AKP ភ្នំពេញ ថ្ងៃទី១២ ខែមិថុនា ឆ្នាំ២០២៦--ក្រុមបាល់ទាត់ជម្រើសជាតិកម្ពុជាអាយុក្រោម១៩ឆ្នាំ (U19) នឹងត្រូវបន្ត១ប្រកួតចុងក្រោយជាមួយម្ចាស់ផ្ទះ ឥណ្ឌូណេស៊ី នាថ្ងៃទី១៣ ខែមិថុនា ស្អែកនេះ នៅក្នុងពានរង្វាន់យុវជនជើងឯកអាស៊ាន (ASEAN U19 Boy’s Championship) ឆ្នាំ២០២៦ នៅប្រទេសឥណ្ឌូណេស៊ី ក្រោយពីក្រុមជម្រើសជាតិយុវជនទាំងពីរក្រុមនេះបានចាញ់គូប្រកួតរៀងៗខ្លួន នៅក្នុងវគ្គពាក់កណ្តាលផ្តាច់ព្រ័ត្រ កាលពីល្ងាច និងយប់ថ្ងៃទី១១ ខែមិថុនា ឆ្នាំ២០២៦។

នៅក្នុងវគ្គពាក់កណ្តាលផ្តាច់ព្រ័ត្រម្សិលមិញនេះ គឺក្រុម U19 កម្ពុជា ចាញ់ក្រុម U19 ថៃ ដោយលទ្ធផល ០-៤ ខណៈក្រុមម្ចាស់ផ្ទះ ឥណ្ឌូណេស៊ី ដែលជាក្រុមជើងឯក២សម័យកាល (ឆ្នាំ២០១៣-២០២៤) និងជាក្រុមការពារជើងឯក ២០២៤ បានប្រកួតចាញ់ក្រុមជើងឯក៥សម័យកាល U19 អូស្ត្រាលី ដោយលទ្ធផលបច្ចេកទេស ០-១។ ដូច្នេះ ក្រុម U19 កម្ពុជា នឹងត្រូវប្រកួតដណ្តើមចំណាត់ថ្នាក់លេខ៣ជាមួយម្ចាស់ផ្ទះ ឥណ្ឌូណេស៊ី នាវេលាម៉ោង ១៦:០០ ខណៈក្រុមឈ្នះៗទាំងពីរក្រុម ថៃ និងក្រុមអូស្ត្រាលី ត្រូវប្រកួតដណ្តើមម្ចាស់ជើងឯក នាវេលាម៉ោង ២០:១៥ នាទី ថ្ងៃទី១៣ ខែមិថុនា ឆ្នាំ២០២៦ ដោយ២ប្រកួតនេះនឹងធ្វើឡើងនៅកីឡដ្ឋាន North Sumatra Stadium, Deli Serdangដូចគ្នា។

ក្រុមU19កម្ពុជា ស្ថិតក្រោមដឹកនាំពីគ្រូបង្គោល លោក Yoshida Yasuhiro អមដោយគ្រូជំនួយ លោក អ៊ុក សុធី និងលោក ឃុល ភីរម្យ ជាអ្នកចាត់ការក្រុម ព្រមទាំងក្រុមការងារគ្រូបង្វឹក៤រូបផ្សេងទៀត។ ក្នុងចំណោមការរៀបចំរបស់សហព័ន្ធកីឡាបាល់ទាត់អាស៊ាន (AFF) ២០លើក (ខកខានរៀបចំ៤លើក) ចាប់តាំងពីឆ្នាំ២០០២ ដល់ឆ្នាំ២០២៦នេះ គឺក្រុមកម្ពុជាបានចូលរួម១៤លើក ដោយ១៣លើកកន្លងមក ក្រុមU19 កម្ពុជា បានចូលរួមប្រកួតត្រឹមវគ្គជម្រុះក្នុងពូល (Group Stage) ប៉ុណ្ណោះ ដោយមិនធ្លាប់ឆ្លងផុតវគ្គចែកពូលនេះឡើយ។ ប៉ុន្តែអ្វីពិសេសអស្ចារ្យ នៅឆ្នាំ២០២៦ ដែលជាការចូលរួមលើកទី១៤របស់ខ្លួន គឺក្រុម U19 កម្ពុជាអាចសាងប្រវត្តិសាស្ត្រថ្មី លែងធ្លាក់ត្រឹមវគ្គចែកពូលទៀតហើយ ដោយបានឡើងវគ្គពាក់កណ្តាលផ្តាច់ព្រ័ត្រ៕

ដោយ ហេង ណាលីន (រូបភាព៖ FFC)