AKP បាត់ដំបង ថ្ងៃទី១៩ ខែមិថុនា ឆ្នាំ២០២៦--លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តបាត់ដំបងបានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីរកិច្ចការនារីខេត្តបាត់ដំបង ដែលពិធីនេះប្រារព្ធធ្វើនៅថ្ងៃទី១៩ ខែមិថុនា ឆ្នាំ២០២៦ នៅសាលប្រជុំសាលាខេត្តបាត់ដំបង។

មានប្រសាសន៍ក្នុងពិធីនេះ ឯកឧត្តម សុខ លូ បានអបអរសាទរចំពោះលោកស្រី អ៊ាន ណារៀង ដែលទទួលបានការ ប្រកាសតែងតាំងជាប្រធានមន្ទីរកិច្ចការនារីខេត្តបាត់ដំបងជំនួសលោកស្រី ភោគ សុភ័ក្រ្ត ដែលបានចូលនិវត្តន៍។ការរៀបចំពិធីប្រកាសចូលកាន់មុខតំណែងនេះ ជាការអនុវត្តន៍ស្របតាមបែបបទនីតិវិធីរដ្ឋបាល និងជាច្បាប់ទម្លាប់ធម្មតារបស់មន្រ្តីរាជការក្នុងការរៀបចំ និងពង្រឹងរចនាសម្ព័ន្ធដឹកនាំ។

ការផ្លាស់ប្តូរ ឬការតែងតាំងមុខតំណែងថ្មីនេះ ធ្វើឡើងក្នុងគោលបំណងធានានូវនិរន្តរភាពការងារ ព្រមទាំងជាការផ្ដល់ឱកាសក្នុងការអនុវត្តន៍មុខងារ សមត្ថភាព បង្កើនប្រសិទ្ធភាពការងារ និងការទទួលខុសត្រូវខ្ពស់ជាងមុន ដើម្បីឆ្លើយតបទៅនឹងតម្រូវការជាក់ស្ដែងនៃសង្គមជាតិ ស្របតាមគោលនយោបាយកែទម្រង់រដ្ឋបាលសាធារណៈរបស់រាជរដ្ឋាភិបាល។

ឯកឧត្តមបានសម្តែងនូវការកោតសរសើរយ៉ាងស្មោះស្ម័គ្រ និងវាយតម្លៃខ្ពស់បំផុតចំពោះថ្នាក់ដឹកនាំ និងមន្ត្រីរាជការនៃមន្ទីរកិច្ចការនារីខេត្តទាំងអស់ដែលកន្លងមកបានខិតខំប្រឹងប្រែងរួមគ្នាពុះពារគ្រប់ឧបសគ្គ បំពេញភារកិច្ចស្នូលរហូតសម្រេចបាននូវស្នាដៃ និងលទ្ធផលការងារជាច្រើនគួរជាទីមោទនៈ។ សមិទ្ធផលទាំងនោះ បានរួមចំណែកយ៉ាងធំធេងក្នុងការលើកកម្ពស់សមភាពយែនឌ័រ ការការពារសិទ្ធិស្ត្រី-កុមារ ការលុបបំបាត់រាល់ទម្រង់នៃការរើសអើង និងការអភិវឌ្ឍន៍សមត្ថភាពស្ត្រីក្នុងខេត្តទាំងមូល។ លោកស្រីប្រធានមន្ទីរថ្មីក៏ដូចជាមន្ត្រីរាជការទាំងអស់ត្រូវពង្រឹងសាមគ្គីភាព និងឯកភាពផ្ទៃក្នុង។លោកស្រីប្រធានមន្ទីរថ្មី ត្រូវដើរតួជាស្នូល និងជារូបភាពតំណាងនៃការប្រមូលផ្តុំកម្លាំង រក្សាសាមគ្គីភាពផ្ទៃក្នុង រវាងថ្នាក់ដឹកនាំមន្ទីរ និងមន្ត្រីរាជការគ្រប់ជាន់ថ្នាក់ឱ្យ បានខ្ជាប់ខ្ជួន។ ត្រូវដឹកនាំដោយគោរពតាមគោលការណ៍ច្បាប់ លទ្ធិប្រជាធិបតេយ្យ ស្តាប់មតិយោបល់ជុំវិញខ្លួន មានតម្លាភាព និងចៀសវាងដាច់ខាតនូវបុគ្គលនិយម ឬការបែកបាក់ដែលនាំឱ្យប៉ះពាល់ដល់ដំណើរការការងាររដ្ឋបាល។ត្រូវបន្តចាត់ចែងអនុវត្តការងារ និងផែនការសកម្មភាពនានាដែលនៅសេសសល់ពីថ្នាក់ដឹកនាំមុនឱ្យមានប្រសិទ្ធភាព។

ទន្ទឹមនឹងនេះត្រូវបង្កើនកិច្ចសហការយ៉ាងជិតស្និទ្ធ បើកចំហ និងរលូនជាមួយមន្ទីរ អង្គភាពជុំវិញខេត្ត អាជ្ញាធរក្រុង ស្រុក ឃុំ សង្កាត់ ព្រមទាំងដៃគូអភិវឌ្ឍន៍ និងអង្គការសង្គមស៊ីវិលនានា ដើម្បីរួមគ្នាជំរុញចរន្តការងារស្ត្រីឱ្យមានកម្លាំងខ្លាំងក្លាឡើង។ ត្រូវយកចិត្តទុកដាក់ខ្ពស់ក្នុងការផ្សព្វផ្សាយ និងអនុវត្តគោលនយោបាយជាតិ យុទ្ធសាស្ត្រនានាសំដៅលុបបំបាត់រាល់ទម្រង់ នៃអំពើហិង្សាលើស្ត្រីនិងកុមារ។ត្រូវសហការជាមួយគណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) គ្រប់លំដាប់ថ្នាក់ដើម្បីតាមដានជួយសង្គ្រោះ និងគាំទ្រផ្នែកច្បាប់ ក៏ដូចជាផ្នែកជីវភាពដល់ស្ត្រី និងកុមារដែលងាយរងគ្រោះ ឬរងគ្រោះដោយសារអំពើហិង្សាក្នុងគ្រួសារ និងការជួញដូរមនុស្ស។ ត្រូវបង្កើតកម្មវិធីបណ្តុះបណ្តាលវិជ្ជាជីវៈជំនាញទន់ និងជំនាញរឹងដល់ស្រ្តីនៅក្នុងមូលដ្ឋាន ជាពិសេសស្ត្រីនៅតាមតំបន់ជនបទដាច់ស្រយាល ដើម្បីជួយឱ្យពួកគាត់មានលទ្ធភាពបង្កើតមុខរបរផ្ទាល់ខ្លួន បង្កើនចំណូលគ្រួសារ និងមានភាពឯករាជ្យផ្នែកសេដ្ឋកិច្ច។ ជាងនេះទៅទៀត ត្រូវពង្រឹងសមត្ថភាពមន្រ្តីរាជការនៅក្នុងមន្ទីរខ្លួនឯង ឱ្យស្របទៅនឹងយុគសម័យបច្ចេកវិទ្យា និងសង្គមឌីជីថល។ ក្នុងនាមជាមន្ត្រីរាជការ បម្រើ ប្រជាពលរដ្ឋត្រូវប្រកាន់ខ្ជាប់នូវភាពស្មោះត្រង់ ក្រមសីលធម៌វិជ្ជាជីវៈ មិនត្រូវមានការរើសអើង បក្ខពួកនិយម ឬនិន្នាការនយោបាយឡើយ។ ត្រូវខិតខំដោះស្រាយរាល់កង្វល់ ឬសំណូមពររបស់បងប្អូនស្រ្តីនៅក្នុងខេត្ត ដោយស្មារតីទទួលខុសត្រូវខ្ពស់ និងរហ័សទាន់ចិត្ត។

លោកជំទាវកិត្តិបណ្ឌិត អ៊ឹង កន្ថាផាវី បានណែនាំដល់មន្ទីរកិច្ចការនារីខេត្តបាត់ដំបងត្រូវពង្រឹងសាមគ្គីភាព ដឹកនាំប្រកបដោយតម្លាភាព លើកកម្ពស់សមត្ថភាពឱ្យមានចំណេះដឹងខ្ពស់ និងបម្រើសេវាជូនសាធារណជនឱ្យបានល្អប្រសើរ៕

ដោយ ណយ នឿន (ប្រភព៖រដ្ឋបាលខេត្តបាត់ដំបង)