AKP ភ្នំពេញ ថ្ងៃទី១២ ខែមិថុនា ឆ្នាំ២០២៦ -- នៅក្នុងកិច្ចប្រជុំកំពូលសហភាពអឺរ៉ុប-កូរ៉េខាងត្បូងលើកទី១១ នៅទីក្រុងព្រុចសែល បណ្តាមេដឹកនាំមកពីតំបន់ទាំងពីរបានសន្យាថានឹងពង្រឹងកិច្ចសហប្រតិបត្តិការទ្វេភាគី ដោយសង្កត់ធ្ងន់ថា សន្តិសុខនៅអឺរ៉ុប និងតំបន់ឥណ្ឌូ-ប៉ាស៊ីហ្វិកកាន់តែមានទំនាក់ទំនងគ្នាទៅវិញទៅមក។ ប្រធានគណៈកម្មការអឺរ៉ុបលោកស្រី យូស៊ូឡា​ វ៉ុន ដឺ ឡេយេន បានគូសបញ្ជាក់ពីភាពបន្ទាន់នៃភាពជាដៃគូនេះ ដោយចង្អុលបង្ហាញពីការដាក់ពង្រាយកងទ័ពកូរ៉េខាងជើងនៅអ៊ុយក្រែនជាឧទាហរណ៍ផ្ទាល់មួយអំពីរបៀបដែលជម្លោះក្នុងតំបន់មានផលវិបាកជាសកល។

ដើម្បីពង្រឹងទំនាក់ទំនងសន្តិសុខ និងការពារជាតិ ចំពេលដែលមានភាពមិនប្រាកដប្រជាកាន់តែខ្លាំងឡើងលើឆាកអន្តរជាតិ ភាគីទាំងពីរបានព្រមព្រៀងចាប់ផ្តើមកិច្ចចរចាលើកិច្ចព្រមព្រៀងសន្តិសុខព័ត៌មាន ដើម្បីចែករំលែកព័ត៌មានសម្ងាត់ដោយសុវត្ថិភាព។ មេដឹកនាំភាគីទាំងពីរក៏បានបញ្ជាក់សរជាថ្មីនូវការប្តេជ្ញាចិត្តរបស់ពួកគេចំពោះតម្លៃប្រជាធិបតេយ្យដោយប្រធានក្រុមប្រឹក្សាអឺរ៉ុប លោក អេនតូនីញ៉ូ កូស្តា បានព្រមានថាការឈ្លានពានខាងយោធាមិនអាចអត់ឱនបានទេ ប្រសិនបើសណ្តាប់ធ្នាប់សកលលោកដែលមានមូលដ្ឋានលើច្បាប់ត្រូវបានរក្សា។

ក្រៅពីវិស័យសន្តិសុខ កិច្ចប្រជុំកំពូលនេះបាននាំឱ្យមានកតិកាសញ្ញាសំខាន់ៗដើម្បីបង្កើនភាពធន់ផ្នែកសេដ្ឋកិច្ច រួមទាំងកិច្ចព្រមព្រៀងពាណិជ្ជកម្មឌីជីថលដ៏សំខាន់មួយ ដើម្បីជំរុញពាណិជ្ជកម្មអេឡិចត្រូនិក និងលំហូរទិន្នន័យផងដែរ។ លើសពីនេះ ភាគីទាំងពីរបានបង្កើតភាពជាដៃគូប្រកួតប្រជែងថ្មីមួយ និងបានព្រមព្រៀងពង្រីកកិច្ចសហប្រតិបត្តិការថាមពលក្នុងវិស័យអ៊ីដ្រូសែន ខ្យល់នៅឯនាយសមុទ្រ និងថាមពលនុយក្លេអ៊ែរ៕

ដោយ៖ យា ចិន្ដាខន្ដី (ប្រភព៖ AA-AKP)