AKP ភ្នំពេញ ថ្ងៃទី១៥ ខែមិថុនា ឆ្នាំ២០២៦--សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា ការប្រារព្ធទិវាជាតិ អប់រំបណ្ដុះបណ្ដាលបច្ចេកទេស និងវិជ្ជាជីវៈជារៀងរាល់ឆ្នាំ បាន និងកំពុងឆ្លុះបញ្ចាំងអំពីការយកចិត្តទុកដាក់ខ្ពស់របស់រាជរដ្ឋាភិបាល លើការកសាងមូលធនមនុស្សនៅកម្ពុជាឲ្យក្លាយជាសសរទ្រូងដ៏ពិតប្រាកដនៃការអភិវឌ្ឍសង្គម-សេដ្ឋកិច្ចជាតិប្រកបដោយប្រសិទ្ធភាព បរិយាបន្ន និងចីរភាព សំដៅលើកកម្ពស់ជីវភាព និងសុខុមាលភាពរបស់ប្រជាជនកម្ពុជាជាបន្តបន្ទាប់ និងកាត់បន្ថយគម្លាតវិសមភាពសង្គមជាលំដាប់ឆ្ពោះទៅបង្កើតសង្គមមួយដែលមាន សន្តិភាព សាមគ្គីធម៌ និងយុត្តិធម៌។

ថ្លែងក្នុងទិវាជាតិអប់រំ បណ្តុះបណ្តាលបច្ចេកទេស និងវិជ្ជាជីវៈ លើកទី៩ ឆ្នាំ២០២៦ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល» ដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស យុវជន មាតាបិតា អាណាព្យាបាល និងផ្នែកឯកជនឱ្យបានយល់ដឹងអំពីសារៈសំខាន់ នៃការអប់រំបណ្តុះបណ្តាលបច្ចេកទេស និងវិជ្ជាជីវៈ នៅមជ្ឈ មណ្ឌលសន្និបាត និងពិព័រណ៍កោះពេជ្រ ដែលរៀបចំឡើងដោយក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១៥ ខែមិថុនា ឆ្នាំ២០២៦ សម្តេចធិបតី នាយករដ្ឋមន្ត្រី បានគូសបញ្ជាក់ថា រាជរដ្ឋាភិបាលតែងតែចាត់ទុកមូលធនមនុស្សគឺជាដង្ហើមនៃវឌ្ឍនភាពសង្គមសេដ្ឋកិច្ចជាតិ ហើយថាការកែច្នៃប្រជាជនកម្ពុជាឲ្យក្លាយទៅជាមូលធនមនុស្សពិតប្រាកដ គឺស្មើនឹងការកែច្នៃគ្រាប់ពេជ្រដ៏ភ្លឺត្រចះត្រចង់ និងមានតម្លៃឥតគណនាចំពោះអត្ថិភាពនៃសង្គមស៊ីវីល័យនៅកម្ពុជា។

សម្តេចនាយករដ្ឋមន្ត្រីបានបន្ថែមថា រាជរដ្ឋាភិបាលបានកំណត់យកការបណ្ដុះបណ្ដាលជំនាញបច្ចេក ទេសវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យទូទាំងប្រទេស ដែលមានចំនួនសរុបប្រមាណជា ១លាន ៥សែននាក់ នៅតាមបណ្ដាគ្រឹះស្ថានបណ្ដុះបណ្ដាលវិជ្ជាជីវៈរបស់រដ្ឋ ក្នុងកម្រិតសញ្ញាបត្របច្ចេកទេស និងវិជ្ជាជីវៈកម្រិត១ ដោយមិនបង់ថ្លៃសិក្សា និងទទួលបាននូវប្រាក់ឧបត្ថម្ភប្រចាំខែ។ កិច្ចការងារនេះគឺជាកម្មវិធីទីពីរនៃគោលនយោបាយអាទិភាពទាំងប្រាំមួយ សម្រាប់ចាប់ផ្ដើមអនុវត្តភ្លាមក្នុងឆ្នាំ២០២៣ នៃយុទ្ធសាស្ត្របញ្ចកោណ ដំណាក់កាលទីមួយ ហើយបើតាមរបាយការណ៍របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ តាំងពីចន្លោះដែលយើងអនុវត្តនូវផែនការនេះពីឆ្នាំ២០២៤ ដល់ខែ៥ ២០២៦នេះបានផ្ដល់ការបណ្ដុះបណ្ដាលជាង ២៧ម៉ឺននាក់ ជូនដល់កូនចៅប្រជាពលរដ្ឋ។ និយាយរួម គិតចាប់ពីចន្លោះឆ្នាំ២០២២ ដល់ឆ្នាំ២០២៦ យោងតាមទិន្នន័យឆ្នាំ២០២៦នេះ ក្រសួងការងារបានធ្វើការបណ្ដុះបណ្ដាលជំនាញជូនដល់ប្រជាពលរដ្ឋប្រមាណ ៧០ម៉ឺននាក់។ នេះគឺជានូវសមិទ្ធផលមួយដែលសម្តេចសូមធ្វើការកោតសរសើរចំពោះក្រសួងការងារ និងបណ្ដុះបណ្ដាលវិជ្ជាជីវៈ។

សម្តេចបានបន្ថែមថា រាជរដ្ឋាភិបាល បាន និងកំពុងខិតខំអភិវឌ្ឍន៍ប្រព័ន្ធអប់រំបណ្ដុះបណ្ដាលបច្ចេក ទេស និងវិជ្ជាជីវៈមួយនៅកម្ពុជាដែលនឹងបង្កើតការយល់ដឹងឲ្យកាន់តែទូលំទូលាយ ដោយបំពាក់ជំនាញពិតប្រាកដ កសាងសីលធម៌ និងវិជ្ជាជីវៈ ទាំងក្នុងជីវភាពប្រចាំថ្ងៃ និងនៅកន្លែងការងារដល់ប្រជាពលរដ្ឋ តាមរយៈការរៀបចំកម្មវិធីអប់រំបណ្ដុះបណ្ដាលដែលមានលក្ខណៈបត់បែន ស្របតាមស្ថានភាពជាក់ស្ដែងរបស់ប្រជាពលរដ្ឋ ជាពិសេសយុវជន និងអ្នកសេដ្ឋកិច្ចក្រៅប្រព័ន្ធ សំដៅសម្រេចឲ្យបាននូវគោលដៅ "ពលរដ្ឋម្នាក់មានជំនាញមួយយ៉ាងតិចប្រចាំជីវិត" ឬមិនទុកឲ្យពលរដ្ឋណាម្នាក់គ្មានជំនាញនោះឡើយ។ នៅក្នុងន័យនេះ ក្រសួងការងារ និងក្រសួងអប់រំបានសហការគ្នារៀបចំនូវគន្លងអប់រំថ្មីមួយដែលហៅថា "គន្លងវិជ្ជាជីវៈ"៕

ដោយ៖ ចាន់ សុភឿន, រូបថត៖ គល់ រ៉េននី