AKP ព្រះសីហនុ ថ្ងៃទី១២ ខែមិថុនា ឆ្នាំ២០២៦-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ នារសៀលថ្ងៃសុក្រទី១២ ខែមិថុនា ឆ្នាំ២០២៦ បានទទួលជំនួបជាមួយគណៈប្រតិភូគណៈកម្មការទី៨នៃរដ្ឋសភា ដឹកនាំដោយលោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា ដើម្បីពិភ្សាការងារក្នុងក្របខ័ណ្ឌទទួលខុសត្រូវរបស់ខ្លួនមានដូចជា វិស័យសុខាភិបាល សង្គមកិច្ចអតីតយុទ្ធ ជនយុវនីតសម្បទា ការងារ បណ្តុះបណ្តាលវីជ្ជាជីវៈ និងកិច្ចការនារី។

ជំនួបពិភាក្សានេះមានគោលបំណងចុះពិនិត្យសិក្សាស្វែងយល់អំពីប្រសិទ្ធភាព នៃការអនុវត្តច្បាប់ និងគោលនយោ បាយនានាពាក់ព័ន្ធនឹងវិស័យសុខាភិបាល សង្គមកិច្ចអតីតយុទ្ធជន និងយុវនីតិសម្បទា វិស័យការងារ និងបណ្តុះបណ្តាលវិជ្ជាជីវៈ និងកិច្ចការនារី នៅខេត្តព្រះសីហនុ។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានជម្រាបជូនពីវឌ្ឍនភាពការងារ សក្តានុពល ភូមិសាស្ត្រ វិទ្យាសាស្រ្ត និងការរីកចម្រើនរបស់ខេត្តព្រះសីហនុ ក៏ដូចជាបញ្ហាប្រឈមមួយចំនួនទាក់ទង នឹងវិស័យទាំង៤ របស់រដ្ឋសភាមានដូចជា: វិស័យសុខាភិបាល ពិគ្រោះជំងឺក្រៅសរុប ៥៥ ៣៧៣នាក់ ស្រី ៣១ ១៩១នាក់ ករណីថ្មី ៤២ ៤៤៣នាក់ ស្រី ២៣ ៨៩០នាក់ ជំងឺសម្រាកក្នុងមន្ទីរពេទ្យសរុបមាន ៦ ១៣៧នាក់ វះកាត់សរុប ១ ៣៤០នាក់ ស្រ្តីសម្រាល កូន ១ ៦៨៤នាក់ អ្នកជំងឺព្យាបាលឥតគិតថ្លៃ ៣២ ៣៩៧នាក់ ចាក់ថ្នាំបង្ការតេតាណុសដល់ស្រ្តីមានផ្ទៃពោះ ៤ ២៤០នាក់ និងពិនិត្យព្យាបាលជំងឺផ្សេងៗ។ វិស័យសង្គមកិច្ចអតីត យុទ្ធជន និងយុវនីតិសម្ប ទា មានអតីតយុទ្ធជន និង និវត្តជនចំនួន ២ ៤៥១នាក់។ វិស័យការងារបណ្តុះ បណ្តាលវិជ្ជាជីវៈមានសហគ្រាស និងគ្រឹះស្ថានចំនួន ៣ ៩៤៣ មានកម្មករ និយោជិត ១៥៥ ១៨៥នាក់ ស្រី ៧០ ៣៥២នាក់។ វិស័យកិច្ចការនារី បានពិគ្រោះយោបល់ផ្លូវចិត្ត ពិគ្រោះផ្នែកច្បាប់ ៩លើក ពិគ្រោះករណីហឹង្សាក្នុងគ្រួសារ ៦ករណី រំលោភសេពសន្ថវៈ ២ករណី។

បន្ទាប់ពីបានស្តាប់របាយការណ៍របស់ឯកឧត្តមអភិបាលខេត្តព្រះសីហនុរួចមក លោកជំទាវ ឡោក ខេង បានកោតសរសើរ និងវាយតម្លៃខ្ពស់ចំពោះអាជ្ញាធរខេត្ត ក៏ដូចជាមន្ទីរពាក់ព័ន្ធដែលខិតខំបំពេញការងារជូនប្រជាពលរដ្ឋស្របតាមយុទ្ធសាស្ត្របញ្ចកោណតំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដែលបានដាក់ចេញ នូវអភិក្រមទាំង៥ មនុស្ស ផ្លូវ ទឹក ភ្លើង និងបច្ចេកវិទ្យា និងបានដាក់ចេញនូវគោលនយោបាយ៦ ចំណុចបន្ថែមទៀត រួមមាន៖ ការពង្រឹងវិជ្ជាជីវៈបច្ចេក ទេស ការប្រើប្រាស់ប័ណ្ណ ប.ស.ស ប័ណ្ណសម៌ធម៌ ការលើកម្ពស់សុខមាលភាព សង្គម ទាក់ទង និងការងារ ប.ស.ស ការ អភិវឌ្ឍន៍សហគ្រាសធនតូច និងមធ្យម សហគ្រិនភាព ការអភិវឌ្ឍទីផ្សារការងារ និងសេដ្ឋកិច្ចក្រៅប្រព័ន្ធ ការអភិវឌ្ឍន៍ភាពធនប្រកប ដោយចីរភាព ការពង្រឹងផលលាភវិទ្យាសាស្ត្រ និងការលើកកម្ពស់សមភាពយេនឌ័រ។

លោកជំទាវបន្តថា វិស័យសុខាភិបាលត្រូវបានលើកកម្ពស់ ដោយឡែកវិស័យការងារត្រូវបានបណ្តុះបណ្តាលជំនាញបច្ចេក ទេសដល់បុគ្គលិក កម្មករ ពង្រីកវិស័យគាំពារសង្គម ដើម្បីរួមចំណែកក្នុងការ លើកកម្ពស់ការអនុវត្តយុទ្ធសាស្រ្តបញ្ចកោណដំណាក់កាលទី១ ដោយផ្តោតសំខាន់លើ កំណើន ការងារ សមធម៌ ប្រសិទ្ធភាព និងចីរភាព ដើម្បីកសាងមូលដ្ឋានគ្រឹះឈានឆ្ពោះទៅសម្រេចចក្ខុវិស័យកម្ពុជា ឆ្នាំ២០៣០ និងឆ្នាំ២០៥០។

លោកជំទាវប្រធានគណៈកម្មការទី៨នៃរដ្ឋសភាក៏បានជំរុញឱ្យអាជ្ញាធរខេត្ត ក៏ដូចជាមន្ទីរជំនាញពាក់ព័ន្ធទាំងអស់ត្រូវខិតខំធ្វើ ការផ្សព្វផ្សាយឱ្យបានទូលំ ទូលាយជូនប្រជាពលរដ្ឋបានយល់ដឹងកាន់តែច្បាស់ អំពីជំងឺមិនឆ្លង ក៏ដូចជាជំងឺផ្សេងៗ ជាពិសេសការលើកទឹកចិត្តឱ្យប្រជាជន ចុះឈ្មោះជាសមាជិក ប.ស.ស ដើម្បីងាយស្រួលទទួលយកនូវសេវាសុខាភិបាលដោយឥតគិតថ្លៃ ដើម្បីជួយសម្រួលជីវភាពរស់នៅរបស់បងប្អូនប្រជាពលរដ្ឋមូលដ្ឋាន ជាពិសេសបន្តជំរុញនិងផ្សព្វផ្សាយ កម្មវិធីបណ្តុះប ណ្តាលជំនាញវិជ្ជាជីវៈ និងបច្ចេកទេសទៅដល់យុវ ជនមកពីគ្រួសារក្រីក្រ និងគ្រួសារងាយរងហានិភ័យ ដែលជាកម្មវិធីថ្នាក់ជាតិរបស់រាជរដ្ឋាភិបាលកម្ពុជា ក្នុងអាណត្តិទី៧។

លោកជំទាវក៏បានថ្លែងអំណគុណអាជ្ញាធរខេត្តដែលបានយកចិត្តទុកដាក់ លើវិស័យសុខាភិបាល ការបណ្តុះបណ្តាលវិជ្ជាជីវៈ ជួយសាងសង់ផ្ទះជូនអតីតយុទ្ធជន ជាពិសេសការបង្ក្រាបបទល្មើសករណីឆបោកតាមប្រព័ន្ធបច្ចេកវិទ្យា (Scams Online) សង្ឃឹមថា Scams និងត្រូវបានបោសសម្អាតនៅលើទឹកដីនៃខេត្តព្រះសីហនុ ទន្ទឹមនោះបានជួយសម្រប សម្រួលពលករខ្មែរដែល បានវិលត្រឡប់មកពីប្រទេសថៃ មានការងារគ្រប់គ្នា ដើម្បីបង្កើតសេដ្ឋកិច្ចគ្រួសារ និងសេដ្ឋកិច្ចសង្គម ព្រោះខេត្តព្រះសីហនុ មានសក្តនុពលផ្នែកដឹកជញ្ជូន ពាណិជ្ជកម្ម ឧស្សាហកម្ម កសិកម្ម និងវិស័យទេសចរណ៍ ដើម្បីរុញច្រានសេដ្ឋកិច្ចខេត្តព្រះសីហនុរបស់យើងធ្វើឱ្យប្រជាពលរដ្ឋរស់នៅមានសុខ សុខដុមរមនា មានសុខភាពល្អ ប្រកបដោយភាព សុខសាន្តមានជីវភាពកាន់តែល្អប្រសើរ ដើម្បីសម្រេចបានចក្ខុវិស័យកម្ពុជាឆ្នាំ២០៣០ និងឆ្នាំ២០៥០៕

ដោយ ងូ សុមុនី