង់រួច ត្រូវចេះគ្រប់គ្រង និងថែទាំឱ្យបានល្អ ដើម្បីប្រើប្រាស់បានយូរអង្វែងសម្រាប់បម្រើប្រយោជន៍សាធារណៈ។ ត្រូវរក្សាបរិស្ថានមន្ទីរពេទ្យឱ្យមានអនាម័យខ្ពស់ និងផាសុកភាព ព្រោះវាជាកត្តាជួយដល់ការឆាប់ជាសះស្បើយរបស់អ្នកជំងឺ។ ៤) ការពង្រីកវិសាលភាពនៃមូលនិធិសមធម៌ ដែលជាគោលនយោបាយរបស់រាជរដ្ឋាភិបាល ក្នុងការគ្របដណ្តប់មូលនិធិសមធម៌សុខាភិបាល ដើម្បីជួយដល់គ្រួសារក្រីក្រ និងងាយរងគ្រោះ មានលទ្ធភាពទទួលបានការព្យាបាលដោយឥតគិតថ្លៃ។ ៥) ពិនិត្យរៀបចំ និងអនុវត្តសកម្មភាពកែលម្អគុណភាពជាប្រចាំដោយរាប់បញ្ចូលទាំងសកម្មភាពអភិបាលកិច្ចគ្លីនិក និងការប្រើប្រាស់បច្ចេកវិទ្យាឌីជីថលប្រកបដោយនវានុវត្តន៍ ដើម្បីបង្កើនគុណភាពសេវា ឆ្លើយតបទៅនឹងតម្រូវការរបស់ប្រជាជន និងការទទួលព័ត៌មានត្រឡប់ ក្នុងការដោះស្រាយទាន់ពេលនិងត្រឹមត្រូវ ដើម្បីរក្សាជំនឿទុកចិត្តរបស់អ្នកជំងឺ និងសាធារណជន។ ៦) ថ្នាក់ដឹកនាំមន្ទីរពេទ្យ និងបុគ្គលិកទាំងអស់ ត្រូវបន្តដើរតួនាទីនាំមុខ ជាមគ្គុទេសជា ទីប្រឹក្សា អ្នកស្រាវជ្រាវ និងអ្នកនវានុវត្តន៍ អភិវឌ្ឍសមត្ថភាពជាប់ជាប្រចាំទាំងផ្នែកចំណេះដឹង និងការប្រើប្រាស់បច្ចេកវិទ្យាព័ត៌មាន ដើម្បីលើកកម្ពស់ប្រសិទ្ធភាពនៅក្នុងការបង្រៀន និងការផ្សារភ្ជាប់ទ្រឹស្តីទៅនឹងការអនុវត្តជាក់ស្តែង រួមចំណែកដល់ការអភិវឌ្ឍមូលធនមនុស្សក្នុងវិស័យសុខាភិបាលរបស់កម្ពុជា។

ឯកឧត្តមសាស្រ្តាចារ្យសូមកោតសរសើរ និងអរគុណថ្នាក់ដឹកនាំ និងបុគ្គលិកសុខាភិបាល មន្ទីរពេទ្យកុមារជាតិគ្រប់លំដាប់ថ្នាក់ ដែលបានបំពេញភារកិច្ចរបស់ខ្លួន លះបង់មិនគិតពីភាពនឿយហត់ ប្រកបដោយក្រមសីលធម៌វិជ្ជាជីវៈ បម្រើសេវាសុខភាព ជូនប្រជាជនជាពិសេស ក្នុងការសង្គ្រោះជីវិតកុមារជាសសរទ្រូងរបស់ប្រទេសជាតិយើង។

សូមបញ្ជាក់ថា អគារសល្យសាស្រ្តកុមារនៃមន្ទីរពេទ្យកុមារជាតិ ដែលត្រូវសាងសង់នាពេលនេះ មានទំហំ ៣ ២៨៧ ម៉ែត្រការ៉េ បណ្តោយ ២៩.៩ម៉ែត្រ ទទឹង២៣.៦ម៉ែត្រ កម្ពស់ ២០.៤ ម៉ែត្រ កម្ពស់៤ជាន់ (ទាំងជាន់ផ្ទាល់ដី) រួមទាំងការបំពាក់សម្ភារៈបរិក្ខារចាំបាច់ ដែលសរុបជាទឹកប្រាក់ចំនួន ៥,២០០,០០០ ដុល្លាអាមេរិក គ្រោងនឹងបញ្ចប់ការសាងសង់នៅខែសីហា ឆ្នាំ២០២៧ ក្នុងគម្រោងពង្រឹងសមត្ថភាពផ្នែកវះកាត់នៃមន្ទីរពេទ្យកុមារ។ តាមរយៈអាគារនេះ នឹងក្លាយជាការធ្វើនវានុវត្តន៍បន្ថែមទៀត ក្នុងការបម្រើសេវាសុខភាព ប្រកបដោយគុណភាព ទំនើបកម្មបរិក្ខារពេទ្យ និងសេវាកម្ម សំដៅធ្វើឱ្យប្រសើរឡើងសុខភាពកុមារ និងសុខុមាលភាពប្រជាជនកម្ពុជា។

ពិធីនេះមានការអញ្ជើញចូលរួមពីលោក Tai MZ. Benjamin ប្រធានប្រចាំតំបន់អាស៊ីនៃសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងឯកឧត្តម លោកជំទាវ លោក លោកស្រី ថ្នាក់ដឹកនាំក្រសួងសុខាភិបាល ប្រធានអង្គភាពថ្នាក់កណ្តាល មន្ទីរពេទ្យជាតិ ភ្ញៀវកិត្តិយសជាតិ-អន្តរជាតិ បុគ្គលិកមន្ទីរពេទ្យកុមារជាតិ និងនិស្សិតនៃសាកលវិទ្យាល័យវិទ្យាសាស្រ្តសុខាភិបាល៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)